ఈ ఎన్నికల్లో జేడీయూ 101 స్థానాల్లో, బీజేపీ 101 స్థానాల్లో, లోక్ జన్‌శక్తి (రాంవిలాస్‌) 28 స్థానాల్లో పోటీ చేసింది. మెజార్టీ మార్క్‌ 122 అయినప్పటికీ, దానికంటే చాలా ఎక్కువ స్థానాల్లో ఆధిక్యం సాధించడం ద్వారా ఎన్డీయే కూటమి బలమైన రాజకీయ పట్టు సాధించినట్లు కనిపిస్తోంది. గత 2020 ఎన్నికల్లో ఈ కూటమి 125 సీట్లను గెలుచుకుని ప్రభుత్వం ఏర్పాటు చేసింది. కాగా, ఆ సంఖ్యను ఈసారి దాటేసేలా కనిపించడం రాజకీయ విశ్లేషకుల దృష్టిని బీహార్‌పై మరింతగా మళ్లించింది.బీహార్ ప్రజలు మరోసారి బీజేపీ నేతృత్వంలోని ఎన్డీయే కూటమికే భారీ విజయాన్ని అందించబోతున్నట్లు ఈ ట్రెండ్‌ స్పష్టంగా సూచిస్తోంది. కేవలం బిహార్ మాత్రమే కాకుండా జాతీయ రాజకీయ పరిణామాలపై కూడా ఈ ఫలితాలు ప్రభావం చూపే అవకాశముందనే అభిప్రాయం నిపుణులది.
ఇలాంటి పరిణామాల నడుమ విశాఖలో జరిగిన సమావేశంలో ఆంధ్రప్రదేశ్ ముఖ్యమంత్రి చంద్రబాబు నాయుడు కీలక వ్యాఖ్యలు చేశారు. బీహార్‌లో బీజేపీ 200 స్థానాలకు పైగా గెలవబోతుందని ఆయన అంచనా వేశారు. దేశ ప్రజలంతా ప్రధానమంత్రి నరేంద్ర మోదీ వైపే చూస్తున్నారని, మోదీ ఒక్కరే దేశాన్ని నడిపించగల నాయకుడని చంద్రబాబు స్పష్టం చేశారు. సరైన సమయంలో దేశానికి సరైన నాయకత్వం లభించడం భారత రాజకీయాలకు శుభపరిణామం అని కూడా ఆయన పేర్కొన్నారు. ఇలా చూస్తే, బీహార్ ఎన్నికల ఫలితాలు కేవలం ఒక రాష్ట్రానికే పరిమితం కాకుండా, జాతీయ రాజకీయ దిశను ప్రభావితం చేసే మలుపుగా ఎదగబోతున్నట్లు స్పష్టమవుతోంది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి