అయితే యనమల రామకృష్ణుడు వ్యాఖ్యలపై ఎమ్మెల్సీ ఉమ్మారెడ్డి వెంకటేశ్వర్లు అభ్యంతరం వ్యక్తం చేశారు. శాసన మండలి రూల్స్‌లోని రూల్ 306ను ఉటంకిస్తూ, ఆ శాఖ మంత్రి ప్రకటనను అందించాలని, ముఖ్యమంత్రి ప్రసంగించాల్సిన అవసరం లేదని రూల్ పొజిషన్‌ను చదివి వినిపించారు. యనమల వ్యాఖ్యలు శాసనమండలి చైర్మన్‌ను అవమానించేలా ఉన్నాయని టీడీపీ ఎమ్మెల్సీపై ఆగ్రహం వ్యక్తం చేసిన ఆయన, నిబంధనల ప్రకారం మండలిలో నడుచుకోవాలని టీడీపీకి సూచించారు. సభా కార్యక్రమాలను అడ్డుకోవడం మంచి పద్దతి కాదంటూ మండలి చైర్మన్ కొయ్యే మోషేన్ రాజు మాట్లాడుతూ టీడీపీ నేతల తీరును ఉద్దేశించి అన్నారు. జంగారెడ్డిగూడెం మృతులకు సంబంధించి స్టేట్‌మెంట్ ఇచ్చేందుకు వైద్యారోగ్యశాఖ మంత్రి సిద్ధంగా ఉన్నారని, ఆ తర్వాత అభ్యంతరాలు తెలపాలని కోరగా, టీడీపీ ఎమ్మెల్సీలు ఖాతరు చేయకపోగా, నినాదాలు చేస్తూ సభా కార్యకలాపాలకు అంతరాయం కలిగించారు. శాసనసభలోనూ అదే పరిస్థితి నెలకొంది. ప్రశ్నోత్తరాల సమయంలో మంత్రుల ప్రసంగానికి అంతరాయం కలిగిస్తూ టీడీపీ ఎమ్మెల్యేలు నినాదాలు చేస్తూనే ఉన్నారు. జంగారెడ్డిగూడెం అంశంపై శాసనసభలో ప్రతిపక్షాలు కావాలనే రచ్చ సృష్టించాయని, దీనిపై ప్రభుత్వం ఇప్పటికే సభలో క్లారిటీ ఇచ్చిందని, సభ్యతగా నడుచుకోవాలని టీడీపీపై ముఖ్యమంత్రి వైఎస్‌ జగన్‌మోహన్‌రెడ్డి మండిపడ్డారు.
