సామాజిక బలంతో చిన్న పార్టీలు .. ప్రస్తుత కూటమికి వ్యతిరేకంగా వైపు ఉన్న పార్టీలలో ఆమ్ ఆద్మీ పార్టీ (ఆప్), బీఎస్పీ (బహుజన్ సమాజ్ పార్టీ), జైభీం, మాజీ ఐఏఎస్ అధికారి విజయ్‌కుమార్ స్థాపించిన ఎస్సీల పార్టీతో పాటు మరికొన్ని చిన్నా చితకా పార్టీలు ఉన్నాయి. ఈ పార్టీలకు పెద్దగా ఓటు బ్యాంకు లేకపోయినా, క్షేత్రస్థాయిలో నిర్దిష్టమైన సామాజిక వర్గాల బలం ఉంది. గత ఎన్నికల్లో డిపాజిట్లు దక్కించుకోకపోయినా, ఒంటరిగా పోటీ చేసిన ఆప్, బీఎస్పీ, జైభీం వంటి పార్టీలు ఒక్కో నియోజకవర్గంలో కనీసం 1000 నుంచి 2000 ఓట్ల వరకు ప్రభావితం చేశాయి. ఇప్పుడు ఈ చిన్న పార్టీలన్నీ ఏకతాటిపైకి వచ్చి, వైసీపీకి మద్దతు పలికితే, ఆ పార్టీకి మరింత బలం చేకూరుతుందని, ఈ కూటమి ఏర్పాటుకు తాను నడుం బిగిస్తానని జడ శ్రావణ్ కుమార్ ప్రకటించారు. అంతేకాకుండా, కమ్యూనిస్ట్ పార్టీలు కూడా కొంతకాలంగా వైసీపీ వైపు సానుకూలంగా చూస్తున్నాయన్న వాదన కూడా ఉంది.
జగన్ వ్యూహం: పొత్తుకు విముఖమా? .. ఈ చిన్న పార్టీలు ఎంతగా ఆసక్తి చూపుతున్నా, అసలు వైసీపీ అధినేత ఉద్దేశం ఏంటి? అన్నదే ఇప్పుడు కీలకం. కూటమి ఏర్పాటు తప్పు కాకపోయినా, పొత్తులకు జగన్ సుముఖంగా లేరన్న అభిప్రాయం ఉంది. గతంలో కూడా మైనారిటీ ఓటు బ్యాంకు నేపథ్యంలో, బీజేపీ నేతలు పొత్తుకు ప్రయత్నించినప్పుడు జగన్ 'ససేమిరా' అన్నారన్న వార్తలు వచ్చాయి. ప్రస్తుత పరిస్థితుల్లో, ఎన్నికల పోరాటం కఠినంగా మారుతున్న నేపథ్యంలో, చిన్న పార్టీలతో పొత్తు పెట్టుకుంటే మంచిదన్న అభిప్రాయం వైసీపీ శ్రేణుల్లో ఉన్నట్లు తెలుస్తోంది. అయినప్పటికీ, 'ఒంటరి పోరు'కే అలవాటు పడిన జగన్, ఈ చిన్న పార్టీల వైపు ఎంతవరకు చేతులు చాపుతారు? అనేది కాలమే నిర్ణయించాలి. ఈ పరిణామం ఏపీ రాజకీయాలకు కొత్త మలుపు ఇవ్వడం మాత్రం ఖాయం.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి