മരക്കാറെത്താൻ ഇനി കേവലം എട്ട് നാളുകൾ മാത്രം! മരക്കാറെത്താൻ ഇനി കേവലം എട്ട് നാളുകൾ മാത്രം! പ്രിയദർശൻ സംവിധാനം ചെയ്ത ഈ ബ്രഹ്മാണ്ഡ ചിത്രം നിർമ്മിച്ചത് ആശീർവാദാ സിനിമാസിൻ്റെ ബാനറിൽ ആന്റണി പെരുമ്പാവൂരും കോൺഫിഡന്റ് ഗ്രൂപ്പിന്റെ ബാനറിൽ ഡോക്ടർ സി ജെ റോയിയും മൂൺ ഷോട്ട് എന്റർടൈൻമെൻറ്സിന്റെ ബാനറിൽ സന്തോഷ് ടി കുരുവിളയും ചേർന്നാണ്. മരക്കാറിൻ്റെ ആവേശം വാനോളമുയരുകയാണ്. റിലീസ് തീയ്യതി അടുക്കുന്തോറും റെക്കോർഡുകൾ ഓരോന്നായി ഭേദിച്ച് മുന്നേറാനുള്ള കച്ച മുറുക്കലിലാണ് അണിയറപ്രവർത്തകരും. കേരളത്തിൽ അറുന്നൂറോളം സ്‌ക്രീനുകളിൽ മരക്കാർ ആദ്യദിനത്തിൽ പ്രദർശനത്തിന് എത്തുമെന്നാണ് ഇപ്പോൾ മരക്കാർ - മോഹൻലാൽ ആരാധകരൊക്കെ ചൂണ്ടിക്കാട്ടുന്നത്.
മലയാളത്തിന്റെ മഹാനടൻ മോഹൻലാൽ നായകനായി എത്തുന്ന പുതിയ ചിത്രമായ മരക്കാർ അറബിക്കടലിന്റെ സിംഹം ഡിസംബർ 2നാണ് തീയേറ്ററുകളിലേക്ക് എത്തുന്നത്. വിദേശത്തു ഇംഗ്ലീഷ് ഭാഷയിലും മരക്കാർ റിലീസിനു തയ്യാറെടുക്കുന്നതായാണ് വിവരം. ഇന്ത്യക്കു പുറത്തു ഇതിനോടകം 1500 ഓളം സ്‌ക്രീനുകളിൽ മരക്കാർ പ്രദർശിപ്പിക്കാനായി ചാർട്ട് ചെയ്തു കഴിഞ്ഞെന്നും നവംബർ മുപ്പത് വരെ ബുക്കിങ് തുടരുമെന്നും ആരാധകർ പുറത്ത് വിടുന്ന വിവരങ്ങളിൽ പറയുന്നു. 1200 ഇൽ കൂടുതൽ സ്‌ക്രീനുകളിൽ ഇന്ത്യയിലൊട്ടാകെയായി മരക്കാർ എത്തുമെന്നും ഇവർ പറയുന്നുണ്ട്. മലയാളത്തിന് പുറമെ തമിഴ്, തെലുങ്കു, കന്നഡ, ഹിന്ദി ഭാഷകളിൽ ആണ് ഈ ചിത്രം എത്തുന്നത്.
നൂറു കോടിയോളം ബഡ്ജറ്റിൽ ഒരുക്കിയ മരക്കാർ രണ്ടായിരത്തിലേറെ സ്‌ക്രീനുകളിൽ ആദ്യദിനം തന്നെ പ്രേക്ഷകരിലേക്ക് എത്തുമെന്നൊക്കെയാണ് സോഷ്യൽ മീഡിയയിലൂടെ ആരാധകർ ചൂണ്ടിക്കാട്ടുന്നത്. അതിനാൽ തന്നെ മരക്കാറിൻ്റെ ഫൈനൽ ചാർട്ടിങ് 1800 കടന്നേക്കും എന്നൊക്കെയുള്ള സൂചനകളും സോഷ്യൽ മീഡിയയിലൂടെ ആരാധക വൃന്ദം നൽകുന്നുണ്ട്. ഇപ്പോഴിതാ ഈ ചിത്രത്തിന്റെ പുതിയ ടീസർ പുറത്ത് വിടാൻ തയ്യാറെടുക്കുകയാണ് അണിയറപ്രവർത്തകർ. ഇന്ന് വൈകിട്ടോടെ തന്നെ ചിത്രത്തിൻ്റെ ടീസർ പുറത്ത് വിടുമെന്നും അണിയറപ്രവർത്തകർ അറിയിച്ചിട്ടുണ്ട്.
മരക്കാറിൽ മോഹൻലാലിനൊപ്പം മകനും യുവനടനുമായ പ്രണവ് മോഹൻലാൽ, സിനിമയുടെ സംവിധായകനായ പ്രിയദർശൻ്റെ മകളും നടിയുമായ കല്യാണി പ്രിയദർശൻ, അർജുൻ സർജ, സുനിൽ ഷെട്ടി, പ്രഭു, അശോക് സെൽവൻ, സുരേഷ് കുമാറിൻ്റെയും മേനകയുടെയും മകളും തെന്നിന്ത്യൻ നടിയുമായ കീർത്തി സുരേഷ്, മുതിർന്ന അഭിനേതാക്കളായ നടി മഞ്ജു വാര്യർ, അടുത്തിടെ അന്തരിച്ച നടൻ നെടുമുടി വേണു, മുകേഷ്, ബാബുരാജ്, സുഹാസിനി, ഹരീഷ് പേരടി, ഗണേഷ് കുമാർ, മാമുക്കോയ, ഇന്നസെന്റ്, മണിക്കുട്ടൻ, നന്ദു എന്നിവരും ഈ ചിത്രത്തിലുണ്ട്.
Find out more:
click and follow Indiaherald WhatsApp channel