ప్రాథమిక విచారణలో దీపక్ యాదవ్ తన కూతురు స్వతంత్రంగా జీవితాన్ని సాగించడం, ఆర్థికంగా బలపడటం, సొంతంగా టెన్నిస్ అకాడమీ నడపడం పట్ల అసంతృప్తితో ఉన్నాడని వెల్లడైంది. రాధిక ఇన్‌స్టాగ్రామ్, మ్యూజిక్ వీడియోలు, సోషల్ మీడియాలో యాక్టివ్‌గా ఉండేది. ఆమె ఆదాయాన్ని చూసి గ్రామంలో కొందరు "తండ్రి కూతురు డబ్బుతో బతుకుతున్నాడు" అని అవమానించారు. దీన్ని మానసికంగా భరించలేని దీపక్ – ఆగ్రహావేశానికి లోనై కూతురి మీద తుపాకీ పట్టాడు. రాధిక తన టెన్నిస్ అకాడమీ మూసివేయాలన్న తండ్రి మాటకు ఒప్పుకోకపోవడంతో ఈ ఘోరమైన చర్యకు పాల్పడ్డాడు.
సెక్టార్ 56 పోలీస్ స్టేషన్ పరిధిలో కేసు నమోదైంది. నిందితుడైన దీపక్ యాదవ్‌ను అరెస్ట్ చేసి, హత్యకు ఉపయోగించిన తుపాకీ, బుల్లెట్లు, రక్త నమూనాలు, వేలిముద్రలు స్వాధీనం చేసుకున్నారు. భారతీయ శిక్షా నియమావళి సెక్షన్ 103(1) మరియు ఆయుధ చట్టం ప్రకారం కేసు నమోదు చేశారు. 2000 మార్చి 23న జన్మించిన రాధికా, హర్యానాలో ఐదోస్థానంలో ఉన్న మహిళల డబుల్స్ క్రీడాకారిణిగా గుర్తింపు పొందింది. అంతర్జాతీయ టెన్నిస్ సమాఖ్య (ITF) డబుల్స్‌లో ఆమెకు 113 ర్యాంక్ ఉంది. ఒక గాయం తర్వాత ఆమె ఆటను వదిలిపెట్టి, యువ క్రీడాకారులకు శిక్షణ ఇచ్చే టెన్నిస్ అకాడమీ స్థాపించింది. తల్లి మంజు యాదవ్ స్పందన .. నేను జ్వరం కారణంగా నా గదిలో విశ్రాంతి తీసుకుంటున్న సమయంలో కాల్పుల శబ్దం వినిపించింది. మా మధ్య ఎలాంటి పెద్ద గొడవలు లేవు. రాధిక మంచి మనసున్న అమ్మాయి. మాకు ఎప్పుడూ చెడ్డపేరు తీసుకురాలేదు."
దేశవ్యాప్తంగా స్పందన .. టెన్నిస్ క్రీడాకారులు , మహిళా సంఘాలు, సామాజిక ఉద్యమ కార్యకర్తలు - అందరూ ఈ ఘటనపై తీవ్ర ఆగ్రహాన్ని వ్యక్తం చేస్తున్నారు. పలువురు పితృస్వామ్య భావజాలం , మహిళల ఆర్థిక స్వేచ్ఛపై సామాజిక అణచివేత అంశాలను ప్రస్తావిస్తున్నారు. “ఆర్థికంగా స్వతంత్రమైన అమ్మాయిలను కూడా తండ్రులే భయపెడుతున్నారు” అనే వ్యాఖ్యలు నెట్టింట వైరల్ అయ్యాయి. రాధిక హత్య ఒక్క కుటుంబ సంఘటనగా కాక, నేటి సమాజంలో మహిళల స్వేచ్ఛపై నడుస్తున్న అణచివేతకు ఓ పెద్ద ఉదాహరణగా మారింది. ఇందులో న్యాయపరమైన చర్యలతో పాటు, సామాజిక అవగాహన పెంపుదల అత్యవసరం.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి