మంత్రి పేర్ని - వర్మ మధ్య జరిగిన సమావేశంలో ఎలాంటి పురోగతి లేకుండా పోయింది. సినిమా టికెట్ల తగ్గింపు విషయంలో ప్రభుత్వం ఏ మాత్రం వెనక్కి తగ్గటం లేదు. ప్రభుత్వం నిర్ణయం వల్ల సినిమా కలెక్షన్లపై పెను ప్రభావం చూపుతుందని ఇప్పటికే సిని పరిశ్రమలో పెద్ద ఎత్తున ఆందోళన నెలకొంది. పేద, మధ్య తరగతి ప్రజలకు అందుబాటు ధరల్లో వినోదం అందించాలనేది మాత్రమే ప్రభుత్వ ఉద్దేశ్యం అని ఇప్పటికే మంత్రి పేర్ని నాని వెల్లడించారు. ఇక కొందరు వైసీపీ నేతలైతే... సినిమా పరిశ్రమ మొత్తం చంద్రబాబు చెప్పినట్లు ఆడుతోందంటూ ఘాటు వ్యాఖ్యలు కూడా చేశారు. ఈ నేపథ్యంలో... టికెట్లపై ప్రభుత్వ నియంత్రణ, థియేటర్ల నిర్వహణ వంటి సమస్యలకు రామ్ గోపాల్ వర్మ తనదైన శైలిలో ఓ నాలుగు ఆప్షన్లను ప్రభుత్వానికి సూచించారు. పిశ్చర్ టైమ్ పేరుతో ఓ ట్రక్ ఏర్పాటు చేసి... అందులో సినిమాలు ప్రదర్శించాలన్నారు. ఇక రెండో ఆప్షన్ కింద కారవాన్ టాకీస్. మూవీ ఆన్ వీల్స్ అనేది కాన్సెప్ట్. ఇక మూడోది నోవా సినిమాస్. ప్రీ ఫ్యాబ్రికేషన్ టెక్నాలజీ విధానంలో సినిమా థియేటర్లు ఏర్పాటు చేయడం. అవసరమైతే వీటిని అద్దెకు ఇవ్వడం వల్ల అదనపు ఆదాయం కూడా వస్తుందన్నారు. ఇక చివరగా ఖాళీగా ఉన్న పెద్ద గోడౌన్లు, గదులను, గ్యారేజీలను కూడా థియేటర్లుగా మార్చుకునేందుకు ప్రభుత్వం గ్రీన్ సిగ్నల్ ఇవ్వాలంటూ నాలుగో ఆప్షన్ సూచించారు వర్మ. వాటిని పరిశీలించాల్సిందిగా సినిమాటోగ్రఫీ శాఖ మంత్రి పేర్ని నానికి విజ్ఞప్తి చేశారు. ఈ నాలుగింట్లో ఏ ఒక్కదాని పట్లయినా ప్రభుత్వం సానుకూలంగా స్పందిస్తే.. తెలుగు ప్రేక్షకులకు పూర్తిగా కొత్తదనాన్ని పరిచయం చేసినట్టవుతుంది.
