పవర్ స్టార్ పవన్ కళ్యాణ్ ప్రస్తుతం వరుస సినిమాలతో బిజీగా మారిన సంగతి తెలిసిందే. పవన్ కళ్యాణ్ ప్రస్తుతం నటిస్తున్న సినిమాలో 'హరిహర వీరమల్లు' సినిమా కూడా ఒకటి. వైవిధ్య చిత్రాల దర్శకుడు క్రిష్ జాగర్లమూడి ఈ సినిమాకి దర్శకత్వం వహిస్తున్నారు. మెగా సూర్య ప్రొడక్షన్స్ బ్యానర్ పై ఏఎమ్ రత్నం ఈ సినిమాను ఎంతో ప్రతిష్టాత్మకంగా నిర్మిస్తున్నారు. పాన్ ఇండియా స్థాయిలో రూపొందుతున్న ఈ సినిమాలో పవన్ కళ్యాణ్ కి జోడిగా నిధి అగర్వాల్ హీరోయిన్ గా నటిస్తోంది. పీరియాడికల్ డ్రామాగా క్రిష్ ఈ సినిమాను తెరకెక్కిస్తుండగా ఈ సినిమా షూటింగ్ చాలా రోజుల కిందటే స్టార్ట్ అయింది.

కానీ మధ్యలో కరోనా సెకండ్ కారణంగా ఈ సినిమా షూటింగ్ కి బ్రేక్ పడింది. ఇక ఈ సినిమా షూటింగ్ ఆగిపోయిన తర్వాత దర్శకుడు క్రిష్ వైష్ణవ్ తేజ్ హీరోగా 'కొండపొలం' అనే సినిమాకి దర్శకత్వం వహించాడు. అటు పవన్ కళ్యాణ్ కూడా ఈ సినిమా షూటింగ్ నుండి బ్రేక్ తీసుకొని భీమ్లా నాయక్ సినిమా షూటింగ్ తో బిజీగా ఉన్నాడు. ఈ సినిమా షూటింగ్ దాదాపు పూర్తి కావచ్చింది. ఇక ఇదిలా ఉంటే తాజా సమాచారం ప్రకారం త్వరలోనే హరిహర వీరమల్లు సినిమా తిరిగి సెట్స్ పైకి వెళ్లనుంది. ఇందుకు సంబంధించి దర్శకుడు క్రిష్ ప్రస్తుతం లొకేషన్ల వేటలో ఉన్నారు.

ఇక లొకేషన్స్ సెలక్షన్ పూర్తయిన వెంటనే ఈ సినిమా షూటింగ్ ని తిరిగి చిత్ర యూనిట్ ప్రారంభించబోతున్న ట్లుగా వార్తలు వినిపిస్తున్నాయి. ఇప్పటికే ఈ సినిమా నుండి విడుదలైన టీజర్ కి ప్రేక్షకుల్లో భారీ స్పందన రావడంతో పాటు సినిమాపై అంచనాలు భారీగా క్రియేట్ అయ్యాయి. ఇక పవన్ కళ్యాణ్ తో పాటు ఈ సినిమాలో బాలీవుడ్ స్టార్స్ అర్జున్ రాంపాల్, జాక్వెలిన్ ఫెర్నాండెజ్ సైతం పలు కీలక పాత్రల్లో నటిస్తున్నారు. మరోవైపు పవన్ కళ్యాణ్ కెరీర్ లో మొట్టమొదటి పాన్ ఇండియా సినిమా ఇదే కావడం విశేషం. దీంతో ఈ సినిమా కోసం పవన్ ఫ్యాన్స్ ఎంతో ఆసక్తిగా ఎదురు చూస్తున్నారు.దీంతో వీలైనంత త్వరగా షూటింగ్ పూర్తి చేసి వేసవి కానుకగా సినిమాను విడుదల చేయాలని సన్నాహాలు చేస్తున్నారు...!!

మరింత సమాచారం తెలుసుకోండి:

Pawan Kalyan

Anilkumar

25/11/2021 06:30 PM