ന്യൂനപക്ഷ വികസനം; കേരള കോൺഗ്രസിൻറെ നീക്കം! പുതുതായി കടന്നുവന്ന പാർട്ടികൾക്ക് നൽകുന്ന സ്ഥാനങ്ങളെക്കുറിച്ച് അന്തിമ ധാരണയിലെത്താത്തതിനെത്തുടർന്നാണ് വിഭജനം വൈകിയത് എന്നാണ് പുറത്തുവരുന്ന റിപ്പോർട്ട്. അത് എന്ത് തന്നെ ആയാലും എൽഡിഎഫിൽ ബോർഡ് കോർപ്പറേഷൻ വിഭജനം അവസാനഘട്ടത്തിലെത്തി നിൽക്കവെ ഏറെ ശ്രദ്ധയാകർഷിക്കുന്ന കാര്യം ന്യൂനപക്ഷ വികസന ധനകാര്യ കോർപ്പറേഷൻ ചെയർമാൻ സ്ഥാനം കേരളാ കോൺഗ്രസിന് ലഭിക്കും എന്ന വാർത്തയാണ്. പുറത്തുവരുന്ന റിപ്പോർട്ടുകൾ ശരിയാണെങ്കിൽ നയപരമായ ഒരു മാറ്റത്തിന് കൂടിയാണ് മുന്നണി നേതൃത്വം തയ്യാറായിരിക്കുന്നത്.
രണ്ടാം പിണറായി സർക്കാർ അധികാരമേറ്റ് ആറ് മാസം പിന്നിടുമ്പോഴാണ് മുന്നണി ബോർഡ് കോർപ്പറേഷൻ വിഭജനത്തിലേക്ക് കടക്കുന്നത്. കേരള കോൺഗ്രസ് എം ഇടതുമുന്നണിയിലേക്കെത്തിയപ്പോൾ അണികൾ ഈ നീക്കത്തെ എങ്ങനെയാകും ഉൾക്കൊള്ളുക എന്ന സംശയമാണ് എല്ലാവർക്കും ഉണ്ടായിരുന്നത്. എന്നാൽ തദ്ദേശ തെരഞ്ഞെടുപ്പും നിയമസഭ തെരഞ്ഞെടുപ്പും കഴിഞ്ഞപ്പോൾ മധ്യകേരളത്തിൽ ഇടതുമുന്നണിയ്ക്ക് ഉണ്ടായ നേട്ടം ചെറുതായിരുന്നില്ല. ക്രിസ്ത്യൻ വോട്ടുബാങ്കുമായെത്തിയ ജോസ് കെ മാണിയെയും കൂട്ടരെയും മന്ത്രിസഭാ രൂപീകരണത്തിലും ഇപ്പോൾ ബോർഡ് കോർപ്പറേഷൻ വിഭജനത്തിലും ഇതുവരെ മുസ്ലിം വിഭാഗത്തിന് പ്രാമുഖ്യമുള്ള പാർട്ടികൾക്കായിരുന്നു മുന്നണികൾ ന്യൂനപക്ഷ വികസന ധനകാര്യ കോർപ്പറേഷൻ ചെയർമാൻ സ്ഥാനം നൽകിയിരുന്നത്. എന്നാൽ ഇത്തവണ കേരള കോൺഗ്രസ് എമ്മിന് ഈ കോർപ്പറേഷൻ അധ്യക്ഷ സ്ഥാനം നൽകുന്നതിലൂടെ പതിവ് രീതി ഉടച്ചുവാർക്കുകയാണ് ഇടതുമുന്നണി.
ഒന്നാം പിണറയി സർക്കാരിൻറെ കാലത്ത് ഐഎൻഎല്ലിൻറെ കൈയിലായിരുന്നു ന്യൂനപക്ഷ കോർപ്പറേഷൻ അധ്യക്ഷ സ്ഥാനം. ഈ സ്ഥാനമാണ് ഇത്തവണ മുന്നണി കേരളാ കോൺഗ്രസ് എമ്മിന് നൽകുന്നത്. അതുകൊണ്ട് തന്നെയാണ് കോർപ്പറേഷൻ അധ്യക്ഷ പദവിയിലേക്ക് മുസ്ലിം പ്രാതിനിധ്യം കൂടുതലുള്ള പാർട്ടികളെ ഇരു മുന്നണികളും പരിഗണിച്ച് വന്നിരുന്നതെന്നാണ് മാതൃഭൂമി റിപ്പോർട്ട് ചെയ്യുന്നത്. ന്യൂനപക്ഷ സ്‌കോളർഷിപ്പിൽ ക്രൈസ്തവ വിഭാഗങ്ങളെ ജനസംഖ്യാനുപാതികമായി പരിഗണിച്ചതിനു പിന്നാലെയാണ് മുന്നണി ചെയർമാൻ സ്ഥാനം കേരളാ കോൺഗ്രസ് എമ്മിന് നൽകുന്നതെന്നതാണ് ഏറ്റവും പ്രധാനപ്പെട്ട കാര്യം. സച്ചാർ കമ്മിറ്റി റിപ്പോർട്ടിനെത്തുടർന്ന് ന്യൂനപക്ഷ വികസന കോർപ്പറേഷനു കീഴിൽ മുസ്ലിം വിദ്യാർഥികൾക്കുള്ള സ്‌കീമുകളാണ് കൂടുതൽ ഉള്ളത്.
നിലവിൽ മുസ്ലിം, ക്രിസ്ത്യൻ സംഘടനകൾക്കടിയിൽ ന്യൂനപക്ഷ സാമ്പത്തിക സഹായം തർക്കവിഷയമാണെന്നിരിക്കെയാണ് ഇടതുമുന്നണി ഐഎൻഎല്ലിൻറെ കൈയ്യിൽ നിന്നും ന്യൂനപക്ഷ വികസന ധനകാര്യ കോർപ്പറേഷൻ ചെയർമാൻ സ്ഥാനം കേരളാ കോൺഗ്രസ് എമ്മിന് നൽകാൻ തയ്യാറാകുന്നത്. അധ്യക്ഷ പദവി കൈവിട്ടെന്ന് ഉറപ്പായ സാഹചര്യത്തിൽ ഐഎൻഎല്ലിൽ നേതൃത്വത്തിനെതിരെ വിമർശനം ഉയരുന്നതും ഈ കാരണങ്ങൾ കൊണ്ട് തന്നെയാണെന്ന് വേണം കരുതാൻ. ന്യൂനപക്ഷ വിഭാഗത്തിനുള്ള സാമ്പത്തിക സഹായങ്ങൾ കൈകാര്യം ചെയ്യുന്ന കോർപ്പറേഷൻറെ ചെയർമാൻ സ്ഥാനം കേരള കോൺഗ്രസ് എമ്മിന് ലഭിക്കുമെന്ന റിപ്പോർട്ട് പുറത്ത് വന്നപ്പോൾ മുതൽ തന്നെ ഈ വിഷയത്തിൽ പല കോണുകളിൽ നിന്നും ചർച്ച ആരംഭിച്ചിരുന്നു.
Find out more:
click and follow Indiaherald WhatsApp channel