ప్రముఖ అస్సామీస్ చిత్రం ‘విలేజ్ రాక్స్టార్స్ ఆస్కార్స్’ 2018 జాబితాలో స్థానం సంపాదించలేకపొయింది. ఉత్తమ విదేశీ చిత్ర కేటగిరిలో ఎంపికైన ఈ చిత్రం తర్వాత జరిగే రౌండ్స్లో స్థానం కోల్పోవాల్సివచ్చింది. ఈ విషయాన్ని స్వయంగా ఆస్కార్స్ తన అధికారిక వెబ్స్సైట్ ద్వారా ప్రకటించింది. 2017లో విడుదలైన ఈ చిత్రాన్ని రీమా దాస్ తెరకెక్కించారు. తక్కువ బడ్జెట్తో తెరకెక్కించిన ఈ చిత్రం విమర్శకుల ప్రశంసలు సైతం అందుకుంది.
తన స్వస్థలమైన అస్సోంలోని చైగావ్ గ్రామంలోనే రీమా దాస్ ఈ చిత్రాన్ని తెరకెక్కించడం విశేషం. ఫిల్మ్ ఫెడరేషన్ ఆఫ్ ఇండియా ఈ చిత్రాన్ని ఆస్కార్స్కు ఎంపిక చేసింది. పేద చిన్నారులు బాధలను ఓర్చుకుంటూ తమ జీవితాలను ఎలా సంతోషంగా మలుచుకున్నారో అన్నది ఈ చిత్రం నేపథ్యం. విలేజ్ రాక్స్టార్స్కు అంతర్జాతీయంగా గుర్తింపు వచ్చింది.
టొరంటోలో జరిగిన వరల్డ్ ప్రీమియర్లో ప్రశంసలు అందుకున్నది. ముంబై ఫిల్మ్ ఫెస్టివల్లోనూ దీన్ని ప్రదర్శించారు. 65వ జాతీయ పురస్కారాల్లోనూ బెస్ట్ ఫీచర్ ఫిల్మ్ అవార్డును గెలుచుకున్నది. 2019 జనవరి 22న ఏ చిత్రాలు నామినేట్ అయ్యాయనేది ఆస్కార్స్ ప్రకటిస్తుంది. ఫిబ్రవరి 24న 91వ ఆస్కార్స్ వేడుక అట్టహాసంగా జరగబోతుంది.