കിളികൊല്ലൂർ സ്റ്റേഷൻ മർദ്ദനം; സൈനികനെയും സഹോദരനെയും ചൂരൽ കൊണ്ട് പോലീസ് തല്ലി! സ്റ്റേഷനിലെ വനിതാ എസ്ഐയുടെ മൊഴിയാണ് പുറത്തുവന്നത്. കേസിലെ അന്വേഷണ ഉദ്യോഗസ്ഥ കൂടിയായിരുന്ന എസ്ഐ സ്വാതി മജിസ്ട്രേറ്റിന് നൽകിയ മൊഴിയിലാണ് ഈ നിർണായ വിവരമുള്ളത്. കിളികൊല്ലൂർ പോലീസ് സ്റ്റേഷൻ മർദനത്തിൽ സിഐയും എസ്ഐയും ചേർന്ന് സഹോദരങ്ങളായ വിഷ്ണുവിനെയും വിഘ്നേഷിനെയും മർദിച്ചിരുന്നുവെന്നു തെളിയിക്കുന്ന പോലീസ് ഉദ്യോഗസ്ഥയുടെ സാക്ഷിമൊഴി പുറത്ത്. സ്റ്റേഷനിലെ ബഹളം കേട്ടെത്തിയ സിഐ വിനോദും എസ്ഐ അനീഷും ബലംപ്രയോഗിച്ച് വിഷ്ണുവിനെയും വിഘ്നേഷിനേയും ചൂരൽ ഉപയോഗിച്ചു തല്ലിയെന്നാണ് സ്വാതിയുടെ മൊഴിയിൽ പറയുന്നത്.
റെറ്ററായിരുന്ന എഎസ്ഐ പ്രകാശ് ചന്ദ്രൻ മദ്യപിച്ചിട്ടാണ് ജോലി ചെയ്യുന്നതെന്ന പരാതി പറയാനാണ് ഇരുവരും സ്റ്റേഷനിലെത്തിയതെന്നും റിപ്പോർട്ടിൽ പറയുന്നു. എസ്ഐയും സിഐയും സഹോദരങ്ങളെ മർദിച്ചിട്ടില്ലെന്നായിരുന്നു പോലീസിന്റെ വാദം. എന്നാൽ ഇത് തെറ്റാണെന്ന് തെളിയിക്കുന്നതാണ് ഉദ്യോഗസ്ഥയുടെ മൊഴി. ദൃശ്യങ്ങളിൽ സൈനികനെ ആദ്യം മർദിക്കുന്നത് പോലീസുകാരനാണെന്നു വ്യക്തമായതോടെ പോലീസിന് തന്നെ തിരിച്ചടിയാകുകയായിരുന്നു.ആക്രമണം നടത്തിയത് സൈനികനാണെന്ന് വരുത്തിതീർക്കാൻ കഴിഞ്ഞ ദിവസം സ്റ്റേഷനിലെ സിസിടിവി ദൃശ്യവും പോലീസ് പുറത്തുവിട്ടിരുന്നു.
കിളികൊല്ലൂർ പോലീസ് മർദനക്കേസിൽ കർശന നടപടിക്കൊരുങ്ങി സർക്കാർ. സസ്പെൻഷനിലായ നാല് പോലീസുകാർക്ക് പുറമെ ആരോപണ വിധേയരായ കൂടുതൽ ഉദ്യോഗസ്ഥർക്കെതിരെ നടപടിയുണ്ടാകും. സൈനികൻ ഉൾപ്പെടെ സഹോദരങ്ങൾക്ക് ക്രൂര മർദനം ഏൽക്കേണ്ടി വന്നതിൽ വകുപ്പ് തല റിപ്പോർട്ട് ഉടൻ സമർപ്പിക്കും.സസ്പെപെൻഷനിലായ നാല് പോലീസ് ഉദ്യോഗസ്ഥർക്ക് പുറമെ സ്റ്റേഷനിൽ അന്നേ ദിവസം ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥർക്കെതിരെയും നടപടിയുണ്ടാകും. സഹോദരങ്ങളെ മർദിച്ചതിൽ കൂടുതൽ പോലീസുകാർ ഉൾപ്പെട്ടിട്ടുണ്ടെന്ന വിവരമാണ് ഉന്നത പോലീസ് ഉദ്യോഗസ്ഥർക്ക് ലഭിച്ചിരിക്കുന്നത്.
സസ്പെൻഷനിൽ മാത്രം നടപടി ഒതുക്കരുതെന്ന ആവശ്യവും ശക്തമാണ്.സൈനികന് മർദനമേറ്റ സംഭവം മിലിറ്ററി ഇൻ്റലിജൻസും പരിശോധിക്കും. ദക്ഷിണ മേഖലാ ഐജി പി പ്രകാശിൻ്റെ റിപ്പോർട്ടിൻ്റെ അടിസ്ഥാനത്തിലാണ് പോലീസ് ആസ്ഥാനത്ത് നിന്നും സസ്പെപെൻഷൻ നടപടി സ്വീകരിച്ചത്. ലോക്കപ്പ് മൃഗീയതയെ കുറിച്ച് ആദ്യ ഘട്ടത്തിൽ വിവരങ്ങൾ ശേഖരിക്കുന്നതിൽ കൊല്ലം സിറ്റി പോലീസിന് ഗുരുതര വീഴ്ചയുണ്ടായെന്നാണ് വിലയിരുത്തൽ. ഡിജിപിയായിരുന്ന ലോൿനാഥ് ബെഹറയുടെ കാലത്ത് ക്രിമിനൽ പശ്ചാത്തലമുള്ള 70 പോലീസുകാരെ സർവീസിൽ നിന്ന് പിരിച്ചുവിട്ടിരുന്നു. എംഡിഎംഎ കേസിൽ പിടിയിലായ പ്രതികളുടെ ജാമ്യത്തിനായി പോലീസ് തന്നെ ജാമ്യത്തിന് ആളെ വിളിച്ചു വരുത്തിയ സാഹചര്യവും സംശയ നിഴലിലാണ്.
Find out more:
click and follow Indiaherald WhatsApp channel