నిమిష ప్రియ కేరళకు చెందిన ఒక భారతీయ నర్సు కాగా ఆమె 2017లో యెమెన్‌లో తన వ్యాపార భాగస్వామి అయిన తలాల్ అబ్దో మహ్దీని హత్య చేసిన కేసులో దోషిగా తేలింది. తలాల్ మహ్దీ తన పాస్‌పోర్టును అక్రమంగా తన వద్ద ఉంచుకొని, ఆమెను వేధించాడని, దాంతో తన పాస్‌పోర్టును తిరిగి పొందే ప్రయత్నంలో అతనికి మత్తుమందు ఇచ్చిందని, అయితే అది అధిక మోతాదు కావడంతో మరణించాడని విచారణలో వెల్లడైంది.
2020లో ట్రయల్ కోర్టు ఆమెకు మరణశిక్ష విధించగా, 2023లో యెమెన్ సుప్రీం జ్యుడీషియల్ కౌన్సిల్ ఈ శిక్షను సమర్థించింది. నిమిష ప్రియకు జూలై 16న ఉరిశిక్ష అమలు చేయాల్సి ఉండగా, దాన్ని వాయిదా వేశారు. ఇస్లామిక్ షరియా చట్టం ప్రకారం, "బ్లడ్ మనీ" (దియా) చెల్లించడం ద్వారా బాధితుడి కుటుంబం క్షమించి, శిక్షను రద్దు చేసే అవకాశం ఉంది. ఈ దిశగా భారత ప్రభుత్వం, పలు సంస్థలు, మత పెద్దలు కృషి చేసినా ఆశించిన ఫలితాలు రాలేదు.
తాజా సమాచారం ప్రకారం, గ్రాండ్ ముఫ్తీ కార్యాలయం మరణశిక్ష రద్దు అయినట్లు ప్రకటించినప్పటికీ, బాధితుడి కుటుంబంతో "బ్లడ్ మనీ" కి సంబంధించిన చర్చలు ఇంకా జరుగుతున్నట్లు తెలుస్తోంది. నిమిష ప్రియ జైలు నుంచి విడుదలవుతారా లేక ఆమెకు జీవిత ఖైదు విధిస్తారా అనే చర్చ సైతం జరుగుతోంది. బాధితుడి కుటుంబం నిర్ణయం ఆధారంగా తదుపరి నిర్ణయాలు ఉండనున్నాయని సమాచారం అందుతోంది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి