అదే సమయంలో ఎప్పుడు ఎలాంటి పరిస్థితులు ఎదురైనా సైనికులు సమర్థవంతంగా శత్రు దేశాలపై యుద్ధం చేయడానికి సరిహద్దుల్లో అన్ని రకాల మౌలిక వసతులు కల్పించడంలో కూడా భారత ప్రభుత్వం ఎంతో వ్యూహాత్మకంగానే ముందుకు సాగుతోంది. అదే సమయంలో భారత రక్షణరంగ పరిశోధన సంస్థ డీఆర్డీవో వినూత్నమైన ఆయుధాలను కూడా తయారు చేస్తుంది. ఇప్పటికే రాఫెల్ లాంటి అధునాతన టెక్నాలజీతో కూడిన యుద్ధ విమానాలు భారత అమ్ములపొదిలో చేరడంతో భారత రక్షణ రంగం ఎంతో పటిష్టంగా మారింది. ఇక ఇప్పుడు భారత ఆర్మీ ని మరింత పటిష్టం చేసేందుకు సిద్ధమైంది కేంద్ర ప్రభుత్వం.
ఒకటి కాదు రెండు కాదు ఏకంగా భారత అమ్ములపొదిలో 118 యుద్ధ ట్యాంకు లు త్వరలో చేరబోతున్నట్లు తెలుస్తోంది. చెన్నైకి చెందిన హెవీ వెహికల్ ఫ్యాక్టరీ తో భారత రక్షణశాఖ ఇటీవలే భారత ఆర్మీ కి 118 ఎంబిటి అర్జున ట్యాంకులను అందించాలి అంటూ ఒప్పందం కుదుర్చుకుంది. ఇక ఈ ఒప్పందం విలువ 7523 కోట్లు కావడం గమనార్హం. నూతన టెక్నాలజీతో కూడిన ఈ యుద్ద ట్యాంకులు సైన్యాన్ని మరింత పటిష్టవంతంగా మార్చుతాయని సైనికులకు అదనపు శక్తి గా నిలుస్తాయని రక్షణ శాఖ పేర్కొంది. మేకిన్ ఇండియా కు ఈ ఆఫర్ లు మరింత ఊతం ఇస్తాయి భారత రక్షణ శాఖ ప్రకటించింది.
