“393” నెంబర్‌ ఉన్న ఆ అంబాసిడర్ కారు అప్పట్లో ఉమ్మడి ఆంధ్రప్రదేశ్ రాజధాని హైదరాబాద్ వీధుల్లో దర్జాగా దూసుకుపోయేది. యంగ్ అండ్ డైనమిక్ చీఫ్ మినిస్టర్‌గా ఉన్న చంద్రబాబు రాష్ట్ర వ్యాప్తంగా పర్యటించిన ప్రతి అడుగులోనూ ఆ కారు సాక్షిగా నిలిచింది. ప్రజా సమస్యల పరిష్కారానికి ఎక్కడికైనా వెళ్లాల్సి వస్తే, మొదటగా బయలుదేరేది ఆ 393 అంబాసిడర్‌నే! ఆ కాలంలో ఆ కారు అంటేనే చంద్రబాబు సింబల్‌ లా మారిపోయింది. ఆయన కాన్వాయ్‌లో ముందుండే ఆ అంబాసిడర్ ను చూసిన ప్రజలు “బాబు వచ్చారు!” అని ఆనందంగా కేకలు వేస్తుండేవారు. వేల కిలోమీటర్లు ప్రయాణించిన ఆ వాహనం బాబుతో కలిసి ఎన్నో చారిత్రాత్మక నిర్ణయాలకు, అభివృద్ధి యాత్రలకు భాగస్వామ్యమైంది. అలా ఆ కారుతో బాబుకు ఏర్పడిన అనుబంధం నేటికీ ఆయన మదిలో సజీవంగానే ఉంది.
ఇప్పటి రోజుల్లో కాలం మారింది. భద్రతా కారణాల వల్ల ఆధునిక బుల్లెట్‌ ప్రూఫ్‌ వాహనాల్లో బాబు ప్రయాణిస్తున్నారు. కానీ ఆయన మనసులో మాత్రం ఆ పాత 393 అంబాసిడర్‌కే ప్రత్యేక స్థానం ఉంది. చాలాకాలంగా హైదరాబాదులో పార్టీ ఆఫీసులో ఉంచిన ఆ కారును ఆయన ఇటీవలే అమరావతికి తెప్పించారు. తెలుగు దేశం పార్టీ కేంద్ర కార్యాలయం వద్ద శనివారం ఆ కారును చూసిన బాబు క్షణం పాటు ఆగిపోయారు. కారును చుట్టూ తిరిగి చూశారు. కాసేపు మౌనంగా ఆ జ్ఞాపకాలలో మునిగిపోయారు. ఆ సమయంలో తనతో ఉన్న నాయకులకు బాబు ఆ కారు గురించి, అప్పటి జ్ఞాపకాల గురించి చెప్పుకుంటూ ముచ్చటపడ్డారు. “ఇది నా మొదటి అధికారిక కారు. ఎన్నో సవాళ్లు, ఎన్నో విజయాలు… ఇవన్నీ ఈ 393 అంబాసిడర్ సాక్షిగా చూశాయి” అని చెప్పినట్లు తెలుస్తోంది. ఇప్పుడు ఆ అంబాసిడర్ కారు మంగళగిరిలోని టీడీపీ కేంద్ర కార్యాలయంలో శాశ్వత స్థానం దక్కించుకుంది. చంద్రబాబు స్వయంగా దానిని అక్కడే ఉంచాలని ఆదేశించారు. బాబుకు ఇది కేవలం ఒక వాహనం కాదు – ఆయన రాజకీయ ప్రయాణానికి, కృషికి ప్రతీక. అందుకే ఆ 393 అంబాసిడర్ ఆయన మదిని ఇప్పటికీ దోచుకుంటూనే ఉంది!
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి