అంతేకాదు, గత ఎన్నికల్లో వైసీపీ తరఫున పోటీ చేసిన వంగా గీత గారు ఇప్పుడంటే పూర్తిగా రాజకీయంగా గోచరించకపోవడం, పార్టీకి మరింత చేదు అనుభవంగా మారుతోంది. జగన్ పిలుపు మేరకు “బాబు మేనిఫెస్టో” పై రాష్ట్రవ్యాప్త ప్రచార కార్యక్రమంలో వంగా గీత కాస్త చురుకుగా పాల్గొనాలని భావించారు. కానీ, అప్పుడు ఆమె నిర్వహించిన సమావేశానికి వందమంది కూడా హాజరుకాకపోవడం, ఆమె నిస్సత్తువుగా వెనుకడుగు వేసేందుకు కారణమైంది. ఇక ఎన్నికల తర్వాత వంగా గీత పిఠాపురం రాజకీయాలలో పూర్తిగా అరంగేట్రం చేయకుండా ఉండటానికి ప్రధాన కారణంగా, నియోజకవర్గంలోని టిడిపి అసంతృప్త నేత వర్మ పేరు వినిపిస్తోంది. వర్మ వైసీపీతో సంపర్కంలో ఉన్నట్లు ప్రచారం జరుగుతోంది.
ఇక ఆయన పార్టీ మారితే వచ్చే ఎన్నికల్లో వైసీపీ తరఫున పిఠాపురం టికెట్ ఆయన్నే వరించొచ్చన్న భావన, వంగా గీతను మౌనంలోకి నెట్టింది. ఇలా చూస్తే, ప్రస్తుతం పిఠాపురంలో వైసీపీకి నాయకత్వం స్పష్టంగా కనిపించకపోవడం, కార్యకర్తల్లో ఆత్మవిశ్వాసాన్ని తగ్గిస్తోంది. ఓ వైపు పవన్ కళ్యాణ్ క్రేజ్ దూసుకుపోతుండగా, మరోవైపు వంగా గీత వంటి నాయకులు వెనుకబడిపోతున్నారు. ఇది పార్టీకి భవిష్యత్తులో ఎన్నికల సమయంలో తీవ్రంగా నష్టాన్ని కలిగించే అంశంగా రాజకీయ పరిశీలకులు చెబుతున్నారు. ఇకపై వంగా గీత చిత్తశుద్ధితో తిరిగి రాజకీయ రంగంలోకి అడుగుపెడతారా? లేక పార్టీ వేరే నేతను రంగంలోకి దించి పోటీ చేయిస్తుందా? అన్నది ఆసక్తికరమైన అంశంగా మారింది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి