ఈ ఏడాది లోక్‌సభ ఎన్నికల్లో అయితే మరీ అద్భుతం. ఆయనకు ఇచ్చిన ఐదు ఎంపీ సీట్లలో ఐదుకు ఐదూ గెలిచి, నూటికి నూరు శాతం (100%) విజయపరంపరను నమోదు చేశారు. అయితే, చిరాగ్ రాజకీయ ప్రయాణం అంత సులభంగా సాగలేదు. ఇక్కడే ఆయనకు, తెలుగు రాజకీయాల్లోని మన పవర్ స్టార్ పవన్ కళ్యాణ్ గారికి పోలికలు కనిపిస్తున్నాయి. పవన్ మాదిరిగానే, గత అసెంబ్లీ ఎన్నికల్లో చిరాగ్ ఒంటరిగా పోటీ చేసి కేవలం ఒక్క సీటుకే పరిమితమై, ఘోర పరాజయాన్ని చవిచూశారు. అయినా మొక్కవోని ధైర్యంతో, పట్టుదలతో నిలబడి, మళ్లీ ప్రధాని మోదీ సారథ్యంలోని ఎన్డీఏలో భాగమై, ఈరోజు తిరుగులేని శక్తిగా ఎదిగారు. గత వైఫల్యాలను గుణపాఠంగా తీసుకుని, సరైన కూటమిలో చేరి, తన నాయకత్వ ప్రతిభను నిరూపించుకున్న చిరాగ్... ఇప్పుడు బీహార్ ప్రజలకు సరికొత్త ఆశగా, యువ సేనానిగా కనిపిస్తున్నారు.
అందుకే ఆయనను బీహార్ పవన్‌గా పిలుస్తున్నారు! మోదీకి అత్యంత విశ్వాసపాత్రుడు! .. చిరాగ్ పాశ్వాన్ ప్రధాని నరేంద్ర మోదీకి అత్యంత విశ్వాసపాత్రుడిగా నిలిచారు. కేంద్ర మంత్రివర్గంలో ఫుడ్ ప్రాసెసింగ్ శాఖను సమర్థవంతంగా నిర్వహిస్తున్నారు. తన తండ్రి ఆశయమైన ముఖ్యమంత్రి పీఠాన్ని సాధించే లక్ష్యంతోనే ముందుకు సాగుతున్నారు. "2029 ఎన్నికల తర్వాత కూడా నరేంద్ర మోదీ గారే దేశానికి మరోసారి ప్రధాని కావాలి" అని చిరాగ్ బలంగా కోరుకోవడం, ఎన్డీఏ కూటమి పట్ల ఆయనకున్న నిబద్ధతను తెలియజేస్తుంది. నితీష్ కుమార్ నాయకత్వానికి మద్దతిస్తూనే, బీహార్ రాజకీయాల్లో తనదైన ముద్ర వేయాలని ఉవ్విళ్లూరుతున్న ఈ యువ నాయకుడి వడివడిగా వేస్తున్న అడుగులు చూస్తుంటే... బీహార్ రాజకీయ భవిష్యత్తులో ఓ 'చిరాగ్' (దీపం) ఖచ్చితంగా వెలగబోతోందని స్పష్టమవుతోంది! ఈ యంగ్ స్టార్ సక్సెస్ జైత్రయాత్ర ఇలాగే కొనసాగాలని కోరుకుందాం!
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి