തൃക്കാക്കര നിയമസഭ ഉപതെരഞ്ഞെടുപ്പ്; എന്നാൽ കോൺഗ്രസ് ഭയക്കണം ഈ ചരിത്രത്തെ! യുഡിഎഫിൻറെയും കോൺഗ്രസിൻറെയും കോട്ടയെന്നാണ് തൃക്കാക്കര അറിയപ്പെടുന്നത്. 2008ലെ മണ്ഡല പുനർനിർണയത്തോടെ നിലവിൽ വന്ന തൃക്കാക്കര നിയമസഭാമണ്ഡലത്തിൽ ആദ്യം തെരഞ്ഞെടുപ്പ് നടന്നത് 2011ലാണ്. അന്നുമുതൽ കോൺഗ്രസ് മാത്രം വിജയിച്ച് വന്ന മണ്ഡലത്തിന് മറ്റൊരു ചരിത്രം കൂടിയുണ്ട്. ഇന്നത്തെ തൃക്കാക്കരയുടെ ഒരു ഭാഗം ഉൾപ്പെടുന്ന പഴയ എറണാകുളം മണ്ഡലത്തിൽ കോൺഗ്രസിനെ വീഴ്ത്തി ഇടതുപക്ഷം ജയിച്ച് കയറിയ ഒരു തെരഞ്ഞെടുപ്പ് ഉണ്ടായിരുന്നു. വിമത സ്ഥാനാർഥിയായിരുന്നു അന്ന് യുഡിഎഫിന് തിരിച്ചടിയായത് ഏതാണ്ട് അതേ സാഹചര്യത്തിലാണ് ഇന്ന് ഉപതെരഞ്ഞെടുപ്പ് നടക്കാൻ പോകുന്നതെന്നത് കോൺഗ്രസ് നേൃത്വത്തെ അലട്ടുമെന്നതിൽ യാതൊരു സംശയവുമില്ല. തൃക്കാക്കര നിയമസഭ ഉപതെരഞ്ഞെടുപ്പ് അടുത്ത മാസം നടന്നേക്കുമെന്ന റിപ്പോർട്ടുകൾക്കിടെ സ്ഥാനാർഥിയുമായി ബന്ധപ്പെട്ട ചർച്ചകൾ സജീവമായിരിക്കുകയാണ്.
പണ്ട് മുതൽ തന്നെ യുഡിഎഫ് കോട്ടയെന്ന് വിശേഷണമുള്ള മണ്ഡലമാണ് ഇതൊക്കെ. എന്നാൽ എറണാകുളം മണ്ഡലത്തിൻറെ കോൺഗ്രസ് ചരിത്രത്തിന് കനത്ത തിരിച്ചടി നൽകി ഇടതുപക്ഷം അട്ടിമറി ജയങ്ങൾ ഇവിടെ നേടിയിട്ടുണ്ടെന്നതാണ് യാഥാർഥ്യം. കോൺഗ്രസിൽ വിമത പ്രശ്നങ്ങൾ ഉണ്ടായപ്പോഴൊക്കെ എറണാകുളത്ത് കോൺഗ്രസിന് അടിപതറിയിരുന്നു. അസംബ്ലി മണ്ഡലത്തിന് പുറമെ, ലോക്സഭ മണ്ഡലത്തിലും വിമത പ്രശ്നം കോൺഗ്രസിനെ വീഴ്ത്തിയിട്ടുണ്ട്. നിലവിൽ നേതൃത്വത്തിനെതിരെ വിമർശനവുമായി രംഗത്തെത്തിയ കെവി തോമസിനെ കൂടെ ചേർക്കാനായാൽ ഈ ചരിത്രം ആവർത്തിക്കാൻ ഇടതുപക്ഷത്തിന് കഴിഞ്ഞേക്കും. എറണാകുളം നിയോജക മണ്ഡലത്തിൻറെയും തൃപ്പൂണിത്തറ മണ്ഡലത്തിൻറെയും ഭാഗമായിരുന്ന പ്രദേശങ്ങൾ കൂട്ടിച്ചേർത്താണ് 2011ൽ തൃക്കാക്കര മണ്ഡലം രൂപീകരിക്കുന്നത്.
1970 മുതൽ 82 വരെ എറണാകുളത്ത് തുടർച്ചയായി വിജയിച്ച മുൻ മന്ത്രി കൂടിയായ കോൺഗ്രസ് നേതാവ് എൽ ജേക്കബ് 1987ൽ സിറ്റിങ്ങ് സീറ്റിൽ പരാജയപ്പെട്ടിരുന്നു. എൽഡിഎഫ് സ്വതന്ത്രനായെത്തിയ എംകെ സാനുവായിരുന്നു ജേക്കബിനെ വീഴ്ത്തി കോൺഗ്രസിന് അപ്രതീക്ഷിത പ്രഹരം ഏൽപ്പിച്ചത്. അന്ന് യുഡിഎഫിന് തിരിച്ചടിയായത്, ജേക്കബിനെതിരെ മത്സരിച്ച കോൺഗ്രസിലെ വിമത സ്ഥാനാർഥിയുടെ സാന്നിധ്യമായിരുന്നു. ഇതിന് സമാനമായി എറണാകുളം ലോക്സഭ തെരഞ്ഞെടുപ്പിലും വിമത പ്രശ്നം കോൺഗ്രസിനെ വീഴ്ത്തിയിട്ടുണ്ട്. 1996ൽ സേവ്യർ അറക്കൽ എന്ന കോൺഗ്രസ് വിമതൻ ഇടതുപക്ഷത്തിനായി മത്സരിക്കാനെത്തിയപ്പോഴാണ് മണ്ഡലം ചുവന്നത്. ഇത്തവണ കെവി തോമസ് ഇടതുപക്ഷത്തിന് വേണ്ടി കളത്തിലിറങ്ങുകയാണെങ്കിൽ കോൺഗ്രസിന് ജയം എളുപ്പമായേക്കില്ല.
കെവി തോമസിനെതിരെ കോൺഗ്രസ് എന്ത് നടപടിയെടുക്കുമെന്നത് വരാനിരിക്കുന്ന ഉപതെരഞ്ഞെടുപ്പിൽ നിർണായക ഘടകമായി മാറുമെന്ന് ഉറപ്പാണ്. എഐസിസി അച്ചടക്ക സമതി നൽകിയ നോട്ടീസിന് കെവി തോമസ് നൽകുന്ന മറുപടിയും അതിന് പിന്നാലെ സ്വീകരിക്കുന്ന നടപടിയും കെവി തോമസിനെ പോലെ സിപിഎമ്മിനും നിർണായകമാണ്. ഒരു പക്ഷേ ഇതിനുശേഷമാകും അന്തിമഘട്ട സ്ഥാനാർഥി നിർണയ ചർച്ചകളിലേക്ക് പോലും സിപിഎം കടക്കാൻ ഇടയുള്ളൂ. കെവി തോമസ് തയ്യാറാവുകയാണെങ്കിൽ അദ്ദേഹമോ, അല്ലെങ്കിൽ തോമസുമായി അടുത്ത മറ്റാരെയെങ്കിലുമാകാം, ഇടതുപക്ഷം സ്ഥാനാർഥിയായി അവതരിപ്പിക്കാൻ പോകുന്നത്. വിമതർ കോൺഗ്രസിനെ വീഴ്ത്തിയ ചരിത്രം ഉണ്ട് എന്നതുകൊണ്ട് കോൺഗ്രസിൽ നിന്നുള്ള ഒരാൾ ഇടതുപക്ഷത്തിനായി മത്സരിക്കാൻ എത്തിയാൽ മികച്ച പോരാട്ടം ഇവിടെ പ്രതീക്ഷിക്കാം.
കോൺഗ്രസിൻറെ കോട്ട പിടിച്ചെടുക്കാൻ പാർട്ടി ചിഹ്നത്തിൽ ഒരാളെ മത്സരിപ്പിക്കുന്നതിന് പകരം, സ്വതന്ത്രരെ നിർത്താനാകും സിപിഎം നേതൃത്വം തയ്യാറാവുക എന്നത് ഏറെക്കുറെ ഉറപ്പാണ്. കോൺഗ്രസ് നേതൃത്വത്തിൻറെ വിലക്ക് ലംഘിച്ച് പാർട്ടി കോൺഗ്രസ് വേദിയിലെത്തിയ കെവി തോമസിൻറെ സാന്നിധ്യവും തങ്ങൾക്ക് അനുകൂലമാകുമെന്നാണ് ഇടതുകേന്ദ്രങ്ങൾ പ്രതീക്ഷിക്കുന്നത്. എറണാകുളം നിയമസഭ മണ്ഡലത്തെയും തൃക്കാക്കര ഉൾപ്പെടുന്ന ലോക്സഭ മണ്ഡലത്തെയും നിരവധി തവണ പ്രതിനിധീകരിച്ച നേതാവാണ് കെവി തോമസ്. കെവി തോമസിനൊപ്പം ചേർന്ന് നിൽക്കുന്ന ന്യൂനപക്ഷ വോട്ടുകൾ നേടാനായാൽ തൃക്കാക്കരയിൽ ജയിച്ച് കയറുക എന്നത് സിപിഎമ്മിന് അപ്രാപ്യമായേക്കില്ല.
Find out more:
click and follow Indiaherald WhatsApp channel