కానీ ఆసక్తికర అంశం ఏంటంటే - మహాగఠ్‌బంధన్‌ పోస్టర్లలో తేజస్వీ ఫోటో మాత్రమే ఉండి, రాహుల్‌ గాంధీ ఫోటో కనిపించకపోవడం. ఇది కేవలం డిజైన్‌ లోపమా లేక కాంగ్రెస్‌-ఆర్జేడీ మధ్య పెరుగుతున్న రాజకీయ దూరానికి సంకేతమా అన్నది చర్చనీయాంశమైంది. ఇక బీజేపీ మాత్రం ఈ సీన్‌ను వదలలేదు. “ఇది సంయుక్త సమావేశమా? లేక ఒక పార్టీ ప్రైవేట్‌ షోనా?” అంటూ వ్యంగ్యాస్త్రాలు విసిరింది. కూటమిలో కూడా అంతర్గత సర్దుబాట్లు పూర్తిగా జరగలేదని తెలుస్తోంది. కాంగ్రెస్‌ 61, ఆర్జేడీ 143, వామపక్షాలు 13 స్థానాల్లో పోటీ చేస్తున్నట్లు ప్రకటించాయి. కానీ కొన్ని సీట్లలో మూడు పార్టీలు ఒకేసారి అభ్యర్థులను పెట్టడం గందరగోళానికి దారి తీసింది. దీంతో ‘కూటమిలో కూటమి పోటీ’ అనే పదం ఇప్పుడు బిహార్‌ మీడియా హెడ్లైన్లలో మార్మోగుతోంది. అయితే తేజస్వీ యాదవ్‌ ఇప్పుడు పూర్తిగా మునుపటి కంటే విభిన్నంగా ఉన్నారు.
2020 ఎన్నికల్లో 75 సీట్లు సాధించిన అనుభవం, యువత మద్దతు, లాలూ వారసత్వం - ఇవి ఆయనకు పెద్ద ఆయుధాలు. ఆయన “నూతన బిహార్‌ - నూతన దిశ” నినాదంతో ముందుకు సాగుతుంటే, ఎన్డీయే మాత్రం “అనుభవం - అభివృద్ధి - స్థిరత్వం”తో రంగంలో ఉంది. ఒకవైపు యువ ఉత్సాహం, మరోవైపు వయసు, అనుభవం మధ్య పోరు ఆసక్తికరంగా మారింది. బిహార్‌ ఎన్నికలు ఎప్పుడూ కేవలం సీట్ల పోరు కావు - అవి భావజాల యుద్ధం. ఈసారి కూడా అదే రిపీట్ అవుతోంది. తేజస్వీకి ఈ ఎన్నిక కేవలం రాజకీయ పరీక్ష కాదు, అది తరం మార్పు పోరు. లాలూ-నితీష్‌ యుగం ముగిసి, కొత్త తేజస్వీ యుగం మొదలవుతుందా? లేక మళ్లీ పాత నేతలే ఆధిపత్యం చెలాయిస్తారా? అన్నది నవంబర్‌ 14తో తేలనుంది. కానీ ఇప్పుడే చెప్పొచ్చు — బిహార్‌ ప్రజలు కొత్త కథ కోసం ఎదురు చూస్తున్నారు… ఆ కథలో హీరోగా తేజస్వీ నిలుస్తారా? లేక ప్రేక్షకులకే షాక్‌ ఇస్తారా? అనేది చూడాలి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి