തിരുവനന്തപുരം - ബെംഗളൂരു വന്ദേ ഭാരത് സ്ലീപ്പർ ട്രെയിൻ ഉടൻ വരുന്നു! തിരുവനന്തപുരം നോർത്ത് - ബെംഗളൂരു എസ്എംവിടി റൂട്ടിൽ വന്ദേ ഭാരത് സ്ലീപ്പർ ട്രെയിൻ അനുവദിക്കുന്ന കാര്യത്തിൽ രേഖാമൂലം ഉറപ്പ് ലഭിച്ചു. വൈകീട്ട് 07:30ന് തിരുവനന്തപുരത്ത് നിന്ന് പുപ്പെട്ട്, പിറ്റേന്ന് രാവിലെയോടെ ബെംഗളൂരുവിലെത്തുന്ന സർവീസാണ് വരാൻ പോകുന്നത്.
പുതിയ വന്ദേ ഭാരത് സ്ലീപ്പർ ട്രെയിൻ സർവീസ് സംബന്ധിച്ച് അനുകൂല നിലപാട് സ്വീകരിച്ച് ദക്ഷിണ റെയിൽവേ ജനറൽ മാനേജരുടെ രേഖാമൂലമുള്ള ഉറപ്പ് ലഭിച്ചതായി . കൊടിക്കുന്നിൽ സുരേഷ് എംപി അറിയിച്ചു. മലയാളികളുടെ കാലങ്ങളായുള്ള കാത്തിരിപ്പാണ് തിരുവനന്തപുരത്ത് നിന്ന് ആരംഭിച്ച് എറണാകുളം പാലക്കാട് വഴിയുള്ള വന്ദേ ഭാരത് സർവീസ്. നേരത്തെ വന്ദേ ഭാരത് ട്രെയിൻ കൊണ്ടുവരാനാണ് ശ്രമിച്ചതെങ്കിൽ സ്ലീപ്പർ ട്രെയിൻ ഇറങ്ങിയതോടെ അതിനായി കേരളം ആവശ്യപ്പെടുകയായിരുന്നു.കാത്തിരിപ്പുകൾക്കൊടുവിൽ തിരുവനന്തപുരം - ബെംഗളൂരു വന്ദേ ഭാരത് സ്ലീപ്പർ ട്രെയിൻ സർവീസിൽ സ്ഥിരീകരണം.
തിരുവനന്തപുരത്തിനും ബെംഗളൂരുവിനും ഇടയിൽ രാത്രികാല വന്ദേ ഭാരത് സ്ലീപ്പർ ട്രെയിൻ യാഥാർഥ്യമാകുന്നതോടുകൂടി ബെംഗളൂരുവിൽ പഠനാവശ്യത്തിനും തൊഴിലിനുമായി പോകുന്ന ആയിരക്കണക്കിന് മലയാളികൾക്ക് ഇത് പ്രയോജനപ്പെടും. ട്രെയിൻ എത്രയും വേഗം യാഥാർഥ്യമാകുന്നതിനായി ഈ മാസം അവസാനം റെയിൽവേ മന്ത്രി വിളിച്ചു ചേർത്തിട്ടുള്ള കേന്ദ്ര റെയിൽവേ കൺസൾട്ടേറ്റീവ് കമ്മിറ്റി യോഗത്തിലും ആവശ്യം ഉന്നയിക്കുമെന്ന് കൊടിക്കുന്നിൽ സുരേഷ് എംപി പറഞ്ഞു. തിരുവനന്തപുരം നോർത്തിൽ നിന്നും സർവീസ് ആരംഭിച്ച് ബാംഗ്ലൂർ വിശ്വേശ്വരയ്യാ ടെർമിനലിൽ സർവീസ് അവസാനിപ്പിക്കുന്ന തരത്തിലാകും വന്ദേ ഭാരത് സ്ലീപ്പറിൻ്റെ സർവീസ് എന്ന് കൊടിക്കുന്നിൽ സുരേഷ് എംപി പറഞ്ഞു.
വൈകുന്നേരം 7:30ന് തിരുവനന്തപുരം നോർത്തിൽ നിന്നും സർവീസ് ആരംഭിക്കുന്ന സെമി ഹൈസ്പീഡ് ട്രെയിൻ കോട്ടയം വഴി ബാംഗ്ലൂരിൽ എത്തിച്ചേരുന്ന തരത്തിലാണ് സമയക്രമം റെയിൽവേ ബോർഡിലേക്ക് അന്തിമംഗീകരത്തിനായി സമർപ്പിച്ചിട്ടുള്ളത്.നേരത്ത എറണാകുളത്ത് നിന്ന് ബെംഗളൂരുവിലേക്ക് നടത്തിയ വന്ദേ ഭാരത് സ്പെഷ്യൽ ട്രെയിൻ സർവീസിന് മികച്ച പ്രതികരണം ലഭിച്ചിരുന്നു. സമയക്രമത്തിലെ അപാകത മൂലം ബെംഗളൂരു - എറണാകുളം സർവീസിന് താരതമ്യേന ആളുകൾ കുറവായിരുന്നു. എന്നാൽ ഈ സർവീസ് നീട്ടാനോ, സ്ഥിരപ്പെടുത്താനോ റെയിൽവേ തയ്യാറായിരുന്നില്ല.
നേരത്തെ റെയിൽവേ മന്ത്രിയുമായുള്ള കൂടിക്കാഴ്ചയിലും ദക്ഷിണ റെയിൽവേ ജനറൽ മാനേജർ വിളിച്ചുചേർത്ത എംപിമാരുടെ യോഗത്തിലും ബെംഗളൂരു വന്ദേ ഭാരത് സ്ലീപ്പർ പരിഗണിക്കുമെന്ന ഉറപ്പ് ലഭിച്ചിരുന്നു. ഇതിന് പിന്നാലെയാണ് രേഖാമൂലം ഉറപ്പ് ലഭിച്ചെന്ന എംപിയുടെ വാക്കുകൾ. കോട്ടയം വഴിയാണ് വന്ദേ ഭാരത് സ്ലീപ്പർ പരിഗണിക്കുന്നതെന്നും ഇതിലൂടെ വ്യക്തമായിട്ടുണ്ട്.
Find out more:
click and follow Indiaherald WhatsApp channel