జీవితంలో ఏ పనిలోనైనా విజయం సులభంగా ఎవరికీ సొంతం కాదు. కష్టపడితేనే విజయం సొంతమవుతుంది. ఎవరైనా సులభంగా విజయం సాధించినా అది ఎన్నాళ్లో ఉండదు. ఆ విజయాన్ని నిలుపుకునే శక్తి వారిలో ఉండదు. జీవితంలో నిజమైన విజయాన్ని సొంతం చేసుకోవాలంటే జీవితం ఎలా ఉందో దాన్ని అలాగే చూడగలగాలి. ఎన్నుకున్న మార్గంలో సక్సెస్ కావాలంటే విజయాలను సాధించిన వ్యక్తుల జీవితాల నుంచి మంచి విషయాలను స్వీకరించాలి.
వారి మార్గ నిర్దేశకత్వంలో ముందడుగులు వేస్తూ విజయాన్ని సొంతం చేసుకోవాలి. కొన్ని సూత్రాలను పాటించడం ద్వారా ఏ పనిలోనైనా విజయాన్ని సులభంగా సొంతం చేసుకునే అవకాశం ఉంటుంది. జీవితంలో సక్సెస్ కావాలంటే మీకంటూ ఒక లక్ష్యం ఉండాలి. ఆ లక్ష్యాన్ని సాధించి గమ్య స్థానానికి చేరుకోవాలి. మనకంటూ ఒక లక్ష్యం లేకపోతే పరిస్థితులకు అనుగుణంగా బలిపశువులా మారిపోయే అవకాశం ఉంటుంది.
లక్ష్యాన్ని సాధించేందుకు అవసరమైన విజ్ఞానాన్ని మనం సంపాదించుకోవాలి. విద్యాభ్యాసం అంటే పుస్తకాలు మాత్రమే కాదు. వ్యక్తిత్వ అభివృద్ధి, నాయకత్వం, అనుభవం, పరిచయాలు, అనుబంధాల ద్వారా కూడా మనం జ్ఞానాన్ని సంపాదించుకోవచ్చు. మంచి ఆరోగ్యం ఉండేలా ఎల్లప్పుడూ జాగ్రత్తలు తీసుకోవాలి. ఆరోగ్యంగా ఉంటేనే ఏ పనిలోనైనా విజయం సాధించడం సాధ్యమవుతుంది.
విజయం సాధించడానికి చురుకుదనం కూడా చాలా ముఖ్యం. చురుకుదనం మనతో పాటు మన చుట్టూ ఉండే వారిలో కూడా ఆసక్తిని కలిగిస్తుంది. విజయం సాధించడంలో సమయస్పూర్తి ఎంతో కీలక పాత్ర పోషిస్తుంది. సమయస్పూర్తి ఉన్నవాళ్లు ఏ సందర్భంలోనైనా ఎలాంటి సమస్యనైనా సులువుగా పరిష్కరించుకోగలరు. సాధించాల్సిన విజయంపై ఎక్కువ విశ్వాసం, పట్టుదల కలిగి ఉంటే విజయం సులభంగా సొంతమవుతుంది. పట్టుదల సడలకుండా తీవ్రంగా శ్రమిస్తే విజయం ముంగిట వాలుతుంది.
