ఇంకా ముఖ్యంగా, బ్లాస్ట్ ఫర్నేస్‌-1, 2, 3లను కూడా ప్రైవేటీకరణ జాబితాలో చేర్చారు. ఇవి విశాఖ ఉక్కు పరిశ్రమకు వెన్నెముక వంటివి. ఇవి ప్రైవేటు చేతుల్లోకి వెళితే, పరిశ్రమ భవిష్యత్తు పూర్తిగా ప్రశ్నార్థకంగా మారిపోతుందని కార్మిక సంఘాలు తీవ్రంగా అభ్యంతరం వ్యక్తం చేస్తున్నాయి. "ప్రైవేటీకరణ చేయమని అంటూనే ఒకవైపు ఇలాంటి నోటిఫికేషన్లు ఎందుకు జారీ చేస్తున్నారు?" అని వారు నిలదీయడం ప్రారంభించారు. ఈ పరిణామాలు కూటమి ప్రభుత్వానికి, ముఖ్యంగా మంత్రి నారా లోకేష్‌కు, స్థానిక ఎంపీ భరత్‌కు కూడా పెద్ద ఇబ్బందిగా మారాయి. లోకేష్ ఢిల్లీ పర్యటనలో ఉన్న వేళ, కార్మిక సంఘాలు ఈ సమస్యను తక్షణమే ప్రస్తావించాలని డిమాండ్ చేస్తున్నాయి. నిజంగా ప్రైవేటీకరణ చేయాలనుకుంటే బహిరంగంగా చెప్పాలని, దాచిపెట్టకుండా స్పష్టత ఇవ్వాలని వారు అంటున్నారు.
ఇక మరోవైపు, ఈ అంశం ఇప్పటికే హైకోర్టులో విచారణలో ఉంది. ఈ ఏడాది నవంబరులో మళ్లీ విచారణ జరగనుంది. హైకోర్టు విచారణ కొనసాగుతున్న సమయంలోనే ప్రైవేటీకరణకు సంబంధించిన నిర్ణయాలు తీసుకోవడం సరైన పద్ధతి కాదని కార్మికులు స్పష్టం చేస్తున్నారు. ఇది చట్టపరమైన సమస్యలకు కూడా దారి తీసే అవకాశం ఉందని వారి వాదన. మొత్తం మీద, విశాఖ ఉక్కు ప్రైవేటీకరణ అంశం మళ్లీ హాట్ టాపిక్‌గా మారింది. కార్మికుల నిరసనలు, రాజకీయ పార్టీల ఒత్తిడి, కోర్టు విచారణ ఇవ‌న్నీ కలిపి రాబోయే రోజుల్లో పరిస్థితిని మరింత క్లిష్టతరం చేయనున్నాయి. విశాఖ ఉక్కు భవిష్యత్తు ఏ దిశలో సాగుతుందన్నది ఇప్పుడు పెద్ద ప్రశ్నగా మారింది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి