కొవిడ్ పాజిటివ్ కొత్త కేసుల నమోదులో మరోసారి మహారాష్ట్ర అగ్రస్థానంలో ఉంది. 24 గంటల్లోనే 42 వేల మందిని వైరస్ పాజిటివ్ బాధితులుగా గుర్తించారు అధికారులు. ఆ తర్వాత స్థానాల్లో పశ్చిమ బెంగాల్, ఢిల్లీ రాష్ట్రాలు నిలిచాయి. ముంబై మహానగరంలో కొత్త కొవిడ్ కేసులు భారీగా వెలుగు చూస్తున్నాయి. కొవిడ్ హాట్ స్పాట్‌‌గా ముంబైలోని పలు కేంద్రాలు మారిపోయాయి. ఆసియాలోని అతిపెద్ద స్లమ్ ఏరియాగా పేరున్న ధారావిలో వైరస్ వేగంగా వ్యాపిస్తోంది. నగరంలో అనేక ప్రాంతాలను కంటైన్మెంట్ జోన్లుగా గుర్తించినట్లు బృహన్ ముంబై మునిసిపల్ కార్పోరేషన్ అధికారులు ప్రకటించారు. ఇక శానిటైజేషన్, వ్యాక్సినేషన్ ప్రక్రియను మరింత విస్తృతం చేసినట్లు కూడా ప్రకటించారు. దీంతో మహారాష్ట్ర ప్రభుత్వం కీలక నిర్ణయం తీసుకుంది. రాష్ట్ర వ్యాప్తంగా నైట్ కర్ఫ్యూ అమలు చేస్తున్నట్లు ఉత్తర్వులు జారీ చేసింది మరాఠా సర్కార్. రాత్రి 11 గంటల నుంచి ఉదయం 5 గంటల వరకు నైట్ కర్ఫ్యూ అమలులో ఉంది. ఇక పగలు కూడా రాష్ట్ర వ్యాప్తంగా 144 సెక్షన్ అమలు చేస్తున్నారు. రాష్ట్రవ్యాప్తంగా స్విమ్మింగ్ పూల్స్, జిమ్, స్పా సెంటర్లు, బ్యూటీ సెలూన్లు, జూపార్కులు, మ్యూజియం, ఎంటర్‌టైన్‌మెంట్ పార్కులను మూసివేయాలని ఆదేశించింది.
