ఈ ఉద్యమం తెలుగు రాష్ట్రాల చరిత్రనే మార్చేసింది. ప్రపంచబ్యాంకు షరతుల అమలు ఆలశ్యమయ్యింది. విద్యుత్ ఛార్జీలు యధేశ్ఛగా పెంచేందుకు ప్రభుత్వాలు సిద్ధం కాలేకపోయాయి. ఇప్పటికీ ట్రూ అప్, ఎఫ్పీపీసీఏ అంటూ రకరకాల పేర్లతోనే వాయింపు. కరెంటు ఛార్జీలు పెంచడానికి ప్రభుత్వాలు పలుమార్లు ఆలోచించేలా చేసిన చరిత్ర ఆ ఉద్యమానిది. దానికి మించి ఉచిత విద్యుత్ నినాదం విధానంగా మారడానికి ఆ ఉద్యమమే కారణం. విద్యుత్ సంస్కరణల కారణంగా ఉచితంగా ఇవ్వడానికి లేదు. అయినా గానీ రాజకీయంగా ఉచిత విద్యుత్ ప్రధానాంశమయ్యింది. రైతులను ఆకర్షించింది. ప్రస్తుతం ఉమ్మడి రాష్ట్రవ్యాప్తంగా వ్యవసాయరంగం రూపురేఖలను మార్చేసింది. ముఖ్యంగా ఉద్యానపంటలు, వివిధ దేశాలకు ఎగుమతులు అంటూ ఇప్పుడు ప్రభుత్వాలు చెప్పుకుంటున్న ఘనతకు అదే ఆరంభం. సాగునీటిపారుదల లేని ప్రాంతంలో ఉచిత విద్యుత్ కారణంగా బోర్లు ద్వారా వ్యవసాయం పెరిగింది. ప్రస్తుతం కోనసీమ కన్నా అనంతపురంలో తలసరి ఆదాయం పెరుగుదల రేటు ఎక్కువగా ఉండేటంత స్థాయికి ఈ మార్పు తీసుకొచ్చింది.
విద్యుత్ ఉద్యమం మీద కాల్పులు జరిపించి ప్రాణాలు తీసిన వాళ్లు, ఉచిత విద్యుత్ ఇస్తే మొత్తం విద్యుత్ రంగమే దివాళీ తీస్తుందన్న వాళ్లు, కరెంటు తీగల మీద బట్టలు ఆరేసుకోవచ్చంటూ సూత్రీకరణలు చేసిన సంస్కరణవాదులు ఇప్పుడు ఇదంతా తమదే క్రెడిట్ అని చెప్పుకోవడానికి సంశయించకపోవడమే వర్తమాన విచిత్రం. ప్రజా ఉద్యమాలతోనే మార్పులు వస్తాయనడానికి ఇదో నిదర్శనం. ప్రజా భాగస్వామ్యంతో సాగించిన ప్రతీ పోరాటం ఎంతో కొంత సానుకూల ఫలితాలను, మార్పుని తీసుకొస్తుందనడానికి కళ్లెదురుగా కనిపిస్తున్న సత్యం. ప్రత్యేక తెలంగాణా రెండోదశ పోరాటానికి ఊపిరిపోసిన ఉద్యమం కూడా ఇదే. విద్యుత్ ఉద్యమంలో నాటి చంద్రబాబు ప్రభుత్వ తుపాకీ తూటాలకు ప్రాణాలిచ్చిన బషీర్ బాగ్ అమరులకు జోహార్లు. ప్రజలు కదలాలి..ప్రభుత్వాలను కదలించాలని చాటిచెప్పిన ఉద్యమం అందరికీ పాఠం కావాలి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి