കെഎസ്ആർടിസി വീണ്ടും പണിമുടക്കിനൊരുങ്ങി സംഘടന! പണിമുടക്കിനോട് യോജിക്കുന്ന മറ്റു സംഘടനകളുമായി ആലോചിച്ച് തീയതി പ്രഖ്യാപിക്കുമെന്ന് യു ഡി എഫ് സംഘടനയായ ടി ഡി എഫ് വാർത്താക്കുറിപ്പിലൂടെ അറിയിച്ചു. കെഎസ്ആർടിസിയിൽ ശമ്പള പരിഷ്കരണം നടപ്പിലാക്കണമെന്ന് ആവശ്യപ്പെട്ട് വീണ്ടും അനിശ്ചിതകാല പണിമുടക്കിനൊരുങ്ങി യു ഡി എഫ്. അതേസമയം ശബരിമല മണ്ഡല- മകരവിളക്ക് തീർഥാടന കാലത്ത് തീർഥാടകർക്ക് ആവശ്യമായ ബസ് സർവീസുകൾ ഉറപ്പാക്കാൻ നടപടി സ്വീകരിച്ചിട്ടുണ്ടെന്ന് ഗതാഗത മന്ത്രി ആൻറണി രാജു അറിയിച്ചു. ശബരിമല തീർഥാടനവുമായി ബന്ധപ്പെട്ട് വിവിധ വകുപ്പുകളുടെ അവലോകന യോഗം പമ്പയിൽ ചേർന്നതായും അദ്ദേഹം വ്യക്തമാക്കി.
നേരത്തെ നടത്തിയത് സൂചനാ പണിമുടക്കായിരുന്നു ഉറപ്പുകൾ പാലിക്കപ്പെടാത്തതിനാലാണ് വീണ്ടും സമരമെന്നും ടി ഡി എഫ് പറയുന്നു. കഴിഞ്ഞ മാസത്തെ ശമ്പളം ഇതുവരെ ലഭിച്ചിട്ടില്ലെന്നും ഈ മാസം 15 മുതൽ ചീഫ് ഓഫീസിന് മുന്നിൽ അനിശ്ചിതകാല സമരം ആരംഭിക്കുമെന്നും നേതാക്കൾ കൂട്ടിച്ചേർത്തു. പമ്പയിലേക്ക് 231 കെ എസ് ആർ ടി സി ബസുകളാണ് പൂൾ ചെയ്തിരിക്കുന്നത്. ഇതിൽ നിലയ്ക്കൽ - പമ്പ ചെയിൻ സർവീസിന് മാത്രം 120 ബസുകൾ ഉണ്ടാകും. 80 നോൺ എ സി ബസുകളും 40 എ സി വോൾവോ ബസുകളും ഉൾപ്പെടുന്നതാണ് ചെയിൻ സർവീസ്. ഓരോ പത്ത് മിനിട്ടിലും ചെയിൻ സർവീസ് ഉണ്ടാകും. പഴയ നിരക്ക് തന്നെയാകും ഇത്തവണയും ഈടാക്കുന്നത്. എ സിക്ക് 80 രൂപയും നോൺ എ സി ബസിന് 50 രൂപയുമായിരിക്കും നിരക്ക്. 450 ജീവനക്കാർ സജ്ജരാണ്.
15 മുതൽതന്നെ ബസുകൾ പൂർണതോതിൽ സർവീസ് നടത്തുന്നതിനുള്ള പ്രവർത്തനമാണ് നടക്കുന്നത്. എത്ര ബസ് ആവശ്യമായി വന്നാലും ലഭ്യമാക്കുന്നതിന് നടപടി സ്വീകരിച്ചിട്ടുണ്ട്. കൊവിഡ് കാലത്തിന് മുൻപത്തെ പോലെ തീർഥാടകരുടെ വരവ് കണക്കിലെടുത്തുള്ള ക്രമീകരണങ്ങളാണ് ഇത്തവണ കെ എസ് ആർ ടി സി ഒരുക്കുന്നത്. സുരക്ഷിത തീർഥാടനം ഉറപ്പാക്കാൻ ഗതാഗത വകുപ്പിൻറെ നേതൃത്വത്തിൽ സെയ്ഫ് സോൺ പദ്ധതി ആരംഭിച്ചിട്ടുണ്ട്.
കെ എസ് ആർ ടി സി സർവീസുമായി ബന്ധപ്പെട്ട് തീർഥാടകർക്കായി വിവിധ ഭാഷകളിലുള്ള ബോർഡുകള്ളും സജ്ജമാക്കുമെന്നും ഗതാഗത മന്ത്രി അറിയിച്ചു. പത്തനംതിട്ട, ചെങ്ങന്നൂർ, കോട്ടയം, എറണാകുളം, കൊട്ടാരക്കര, തിരുവനന്തപുരം, കുമളി, എരുമേലി എന്നീ സ്‌പെഷൽ സെൻററുകളിൽ കൂടുതൽ ബസുകൾ പൂൾ ചെയ്തിട്ടുണ്ട്. ശബരിമലയിലേക്ക് മറ്റ് ഡിപ്പോകളിൽ നിന്ന് കൂടുതൽ ബസുകൾ ആവശ്യപ്പെട്ടാൽ സ്‌പെഷൽ സെൻററുകളിൽ നിന്ന് ആവശ്യമായ ബസുകൾ ലഭ്യമാക്കുന്നതിനുള്ള സംവിധാനം ഒരുക്കിയിട്ടുണ്ട്.
Find out more:
click and follow Indiaherald WhatsApp channel