കേരളത്തിന്റെ ഭരണനേട്ടങ്ങൾ എണ്ണിപ്പറഞ്ഞ് പിണറായി സർക്കാർ! പ്രധാന ഭരണ നേട്ടങ്ങൾ മാത്രം ചുരുങ്ങിയ രീതിയിൽ ഉൾക്കൊള്ളിച്ചു കൊണ്ട് രണ്ട് പേജുകളിലായി പുറത്തിറക്കിയ ലഘുലേഖയ്ക്ക് പുറമെ ഒന്നും രണ്ടും പിണറായി സർക്കാരുകളുടെ നേട്ടങ്ങളുമായി ബന്ധപ്പെട്ട സമഗ്ര വിവരങ്ങൾ അടങ്ങിയ 108 പേജുള്ള ബുക്കും പ്രസിദ്ധീകരിച്ചിട്ടുണ്ട്. മലയാളത്തിന് പുറമെ ഇംഗ്ലീഷിലും വിവരങ്ങൾ ലഭ്യമാക്കിയിട്ടുണ്ട്. രണ്ടാം പിണറായി സർക്കാരിൻറെ നാലാം വാർഷികാഘോഷങ്ങൾക്ക് തിങ്കളാഴ്ച (ഏപ്രിൽ 21) കാസർഗോഡ് നിന്നും തുടക്കമിടാനിരിക്കവേ കഴിഞ്ഞകാല ഭരണനേട്ടങ്ങൾ എണ്ണിപ്പറഞ്ഞു കൊണ്ടുള്ള ലഘുലേഖ പിആർഡി വകുപ്പ് പുറത്തിറക്കി. ഏപ്രിൽ 21 മുതൽ മെയ് 30 വരെയുള്ള കാലയളവിൽ സംസ്ഥാനത്തുടന്നീളം വിപുലമായ പരിപാടികളോടെയാണ് രണ്ടാം പിണറായി സർക്കാരിന്റെ നാലാം വാർഷികാഘോഷ പരിപാടികൾ ആസൂത്രണം ചെയ്തിട്ടുള്ളത്.
ഇതിൽ സർക്കാരിന്റെ നാലാം വാർഷികാഘോഷത്തിന്റെയും എന്റെ കേരളം പ്രദർശന വിപണന മേളയുടെയും സംസ്ഥാനതല ഉദ്ഘാടനം ഏപ്രിൽ 21-ന് കാസർഗോഡ് ജില്ലയിലെ കാലിക്കടവ് മൈതാനത്ത് വെച്ച് നടക്കും. നാലാം വാർഷികാഘോഷത്തിൻറെ ഭാഗമായി മുഖ്യമന്ത്രി എല്ലാ ജില്ലകളിലും തെരഞ്ഞെടുക്കപ്പെട്ട പ്രമുഖരുമായി ആശയവിനിമയം നടത്തും. എല്ലാ ജില്ലകളിലും പ്രദർശന വിപണന മേളകളും സംഘടിപ്പിക്കുന്നുണ്ട്. തിരുവനന്തപുരത്താണ് വാർഷികാഘോഷ പരിപാടിയുടെ സമാപനം. സാമൂഹ്യനീതിയും സാമ്പത്തിക പുരോഗതിയും ഉറപ്പുവരുത്തി വികസിത രാജ്യങ്ങളിലേതിന് സമാനമായ നിലവാരത്തിലേക്ക് കേരളത്തെയും ഉയർത്തുകയെന്ന ലക്ഷ്യമാണ് എൽഡിഎഫ് സർക്കാർ ഏറ്റെടുത്തിട്ടുള്ളതെന്ന് മുഖ്യമന്ത്രി പിണറായി വിജയൻ. നാടിനെ വിഭജിക്കാൻ ശ്രമിക്കുന്ന വർഗീയ ശക്തികളെ ഒറ്റക്കെട്ടായി ചെറുത്തുകൊണ്ട് നവകേരളത്തിനായി നമുക്ക് ഒരുമിച്ചു മുന്നേറാമെന്നും അദ്ദേഹം കൂട്ടിച്ചേർത്തു.
രണ്ടാം പിണറായി സർക്കാരിന്റെ നാലാം വാർഷികാഘോഷങ്ങളെ സൂചിപ്പിച്ചുള്ള ഫേസ്ബുക്ക് കുറിപ്പിലൂടെയായിരുന്നു മുഖ്യമന്ത്രിയുടെ പ്രതികരണം. പ്രധാന നേട്ടങ്ങളായി സർക്കാർ പറയുന്നത്. രാജ്യത്ത് നടക്കുന്ന മൊത്തം പിഎസ്സി നിയമനങ്ങളുടെ 66 ശതമാനവും കേരളത്തിൽ (കഴിഞ്ഞ 9 വർഷത്തെ എൽഡിഎഫ് സർക്കാരിന്റെ കാലയളവിൽ 2,76,062 നിയമന ശുപാർശകൾ).
സർക്കാർ മേഖലയിൽ പതിനായിരത്തിലധികം പുതിയ തസ്തികകൾ സൃഷ്ടിച്ചു.
വിഴിഞ്ഞം അന്താരാഷ്ട്ര തുറമുഖം പ്രവർത്തന സജ്ജമാക്കി.
പൊതുജനങ്ങൾക്ക് ഏറ്റവും കൂടുതൽ സൗജന്യ ചികിത്സ നൽകുന്ന സംസ്ഥാനം.
സർക്കാരുമായി ബന്ധപ്പെട്ട ഇ-സേവനങ്ങൾ എല്ലാവരിലേക്കും എത്തിച്ചു.
സമഗ്ര ഭൂവിവരം ഡിജിറ്റൽ സംവിധാനത്തിൽ ലഭ്യമാക്കി, രാജ്യത്ത് ഈ നേട്ടം സ്വന്തമാക്കുന്ന പ്രഥമ സംസ്ഥാനം.
കഴിഞ്ഞ എട്ട് വർഷത്തിനിടെ 3,57,898 പട്ടയങ്ങൾ വിതരണം ചെയ്തു.
നോർക്ക വഴി 4,000-ത്തോളം റിക്രൂട്ട്മെന്റുകൾ.
2,378 യുവ പ്രൊഫഷണലുകൾക്ക് വിദേശ ജോലിക്കുള്ള വഴിതുറന്നു.
ഐഎസ്ആർഒയുമായി സഹകരിച്ച് ശാസ്ത്രസാങ്കേതിക മേഖലയിൽ കൂടുതൽ വികസന പ്രവർത്തനങ്ങൾ.
വ്യവസായ സൗഹൃദ കേരളം.
സംരഭക രംഗത്ത് കുതിച്ചുചാട്ടം.
ദാരിദ്ര്യ രഹിത കേരളം.
മാലിന്യമുക്ത കേരളം. വിഴിഞ്ഞം തുറമുഖവും പിഎസ്സി നിയമനങ്ങളുമാണ് നേട്ടങ്ങളുടെ മുൻനിരയിൽ ഇടംപിടിച്ചിട്ടുള്ളത്. എല്ലാ മന്ത്രിമാരുടെയും ചിത്രങ്ങൾ സഹിതമാണ് ലഘുലേഖ അവതരിപ്പിച്ചിട്ടുള്ളത്.
Find out more:
click and follow Indiaherald WhatsApp channel