എനിക്കിപ്പോൾ മക്കൾ അഞ്ചാണ്; കുടുംബ വിശേഷങ്ങളുമായി ബിനു അടിമാലി! ബിനുവിനൊപ്പം കൗണ്ടറടിച്ച് നിൽക്കാൻ വലിയ പ്രയാസമാണ്. സ്റ്റാർ മാജിക് ഷോയിലുള്ളവർക്ക് ഇപ്പോൾ അത് ശീലമായി. തമാശ പറയുന്നത് മറ്റുള്ളവരെ വേദനിപ്പിക്കാനല്ല, ചിരിപ്പിക്കാനുള്ള ശ്രമത്തിന്റെ ഭാഗമാണ്. അത് മറ്റുള്ളവർക്ക് വേദനിച്ചു എന്ന് പറഞ്ഞ് നെഗറ്റീവ് പറയുമ്പോൾ സങ്കടം വരാറുണ്ട് എന്ന് ബിനു അടിമാലി പറയുന്നു. ബിഹൈന്റ് വുഡിന് നൽകിയ അഭിമുഖത്തിൽ സംസാരിക്കുകയായിരുന്നു നടൻ. ഹോം ടൂർ സെഗ്മെന്റിൽ തന്റെ വീട്ടിലെ വിശേഷവും പങ്കുവയ്ക്കുകയുണ്ടായി. കോമഡിയുടേതല്ല, കൗണ്ടറുകളുടെ രാജാവ് എന്നാണ് ബിനു അടിമാലി അറിയപ്പെടുന്നത്. അടിമാലിക്കാരനായ ബിനു ഇപ്പോൾ കുടുംബത്തോടൊപ്പം ആലുവയിലാണ് താമസം. ഷൂട്ടിങ് ആവശ്യങ്ങൾക്കും, പ്രോഗ്രാമുകൾക്കും ഒക്കെ ഇതാണ് സൗകര്യം എന്ന് നടൻ പറയുന്നു. ഇപ്പോൾ ആലുവയിലേക്ക് മാറിയിട്ട് രണ്ടു വർഷമായി. സമയം കിട്ടുമ്പോഴൊക്കെ അടിമാലിയിലേക്ക് പോകാറുണ്ട്.
കുടുംബത്തിനും, സുഹൃത്തുക്കൾക്കും ഒപ്പം ചെലവഴിയ്ക്കുന്ന സമയം എല്ലാം വളരെ സന്തോഷം നൽകുന്നതാണെന്ന് ബിനു അടിമാലി പറയുന്നു. വിദേശത്തൊക്കെ പരിപാടിയ്ക്ക് പോയാലും എത്രയും വേഗം നാട്ടിലേക്ക് തിരിച്ചെത്താനായിരിക്കുമത്രെ ആഗ്രഹം. അപകടത്തിന് ശേഷം വന്ന തിരിച്ചറിവിനെ കുറിച്ചും ബിനു അടിമാലി സംസാരിക്കുന്നുണ്ട്. സ്റ്റാർ മാജിക്കിൽ നിന്ന എല്ലാവരും ഈ വീട്ടിൽ തന്നെ കാണാൻ വന്നിരുന്നു എന്ന് ബിനു പറയുന്നു. അനുവും, ലക്ഷ്മിയും, അനൂപും, ഷിയാസും എല്ലാവരും വന്നു. അവരൊക്കെയായി ഇത്രയും വലിയ ആത്മബന്ധം ഉണ്ടായിരുന്നോ എന്ന് എനിക്ക് പോലും ബോധ്യം വന്നത് ആ അപകടത്തിന് ശേഷമാണ്. സുധിയുമായി വല്ലാത്ത ഒരു ബന്ധം ഉണ്ടായിരുന്നു. അവന് എന്നോടും. വേണ്ടപ്പെട്ടവരെ തിരിച്ചറിയുന്നത് നമുക്കൊരു ആപത്ത് സംഭവിക്കുമ്പോഴാണല്ലോ. അപകടത്തിന് ശേഷം ഇപ്പോഴും പൂർണമായും സുഖം പ്രാപിച്ചിട്ടില്ല. സ്റ്റെപ്‌സ് കയറാനൊക്കെ ബുദ്ധിമുട്ടുണ്ട്. ബിനു അടിമാലിയുടെ വീട്ടിൽ ഒരുപാട് പുരസ്‌കാരങ്ങളുണ്ട്. പലരും സമ്മാനിച്ച കുറേ ഫോട്ടോ ഫ്രെയിമുകളും.
കുറച്ച് പുരസ്‌കാരങ്ങൾ ഹോളിൽ സജ്ജീകരിച്ചിട്ടുണ്ട്. അതിൽ സുധിയ്‌ക്കൊപ്പം ഏറ്റവും അവസാനം പങ്കെടുത്ത ഷോയിൽ നിന്ന് കിട്ടിയ പുരസ്‌കാരവുമുണ്ട്. അത് വാങ്ങിച്ച് മടങ്ങുമ്പോഴായിരുന്നു അപകടം സംഭവിച്ചത്. ഇതുപോലൊരെണ്ണം സുധിയ്ക്കും കിട്ടിയിരുന്നു എന്ന് പറയുമ്പോൾ ബിനുവിന്റെ ശബ്ദത്തിൽ ഒരിടർച്ചയുണ്ടായിരുന്നു. വേറെ കുറേ പുരസ്‌കാരങ്ങൾ അടുക്കളയിലാണ് സൂക്ഷിച്ചിരിയ്ക്കുന്നത്. അവിടെ പാചകം ചെയ്യാറില്ല. ഇപ്പോൾ പാത്രങ്ങളെക്കാൾ പുരസ്‌കാരങ്ങളാണ് അടുക്കളയിൽ കൂടുതലും ഉള്ളത്. വർക്ക് ഏരിയയിലാണ് പാചകം. വീട്ടിൽ ഇപ്പോൾ ഭാര്യയും മക്കളുമാണ് ഉള്ളത്. മൂത്ത മകൻ ഒരു ടൂറിലാണ്. അവൻ പ്ലസ് ടു എല്ലാം കഴിഞ്ഞു. പോളണ്ടിൽ പോയി ഉപരിപഠനം നടത്തണം എന്നാണ് അവന്റെ ആഗ്രഹം. വിദേശത്തൊക്കെ പോകുന്നത് എനിക്കൊട്ടും താത്പര്യമില്ല.
പക്ഷെ സുഹൃത്തുക്കളൊക്കെ അങ്ങോട്ടു പോയി, എനിക്കും പോകണം എന്ന് പറഞ്ഞു നിൽക്കുകയാണ്. ആത്മിക് എന്നാണ് മൂത്തയാളുടെ പേര്, രണ്ടാമത്തെ മകൻ ആമ്പൽ. മകൾ പത്താം ക്ലാസിലാണ്. ഷോകളിൽ കണ്ടറുകൾ പറയുന്നത് കണ്ട് ശീലിച്ചതു കാരണം പിള്ളാർക്ക് ഇപ്പോൾ ഞാൻ എന്തു പറഞ്ഞാലും കോമഡിയാണ്, വഴക്ക് പറഞ്ഞാൽ പോലും ചിരിച്ചിട്ട് പോകും എന്നാണ് ബിനു പറയുന്നത്. ഈ മൂന്ന് മക്കളെയും കൂടാതെ രണ്ട് പേർ കൂടെ മക്കളുടെ സ്ഥാനത്തിൽ വീട്ടിലുണ്ട് എന്നാണ് ബിനു അടിമാലി പറയുന്നത്. ഒന്ന് ഒരു വളർത്തു നായയാണ്, അന്നമ്മ!. സ്റ്റാർമാജിക്കിലെ അന്ന ചാക്കോയാണ് ആ പെറ്റിനെ തന്നത്, അതുകൊണ്ട് അവൾക്ക് അന്നമ്മ എന്ന പേരിട്ടു. ഇപ്പോൾ വീട്ടിലെ ഒരംഗത്തെ പോലെയാണ്. രണ്ടു മാസമായി. ഇളയ കുട്ടിയായിട്ടാണ് കാണുന്നത്. മൂത്ത മകൾ എന്റെ കാറാണ്, ഫോർച്യൂണർ. വെള്ളപ്പൊക്ക സമയത്തൊക്കെ ഞങ്ങളെ രക്ഷപ്പെടുത്തി കൊണ്ടു വന്നത് അവനാണ്. അതുകൊണ്ട് ആ വണ്ടിയോടും വല്ലാത്ത ആത്മബന്ധമുണ്ട്. മൂത്ത മകൻ അവനാണ്. അങ്ങനെ എനിക്കിപ്പോൾ അഞ്ച് മക്കളുണ്ട്- ബിനു അടിമാലി പറഞ്ഞു.
Find out more:
click and follow Indiaherald WhatsApp channel