ఈ ఉద్రిక్తతల నడుమ, ఎవరు ముందుగా వెనక్కి తగ్గుతారనేది మిలియన్ డాలర్ల ప్రశ్నగా మారింది. ఇజ్రాయెల్ తన లక్ష్యాలను ఛేదించాక స్వయంగా శాంతిస్తుందా, లేక ఇరాన్ ప్రతీకార దాడులతో సరిపెట్టుకుంటుందా అన్నది ఆసక్తికరంగా మారింది. ఇరాన్ క్షిపణులను గాలిలోనే కూల్చివేసేందుకు ఇజ్రాయెల్ వద్ద అత్యాధునిక ఐరన్ డోమ్ వ్యవస్థ ఉండగా, ఇజ్రాయెల్ దాడులను నిలువరించడంలో ఇరాన్ ఎయిర్ డిఫెన్స్ వ్యవస్థలు ఘోరంగా విఫలమయ్యాయన్నది గత అనుభవాలు స్పష్టం చేస్తున్నాయి. గత వైఫల్యాల నుంచి పాఠాలు నేర్వని ఇరాన్, ఇప్పుడు ఇజ్రాయెల్ తాజా దెబ్బకు పూర్తిగా నిశ్చేష్టమైపోయినట్లు కనిపిస్తోంది.
ఈ సంక్లిష్ట పరిస్థితుల్లో అగ్రరాజ్యం అమెరికా రంగంలోకి దిగి ఈ యుద్ధానికి తెర దించుతుందా అనేది కీలక పరిణామం. ఇరాన్ వేడుకుంటే తప్ప అమెరికా జోక్యం చేసుకుని శాంతి చర్చలకు మార్గం సుగమం చేయడం కష్టమేనన్న వాదనలు వినిపిస్తున్నాయి. ఒకవేళ ఇజ్రాయెల్ తమ లక్ష్యాలు నెరవేరాయని భావించి దాడులు నిలిపివేస్తే, గతంలో పాకిస్తాన్ తరహాలో ఇరాన్ కూడా జనావాసాలు లేని ప్రాంతాలపై కొన్ని నామమాత్రపు క్షిపణులు ప్రయోగించి, తామే విజయం సాధించామని గొప్పలు చెప్పుకుంటూ నాటకీయ పరిసమాప్తి పలికే అవకాశాలున్నాయి.
దీనికి విరుద్ధంగా, ఇరాన్ గనుక భారీ స్థాయిలో ఇజ్రాయెల్ పై విరుచుకుపడితే, ఇజ్రాయెల్ మాత్రం ఇరాన్ అంతు చూసే వరకు వెనక్కి తగ్గే ప్రసక్తే లేదని అంతర్జాతీయ విశ్లేషకులు అంచనా వేస్తున్నారు. రాబోయే రోజుల్లో ఏం జరగనుందో ప్రపంచం మొత్తం ఉత్కంఠగా ఎదురుచూస్తోంది. ఈ యుద్ధ కార్చిచ్చు ఎంత దూరం విస్తరిస్తుందో, ఎలాంటి విధ్వంసం సృష్టిస్తుందో కాలమే నిర్ణయించాలి. మధ్యప్రాచ్యంలో మరో భీకర పోరుకు రంగం సిద్ధమైనట్లే కనిపిస్తోంది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి