గుంటూరు జిల్లా పొన్నూరు నియోజకవర్గం, మన్నవ గ్రామంలో పట్టపగలు నడిరోడ్డుపై జరిగిన అరాచకం ఇది. మొదటి నుంచి వైసీపీకి బలమైన గొంతుకగా ఉన్న దళిత మాజీ సర్పంచ్ పునుగంటి నాగమల్లేశ్వరరావుపై ప్రత్యర్థులు దాడికి తెగబడ్డారు. ప్రాణాలు తీసేందుకు జరిగిన ఈ పాశవిక దాడికి సంబంధించిన వీడియో దృశ్యాలు చూస్తే ఒళ్లు గగుర్పొడవడం ఖాయం. నాగమల్లేశ్వరరావు కుటుంబానికి ప్రజల్లో ఉన్న ఆదరణను, వైసీపీకి ఆయన అండగా నిలవడాన్ని జీర్ణించుకోలేని స్థానిక టీడీపీ శ్రేణులు ఈ దారుణానికి ఒడిగట్టాయని జగన్ ఆరోపించారు. స్థానిక ఎమ్మెల్యే అండతోనే ఈ కుట్ర జరిగిందని, ఇది ముమ్మాటికీ రాజకీయ ప్రేరేపిత హత్యాయత్నమేనని ఆయన స్పష్టం చేశారు.
రాష్ట్రంలో లా అండ్ ఆర్డర్ అనేదే లేదని జగన్ ధ్వజమెత్తారు. వైసీపీ నాయకులు, కార్యకర్తలే లక్ష్యంగా ఒక పథకం ప్రకారం తప్పుడు కేసులు బనాయిస్తున్నారని, అది చాలదన్నట్లు ఇప్పుడు ఏకంగా భౌతిక దాడులకు పురిగొల్పుతున్నారని మండిపడ్డారు. చంద్రబాబు స్వయంగా ఈ దాడులను ప్రోత్సహిస్తున్నారని, ఆయన మాఫియా తరహా పాలనతో రాష్ట్రాన్ని రక్తసిక్తం చేస్తున్నారని తీవ్ర ఆరోపణలు చేశారు. పౌరుల ప్రాణాలకే గ్యారెంటీ లేనప్పుడు, చంద్రబాబుకు ముఖ్యమంత్రి పీఠంపై కూర్చునే నైతిక హక్కే లేదని జగన్ తీవ్ర స్వరంతో విమర్శించారు. రాజ్యాంగాన్ని, చట్టాన్ని కాపాడలేని ఈ ప్రభుత్వానికి అధికారంలో కొనసాగే అర్హత లేదని కుండబద్దలు కొట్టారు.
ఈ రాజకీయ దుమారం మధ్యలోనే, దాడిలో తీవ్రంగా గాయపడి ఆసుపత్రిలో చికిత్స పొందుతున్న నాగమల్లేశ్వరరావు ఆరోగ్య పరిస్థితిని జగన్ స్వయంగా అడిగి తెలుసుకున్నారు. ఆయన కుటుంబానికి అండగా ఉంటామని భరోసా ఇచ్చారు. ఈ ఘటనతో అధికార, ప్రతిపక్షాల మధ్య మాటల యుద్ధం తారాస్థాయికి చేరి, ఏపీ రాజకీయాలు మరింత వేడెక్కాయి. రాష్ట్రపతి పాలన డిమాండ్‌తో జగన్ చేసిన వ్యాఖ్యలు జాతీయ స్థాయిలో చర్చనీయాంశంగా మారాయి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి