ശശി തരൂർ കോൺഗ്രസ്സിന്റെ മാലാഖയോ ചെകുത്താനോ? തരൂരിന്റെ പെട്ടെന്നുള്ള മലബാർ സന്ദർശനവും, വി ഡി സതീശന്റെ പ്രതികരണവുമെല്ലാം കോൺഗ്രസ്സിനകത്ത് ഒരു പുതിയ ഗ്രൂപ്പ് സമവാക്യം രൂപപ്പെടുകയാണ് എന്ന നിലയിലാണ് പൊതുവിൽ വിലയിരുത്തപ്പെടുന്നത്. കേരളത്തിലെ കോൺഗ്രസ്സിന്റെ ബലതന്ത്രങ്ങളെല്ലാം ഗ്രൂപ്പുകളെ അടിസ്ഥാനമാക്കിയുള്ളതു തന്നെയാണ്. ഗ്രൂപ്പിനെ ഇല്ലാതാക്കുമെന്നുറച്ച് ആത്മാർത്ഥമായി പ്രവർത്തിച്ചവരെല്ലാം രാഷ്ട്രീയമായി ഏതാണ്ട് ഇല്ലാതാവുകയാണ് ചെയ്തിട്ടുള്ളത്. ഗ്രൂപ്പുകളെ നേരിടാൻ ഒരിക്കൽ എഐസിസി നേരിട്ട് രംഗത്തിറക്കിയ തെന്നല ബാലകൃഷ്ണപിള്ള ഒരു 'തെന്നലായ്' മാറിയതും കേരളം കണ്ടിട്ടുണ്ട്. അതുകൊണ്ടു തന്നെ തരൂരിന്റെ 'യു' ഗ്രൂപ്പ് പ്രസ്താവനയെ ആരും കാര്യമായി കാണുന്നില്ല.
അതൊരു പുതിയ ഗ്രൂപ്പാകാനേ ഇന്നത്തെ നിലയിൽ വഴിയുള്ളൂ. ഒരു 'U' ഗ്രൂപ്പ് ആയിരിക്കും ഇനി രൂപപ്പെടുക എന്നാണ് ശശി തരൂർ പറയുന്നത്. 'യുനൈറ്റഡ് കോൺഗ്രസ്' എന്നാണ് അതിന്റെ പൂർണരൂപമെന്നും അദ്ദേഹം വിശദീകരിക്കുന്നു. എന്നാൽ ഒരു 'അൺഡിക്ലയേഡ്' ഗ്രൂപ്പായി തരൂരിന്റെ 'ഗ്രൂപ്പ്' മാറുമോയെന്നാണ് കേരളം ഉറ്റുനോക്കുന്നത്. കെ. കരുണാകരനും എ കെ ആന്റണിയും എ, ഐ ഗ്രൂപ്പുകൾ എന്ന പേരുകളിൽ നിയന്ത്രിച്ചിരുന്ന കോൺഗ്രസ്സിലെ ഗ്രൂപ്പ് രാഷ്ട്രീയത്തിന് ഒരു ഗതിമാറ്റമുണ്ടാകുന്നത് 2004-ലാണ്. ഏതാഗ്രഹവും സാധിപ്പിച്ചു തരുന്ന, ആശ്രിതവത്സലനായ, ഗുരുവായൂരുണ്ണിക്കണ്ണന്റെ ഭക്തനായ നേതാവായി അണികൾക്കിടയിൽ കെ കരുണാകരൻ നിറഞ്ഞു നിന്നപ്പോൾ, 'ആദർശവാനും, സത്യസന്ധനായ രാഷ്ട്രീയക്കാരനു'മായി എകെ ആന്റണി ഒരു എതിർ ഇമേജ് നിലനിർത്തിപ്പോന്നു. സത്യത്തിൽ കോൺഗ്രസ്സ് എന്ന സംഘടനയുടെ ഘടനയ്ക്ക് ഇരുവരെയും ഉൾക്കൊള്ളാനായി എന്നതും പ്രസക്തമാണ്.
അടിയന്തിരാവസ്ഥാ കാലം, പാർട്ടി പിളർപ്പ്, കേരള കോൺഗ്രസ്സ് രൂപീകരണം, ചാരക്കേസ് തുടങ്ങിയ, കേരളം കണ്ട മിക്ക രാഷ്ട്രീയ ചലനങ്ങളിലും കോൺഗ്രസ്സിനകത്തെ ഗ്രൂപ്പിസം പ്രധാന ഘടകമായി മാറിയിട്ടുണ്ട്. ഇതിനിടെ രാജന്റെ കൊലപാതകം മുതൽ പാമോലിൻ കേസ് വരെയുള്ള വിഷയങ്ങളിൽ കെ കരുണാകരൻ പതറിയപ്പോൾ അഴിമതിമുക്തനായ നേതാവ് എന്ന സൽപ്പേര് എ കെ ആന്റണി നിലനിർത്തി.'മലബാർ പര്യടനം' എന്ന തരൂരിന്റെ അപ്രതീക്ഷിത നീക്കം വലിയൊരു വിഭാഗം കോൺഗ്രസ്സ് നേതാക്കളിൽ ആശങ്കയുണ്ടാക്കിയിട്ടുണ്ട്. അടുത്ത നിയമസഭാ തെരഞ്ഞെടുപ്പിൽ മത്സരിച്ച് തരൂർ കോൺഗ്രസ്സിന്റെ മുഖ്യമന്ത്രിപദത്തിലേക്ക് എത്തുമെന്ന് എന്ന് ചില മാധ്യമങ്ങൾ പ്രചരിപ്പിക്കുന്നുണ്ട്. കെ മുരളീധരൻ തരൂരിന് പിന്തുണയുമായി വന്നതും ശ്രദ്ധേയമാണ്.
2004-ൽ കേരളരാഷ്ട്രീയം വിട്ട് ആന്റണി ഡൽഹിയിലേക്ക് ചുവട് മാറ്റുകയും, തെരഞ്ഞെടുപ്പിലെ തോൽവി ഏൽപ്പിച്ച ആഘാതവും മറ്റും കെ കരുണാകരന്റെ പോരാട്ടവീര്യം കുറയ്ക്കുകയും ചെയ്തപ്പോൾ ഗ്രൂപ്പ് പോരുകളുടെ നേതൃത്വം രമേശ് ചെന്നിത്തലയിലും ഉമ്മൻചാണ്ടിയിലും വന്നു ചേർന്നു. കരുണാകരൻ തന്റെ അനുയായികളെ കൂട്ടി കോൺഗ്രസ്സ് വിട്ടപ്പോൾ പിന്നീടങ്ങോട്ട് എ ഗ്രൂപ്പിന്റെ അപ്രമാദിത്വമായിരുന്നു കോൺഗ്രസ്സിൽ. രമേശ് ചെന്നിത്തല കെ പി സി സിയുടെ പ്രസിഡണ്ടും ഉമ്മൻ ചാണ്ടി പ്രതിപക്ഷ നേതാവും ആയി മാറിയ കാലം. വിവിധയിടങ്ങളിൽ ചിന്നിച്ചിതറി കിടന്നിരുന്ന ഐ ഗ്രൂപ്പുകാരെ രമേശ് ചെന്നിത്തല നേരിട്ട് കാണുകയും, 'വിശാല ഐ ഗ്രൂപ്പ്' എന്ന പുതിയ ഗ്രൂപ്പിലേക്ക് സ്വാഗതം ചെയ്യുകയും ചെയ്തു. എ ഗ്രൂപ്പുമായി സഹകരിക്കാൻ താല്പര്യമില്ലാത്തവർ രമേശ് ചെന്നിത്തലയ്ക്ക് പിന്തുണ പ്രഖ്യാപിച്ചു.
Find out more:
click and follow Indiaherald WhatsApp channel