യോഗിയുടെ റെക്കോർഡ് വിജയം ഇങ്ങനെ! മൂന്ന് പതിറ്റാണ്ടിലേറെ പാർട്ടികൾ മാറിമാറി ഭരിച്ച യുപിയുടെ രാഷ്ട്രീയ ചരിത്രം തിരുത്തിയാണ് ബിജെപിയും യോഗിയും യുപിയിൽ വിജയിച്ചു കയറിയത്. 35 വർഷത്തിന് ശേഷമാണ് യുപിയിൽ ഒരു രാഷ്ട്രീയ പാർട്ടി ഭരണത്തുടർച്ച നേടുന്നത്. ഇന്ത്യൻ ചരിത്രത്തിൽ ഇടം നേടിയ കർഷകസമരവും രാജ്യത്തെ ഞെട്ടിച്ച ലഖീംപുർ ഖേരിയും ഹത്രസും ഉൾപ്പെടെയുള്ള സംഭവങ്ങൾ നിയമസഭാ തെരഞ്ഞെടുപ്പിൽ നിർണായകമാകുമെന്ന് വിലയിരുത്തലിനിടെ ഉത്തർപ്രദേശ് രാഷ്ട്രീയത്തിൽ പുതുചരിത്രം കുറിച്ച് യോഗി ആദിത്യനാഥ്. രാജ്യത്ത് കൊവിഡ്-19 കേസുകൾ ഉയർന്നതോതിൽ റിപ്പോർട്ട് ചെയ്യപ്പെട്ട മാസങ്ങളിൽ പ്രതിരോധ പ്രവർത്തനങ്ങളിൽ സർക്കാരിന് വീഴ്ച സംഭവിച്ചുവെന്ന് സംസ്ഥാന ബിജെപിയിൽ നിന്ന് തന്നെ ആരോപണം ഉയർന്നു.
വിവാദങ്ങൾ തനിക്ക് നേരെ വിരൽ ചൂണ്ടിയതോടെ ഡൽഹിയിലെത്തിയ യോഗി പ്രധാനമന്ത്രി നരേന്ദ്ര മോദിയേയും കേന്ദ്ര ആഭ്യന്തര വകുപ്പ് മന്ത്രി അമിത് ഷായെയും നേരിൽ കണ്ട് കാര്യങ്ങൾ തനിക്ക് അനുകൂലമാക്കുകയായിരുന്നു. പാർട്ടിയിൽ നിന്ന് തന്നെ ഉയർന്ന വിവാദങ്ങൾക്ക് ചെവികൊടുക്കാതെ യോഗിക്കൊപ്പം നിലയുറപ്പിക്കാൻ മോദിയും അമിത് ഷായും തീരുമാനിച്ചതോടെയാണ് യുപി രാഷ്ട്രീയത്തിൽ ചരിത്രവിജയം നേടാൻ ബിജെപിക്ക് സഹായമായത്. ഒരു ഘട്ടത്തിൽ ബിജെപി സംസ്ഥാന നേതൃത്വത്തിൽ നിന്ന് തന്നെ എതിർപ്പ് ശക്തമായ സാഹചര്യത്തിൽ നിന്നാണ് യോഗി ഭരണത്തുടർച്ച സ്വന്തമാക്കുന്നത്. ഇത്തവണ അയോധ്യ, മഥുര ക്ഷേത്രനഗങ്ങളിൽ യോഗി മത്സരിക്കുമെന്ന റിപ്പോർട്ടുകൾ മുൻപ് പുറത്തുവന്നെങ്കിലും ഗൊരഖ്പുരിൽ (അർബൻ) മത്സരിക്കാൻ തീരുമാനിക്കുകയായിരുന്നു. '
അയോധ്യയിൽ നിന്ന് യോഗി മത്സരിച്ചേക്കുമെന്ന് ആദ്യ ഘട്ടങ്ങളിൽ അഭ്യൂഹങ്ങളുണ്ടായിരുന്നു. എന്നാൽ, ലോക്‌സഭാ തെരഞ്ഞെടുപ്പിൽ യോഗി അഞ്ച് തവണ വിജയിച്ച ഗൊരഖ്പുരിൽ തന്നെ അദ്ദേഹത്തെ മത്സരിപ്പിക്കാൻ പാർട്ടി തീരുമാനിക്കുകയായിരുന്നു. ശ്രീരാമ ജന്മഭൂമിയായ അയോധ്യയിൽ മത്സരിക്കാതെ ഗൊരഖ്പുർ തെരഞ്ഞെടുക്കാനുള്ള തീരുമാനം ശരിവെക്കുകയാണ് യോഗിയുടെയും ബിജെപിയുടെയും വിജയം. മുന്നോക്ക രജപുത് വിഭാഗത്തിൽ നിന്നുള്ള യോഗി എക്കാലവും തീവ്രഹിന്ദുത്വ നിലപാടുകൾക്കൊപ്പം നിലകൊണ്ട നേതാവാണ്. മുഖ്യന്ത്രി സ്ഥാനാർഥിയെ പ്രഖ്യാപിക്കാതെ 2017ൽ തെരഞ്ഞെടുപ്പിനെ നേരിട്ട ബിജെപി 403ൽ 325 സീറ്റുകൾ നേടിയാണ് യുപിയിൽ അധികാരത്തിൽ എത്തിയത്.
വമ്പിച്ച വിജയം നേടിയതിന് പിന്നാലെ അപ്രതീക്ഷിതമായിട്ടാണ് യോഗിയെ മുഖ്യമന്ത്രി കസേരയിലേക്ക് ബിജെപി നേതൃത്വം എത്തിച്ചത്. എന്നാൽ ഇത്തവണ വിജയിച്ചാൽ മുഖ്യമന്ത്രിയായി തുടരാമെന്ന ആത്‌മവിശ്വാസത്തിലാണ് യോഗി തെരഞ്ഞെടുപ്പിനെ നേരിട്ടതും ശക്തമായ വിജയം കൈവരിച്ചതും. 2017ൽ രാജ്യത്തെ ഏറ്റവും വലിയ സംസ്ഥാനത്തിൻ്റെ മുഖ്യമന്ത്രി സ്ഥാനം ബിജെപി നേതൃത്വം യോഗി ആദിത്യനാഥിന് കൈമാറിയെങ്കിൽ ഇത്തവണ അങ്ങനെയല്ല കാര്യങ്ങൾ. കഴിഞ്ഞ നിയമസഭാ തെരഞ്ഞെടുപ്പിൽ മോദി തരംഗത്തിൽ യുപിയിൽ വിജയിച്ചു കയറിയെങ്കിൽ അഞ്ച് വർഷത്തിനപ്പുറം യോഗി തരംഗം യുപിയിൽ ആഞ്ഞടിച്ചുവെന്നാണ് തെരഞ്ഞെടുപ്പ് ഫലം സൂചിപ്പിക്കുന്നത്. പാർട്ടിയിലെ വിവാദങ്ങളെ ദേശീയ നേതൃത്വത്തെ മുന്നിൽ നിർത്തി വെട്ടിയ യോഗി കഴിഞ്ഞ മൂന്ന് മാസത്തിനിടെ എല്ലാ മണ്ഡലങ്ങളിലും നേരിട്ടെത്തി തെരഞ്ഞെടുപ്പ് പ്രചാരണം നയിച്ചു.
Find out more:
click and follow Indiaherald WhatsApp channel