ఉమ్మడి ఆదిలాబాద్ జిల్లా పరిధిలోని కవ్వాల్ పులుల సంరక్షణ కేంద్రం పరిధిలోని జన్నారం అటవీ డివిజన్‌లో విలువైన టేకు చెట్లను స్మగ్లర్లు నరికేస్తున్నారు. వీరి ఆట కట్టించేందుకు తెలంగాణ అటవీ శాఖ 'డాగ్ స్క్వాడ్'ను రంగంలోకి దించింది. ప్రత్యేకంగా శిక్షణ ఇచ్చిన హంటర్ డాగ్‌ను తీసుకెళ్లి, నరికేసిన టేకు చెట్టు వద్ద వాసన చూపించగా... ఆ శునకం అక్కడి నుంచి ఏకంగా నాలుగు కిలోమీటర్ల దూరం వరకు ట్రాక్ చేసింది. చివరికి, తానిమడుగు గ్రామంలోని రాజేశ్ అనే వ్యక్తి ఇంటి వరకు వెళ్లి ఆగింది. దీంతో అటవీ అధికారులు అతడిని అదుపులోకి తీసుకొని విచారించగా, హంటర్ డాగ్ సత్తా వారికి తెలిసి వచ్చింది. విచారణలో భాగంగా అతడిచ్చిన సమాచారంతో టేకు కలపను స్వాధీనం చేసుకున్నారు. అనంతరం అతడిని కోర్టులో హాజరుపర్చగా, న్యాయమూర్తి రిమాండ్ విధిస్తూ ఆదేశాలు జారీ చేశారు.
ఇంతకీ ఈ టేకు దొంగను పట్టేసిన శునకం విషయానికి వస్తే, ఇది 'బెల్జియన్ షెఫర్డ్' జాతికి చెందినదిగా చెబుతున్నారు. దీనికి హర్యానాలోని 'ట్రైనింగ్ సెంటర్ ఫర్ డాగ్స్ అండ్ యానిమల్స్' విభాగంలో ఏడు నెలల పాటు ప్రత్యేక శిక్షణ ఇచ్చారు. అడవుల్లో టేకు చెట్లను నరికేసే 'పుష్ప'లకు చుక్కలు చూపించే సత్తా ఈ హంటర్ డాగ్‌కు ఉందని అధికారులు చెబుతున్నారు. సుమారు 200 మీటర్ల దూరం నుంచే వాసన పసిగట్టే ఈ తరహా శునకాలు నిజ జీవితంలో చాలా కీలక పాత్ర పోషిస్తాయి. అందుకే, రీల్ (సినిమా)లో చూపించినంత సులభంగా రియాలిటీ (నిజ జీవితం) ఉండదన్న విషయాన్ని ఈ తాజా ఉదంతం మరోసారి నిరూపించింది. అటవీ సంరక్షణలో ఆధునిక సాంకేతికతతో పాటు ఇలాంటి ప్రత్యేక శిక్షణ పొందిన శునకాలు ఎంతగానో తోడ్పడతాయని ఈ సంఘటన స్పష్టం చేసింది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి