ఈ హత్యకు సంబంధించిన వివరాలను ఈస్ట్‌ సీఐ శివప్రసాద్‌రెడ్డి తెలిపిన ప్రకారం.. నగరంలోని ఉప్పంగి హరిజనవాడకు చెందిన రామచంద్రయ్య, పుష్పమ్మ దంపతుల చిన్న కుమారుడు ప్రసన్నకుమార్‌ అలియాస్‌ బొజ్జ (29) రియల్‌ ఎస్టేట్‌ వ్యాపారం చేస్తూ తల్లిదండ్రులకు అండగా నిల్చున్నాడు. అంతేకాదు.. అతడు ఓ కార్పొరేటర్‌కు ప్రధాన అనుచరుడు కూడా.
అయితే సోమవారం ఇతడి పుట్టినరోజు కావడంతో స్నేహితులకు పార్టీ ఇచ్చేందుకు తిరుపతి- రేణిగుంట మార్గంలోని ఓ లాడ్జిలో ఆదివారం సాయంత్రం గది అద్దెకు తీసుకున్నారు. ఇక సోమవారం సాయంత్రం వరకు ఎల్లంరెడ్డి, పవన్‌కుమార్‌, బాలాజీ తదితర మొత్తం ఎనిమిదిమంది స్నేహితులతో కలిసి ఆ గదిలోనే ఉన్నారు. కాగా.. సోమవారం సాయంత్రం ఐదున్నర గంటల సమయంలో ఎల్లంరెడ్డి, పవన్‌కుమార్‌, బాలాజీ లాడ్జీ గదినుంచి బయటకు వెళ్లారు.
వారిద్దరూ కలిసి మళ్ళి రాత్రి 8 గంటల సమయంలో తిరిగి లాడ్జీ వద్దకు వచ్చిన వీరు.. ప్రసన్నకుమార్‌ను కిందకు రమ్మన్నారు. ప్రసన్నకుమార్‌ కిందకు రాగానే అతడిపై కత్తులు, బీరు బాటిళ్లతో దాడిచేసి గుండెల్లో పొడిచి అక్కడి నుండి పరైయ్యారు. ఈ దాడిలో ప్రసన్న కుమార్ అక్కడిక్కడే ప్రాణాలు కోల్పోయారు. లాడ్జీ సిబ్బంది సమాచారం మేరకు పోలీసులు సంఘటన స్థలానికి చేరుకొని పరిశీలించారు. అనంతరం కేసు నమోదుచేసి దర్యాప్తు చేపట్టారు. అయితే స్నేహితులమధ్య గొడవకు, హత్యకు దారితీసిన కారణాలు తెలియరాలేదని సీఐ తెలిపారు.
