మొదటగా మహేష్ కెరీర్ ఐదవ సినిమాగా రిలీజ్ అయిన భారీ కౌబాయ్ మూవీ టక్కరి దొంగ 2002 సంక్రాంతి కానుకగా రిలీజ్ అయింది. ఆ సినిమాలో మహేష్ పెర్ఫార్మన్స్ కి బాగా పేరు లభించినప్పటికీ సినిమా మాత్రం ఆశించిన స్థాయి సక్సెస్ కాలేదు. అనంతరం ఏడవ సినిమా ఒక్కడు సంక్రాంతికి రిలీజ్ అయి అప్పట్లో అతి పెద్ద ఇండస్ట్రీ హిట్ కొట్టింది. గుణశేఖర్ తీసిన ఆ మూవీతో మహేష్ క్రేజ్, మార్కెట్ రేంజి ఊహించనంత స్థాయికి పెరిగింది. ఆ తరువాత పూరి జగన్నాథ్ తీసిన బిజినెస్ మ్యాన్ మూవీ కూడా సంక్రాంతి కి రిలీజ్ అయి సూపర్ డూపర్ హిట్ కొట్టింది.
ఆ సినిమాలో మహేష్ వన్ మ్యాన్ షోకి ప్రేక్షకాభిమానులు బ్రహ్మరథం పట్టారు. ఆపైన వెంకటేష్ తో కలిసి తొలిసారిగా సీతమ్మవాకిట్లో సిరిమల్లెచెట్టు వంటి భారీ మల్టీస్టారర్ మూవీ చేసిన మహేష్ దానితో కూడా సూపర్ హిట్ ని దక్కించుకున్నారు. ఈ సినిమాలో సమంత, అంజలి హీరోయిన్స్ గా నటించారు. ఆ తరువాత సుకుమార్ తీసిన వన్ నేనొక్కడినే అనే సైకలాజికల్ థ్రిల్లర్ మూవీలో నటించిన మహేష్, సంక్రాంతికి రిలీజ్ అయిన ఆ మూవీతో పరాజయాన్ని మూటగట్టుకున్నారు. ఇక రెండేళ్ల క్రితం అనిల్ రావిపూడి తీసిన సరిలేరు నీకెవ్వరు మూవీతో మరొక్కసారి సంక్రాంతికి ప్రేక్షకుల ముందుకు వచ్చిన మహేష్, దానితో పెద్ద విజయాన్ని అందుకున్నారు. ఈ సినిమాలో రష్మిక మందన్న హీరోయిన్ గా నటించగా ఒకప్పటి నటి విజయశాంతి కీలక పాత్ర చేసారు. ఈ విధంగా తన కెరీర్ లో సంక్రాంతికి విడుదలైన సినిమాలతో పెద్ద విజయాలు అందుకుని తండ్రి మాదిరిగా సంక్రాంతి సూపర్ స్టార్ గా నిలిచారు మహేష్ బాబు.
