శ్రావణ మాసం వచ్చిందంటే చాలు ప్రతి ఇల్లు కూడా కళకళ లాడిపోతుంది. శ్రావణ మాసంలో శుక్రవారంకు ఉన్న ప్రాముఖ్యత గురించి ప్రత్యేకంగా చెప్పనవసరం లేదు. శ్రావణ మాసంలోనే ఎలాంటి శుభకార్యాలు అయినా మొదలుపెడతారు. శ్రావణ మాసం నెల రోజుల పాటు ఉంటుంది. ఈ నెల రోజులు ప్రతి ఇంటిలో భగవంతుని నామ స్మరణ వినిపిస్తూనే ఉంటుంది.అసలు ఈ మాసానికి శ్రావణ మాసం అని పేరు ఎలా వచ్చిందంటే...  పౌర్ణమినాడు చంద్రుడు శ్రావణ నక్షత్రంలో సంచరించడం వలన ఈ మాసాన్ని  శ్రావణమాసం అని పిలుస్తారు. శ్రావణ మాసంలోనే వర్ష రుతువు ప్రారంభమవుతుంది. ఈ మాసం మహాలక్ష్మికి అత్యంత ప్రీతికరమైన మాసం.ఈ శ్రావణమాసంలో వివిధరకాల పూజలు , వ్రతాలు ఆచరించడం వల్ల సకల అష్ట ఐశ్వర్యాలు కలుగుతాయి.అయితే శ్రావణ మాసంలో ఎలాంటి పూజలు, ఎలాంటి వ్రతాలు చేస్తే మంచిదో తెలుసుకోండి.

శ్రావణ మాసంలో వచ్చే సోమవారం శివన్నిపూజించడానికి  అత్యంత విశిష్టకరమైన రోజు.శ్రావణ మాసంలో వచ్చే సోమవారాలు శివునికి అత్యంత భక్తి శ్రద్దలతో పూజ చేసి పగలంతా ఉపవాసం ఉండి రాత్రి వేళలో స్వామివారికి రుద్రాభిషేకాలు , బిల్వార్చనలు చేస్తే ఎంతో మంచిదని శాస్త్రాలు చెబుతున్నాయి.అలాగే ఈ శ్రావణ మాసంలో మంగళవారం రోజున స్త్రీలు అత్యంత భక్తి శ్రద్ధలతో మంగళ గౌరీ వ్రతం చేస్తే కుటుంబానికి చాలా మంచిది.ఈ వ్రతాన్ని శ్రావణ మంగళవార వ్రతం అనీ , మంగళగౌరీ నోము అని కూడా పిలుస్తుంటారు. ఈ మంగళగౌరీ వ్రతాన్ని కొత్తగా పెళ్లి అయిన వారు ఆచరించాలి. శ్రావణమాసంలో వచ్చే అన్ని మంగళవారాలు క్రమం తప్పకుండా ఈ వ్రతాన్ని ఆచరించాలి. ఈ వ్రతాన్ని ఆచరించిన వారు నిండు నూరేళ్లు సుమంగళిగా జీవిస్తూ,  వారి కుటుంబంలో సుఖశాంతులు, అష్ట ఐశ్వర్యాలు వెల్లువెత్తుతాయి.


 అలాగే శ్రావణ మాసంలో చేసే వ్రతాల్లో వరలక్ష్మీ వ్రతంకు ఎంతో ప్రాధాన్యత ఉంది శ్రావణమాసంలో పూర్ణిమకు ముందు వచ్చే శుక్రవారం రోజున ఈ వ్రతం చేయాలి. ఆ రోజు కుదరకపోతే మరొక  శుక్రవారమైనా ఈ వ్రతం చేయాలి. చక్కగా పొద్దునే లేచి, తలకు స్నానం చేసి ఇల్లు, పూజ మందిరం శుభ్రం చేసి పూజ మండపంలో నిండు కలశాన్ని ఏర్పాటు చేయాలి. ఆ కలశానికి వరలక్ష్మీ దేవి ముఖప్రతిమను అలంకరించి భక్తి శ్రద్దలతో పూజ చేయాలి. తర్వాత తొమ్మిది ముడులతో తోరణాన్ని తయారు చేసి ఆ కంకణంను చేతికి కట్టుకోవాలి.ఆ తరువాత వచ్చిన ముత్తయిదువులకు వాయినాలు ఇచ్చి వాళ్ళ ఆశ్వీరాదాలు తీసుకోవాలి.