ത്രിപുര തിരഞ്ഞെടുപ്പ് പ്രചാരണത്തിൽ കോൺഗ്രസിന്റെ ഉന്നത നേതാക്കൾ ഇല്ലേ? ഇന്ത്യയിലെ ഏറ്റവും ചെറിയ സംസ്ഥാനങ്ങളിലൊന്നായ ത്രിപുര, കേരളത്തിന്റെ ജനസംഖ്യയുടെ കേവലം പത്തു ശതമാനത്തിൽ താഴെ മാത്രം ജനസംഖ്യയുള്ള ഒരു സംസ്ഥാനമാണ്. ആകെ 60 നിയമസഭാ സീറ്റുകൾ. എന്നാൽ ഈ വിഷയങ്ങളൊന്നും ത്രിപുര സഭാസഭ തെരഞ്ഞെടുപ്പിന്റെ രാഷ്ട്രീയപ്രസക്തി ലഘൂരിക്കാൻ പോന്നതല്ല. ത്രിപുര നിയമസഭയിലേക്ക് ഇത്തവണ ബിജെപിയും ഇടത് – കോൺഗ്രസ് സഖ്യവും തമ്മിൽ ഇഞ്ചോടിഞ്ച് മത്സരമാണ് നടക്കുന്നത്. തിപ്ര മോത എന്ന പുതിയ ഗോത്ര പാർട്ടിയും ഇത്തവണ ത്രിപുരയിൽ നിർണായക സ്വാധീനമാകുമെന്ന് രാഷ്ട്രീയ നിരീക്ഷകർ വിലയിരുത്തുന്നു. അഞ്ചുവർഷത്തെ ബിജെപി ഭരണത്തിൽ ത്രിപുര വിവിധ സാമൂഹ്യസൂചികകളിൽ പിന്നാക്കം പോയി എന്നത് വസ്തുതയാണ്. പ്രസിദ്ധീകരിക്കപ്പെട്ട വിവിധ പഠനസൂചികകൾ ഇതിന് തെളിവാണ്.
സംസ്ഥാനത്ത് ക്രമസമാധാനം (പ്രത്യേകിച്ച് ബി ജെ പി അധികാരത്തിലേറിയ ശേഷം നടന്ന പഞ്ചായത്ത്, ലോക്സഭാ തെരഞ്ഞെടുപ്പ് കാലത്ത്) താറുമാറായെന്നും, എതിർ രാഷ്ട്രീയ പ്രവർത്തകരെ ഭരണമുപയോഗിച്ച് അടിച്ചമർത്തുന്നുവെന്നുമുള്ള ആരോപണങ്ങളും ശക്തമാണ്. ബംഗ്ലാദേശിനെ തൊട്ടുകിടക്കുന്ന ത്രിപുര എന്ന വടക്കു കിഴക്കൻ സംസ്ഥാനം 2018-ലെ നിയമസഭാ തെരഞ്ഞെടുപ്പിലാണ് ഇടതുപക്ഷത്തെ തോൽപ്പിച്ച് ബി ജെ പി സ്വന്തമാക്കുന്നത്. 36 സീറ്റുകൾ നേടിയാണ് ബി.ജെ.പി. 25 വർഷത്തെ ഇടതുമുന്നണി ഭരണം അവസാനിപ്പിച്ചത്. എന്നാൽ ത്രിപുരയിൽ അധികാരത്തിലേറിയ ബി ജെ പി സർക്കാരിന് പക്ഷെ ജനങ്ങളുടെ പ്രതീക്ഷക്കൊത്തുയരാൻ സാധിച്ചോയെന്ന് രാഷ്ട്രീയനിരീക്ഷകർ സംശയം പ്രകടിപ്പിക്കുന്നുണ്ട്. സംസ്ഥാനത്ത് പ്രചാരണഘട്ടങ്ങളിൽ ബിജെപി പ്രകടിപ്പിക്കുന്ന ബേജാർ ശ്രദ്ധിച്ചാൽ ഇതിൽ അൽപം സത്യമുണ്ടെന്ന് തോന്നാം.
ബി ജെ പിയുടെ ഭരണത്തിന് കീഴിലെ അഴിമതി, സർക്കാർ സംവിധാനങ്ങളുടെ ദുരുപയോഗം, ക്രമസമാധാന പ്രശ്നങ്ങൾ, രാഷ്ട്രീയ കൊലപാതകങ്ങൾ, തൊഴിലില്ലായ്മ തുടങ്ങിയ പ്രശ്നങ്ങൾ ചൂണ്ടിക്കാട്ടി ഈ സഖ്യം തെരഞ്ഞെടുപ്പ് പ്രചാരണം ആരംഭിച്ചു. മുന്നനുഭവങ്ങളുടെ പശ്ചാത്തലത്തിൽ സ്വതന്ത്രവും നീതിപൂർവകവും സമാധാനപരവുമായ തെരഞ്ഞെടുപ്പ് പ്രക്രിയ പൂർത്തിയാക്കാൻ തെരഞ്ഞെടുപ്പ് കമീഷനും കേന്ദ്ര-സംസ്ഥാന സർക്കാരുകളും തയ്യാറാകണമെന്ന് ആവശ്യപ്പെട്ട്‌ ത്രിപുര ഐക്യദാർഢ്യ പരിപാടി സംസ്ഥാനത്തിനകത്തും പുറത്തും ഇടതുപക്ഷ പാർട്ടികൾ സംഘടിപ്പിച്ചു. പാർട്ടി ജനറൽ സെക്രട്ടറി സീതാറാം യെച്ചൂരി അടക്കമുള്ള ഇടതുപക്ഷ നേതാക്കൾ ത്രിപുരയിൽ തമ്പടിച്ച് പ്രചാരണങ്ങൾക്ക് നേതൃത്വം നൽ‌കി, കേരളത്തിൽ നിന്ന് കെ എൻ ബാലഗോപാലടക്കം പ്രചാരണത്തിൽ പങ്കെടുക്കാൻ ചെന്നു. രാജ്യത്തെ പാർട്ടിയുടെ പ്രമുഖ നേതാക്കളെല്ലാം ത്രിപുരയിലെത്തി. സി പി ഐ നേതാക്കളും ത്രിപുരയുടെ തെരഞ്ഞെടുപ്പ് പരിപാടികളിൽ സജീവമായി.
ലോക്സഭാ തെരഞ്ഞെടുപ്പ് പടിവാതിൽക്കൽ എത്തിനിൽക്കെ പല കാരണങ്ങൾ കൊണ്ടും നിർണായകമായ ഒരു തെരഞ്ഞെടുപ്പിന് ത്രിപുര സാക്ഷ്യം വഹിക്കുമ്പോൾ, ഗാന്ധി കുടുംബമോ, എ ഐ സി ഐ പ്രസിഡണ്ടോ അങ്ങോട്ട് തിരിഞ്ഞു നോക്കിയില്ല എന്ന ആരോപണം ഇടത് കേന്ദ്രങ്ങളിൽ നിന്നുയരുന്നുണ്ട്."അഞ്ചു വർഷത്തിന് ശേഷം സ്വതന്ത്രമായി ത്രിപുരയിൽ പ്രവർത്തിക്കാൻ അവസരം കിട്ടുന്നത് ഈ തെരഞ്ഞെടുപ്പ് കാലത്താണ്. ബി ജെ പി അക്രമ രാഷ്ട്രീയം അഴിച്ചു വിടാത്ത പക്ഷം വിജയം ഇടതു മുന്നണി-കോൺഗ്രസ്സ് സഖ്യത്തിനായിരിക്കും," കോൺഗ്രസ് നേതാവ് ലാൽ ബഹാദൂർ സിൻഹയുടെ വാക്കുകളാണിത്. ത്രിപുരയിലെ കോൺഗ്രസ് നേതൃത്വം നേരിടുന്ന അടിസ്ഥാനപരമായ ഒരു പ്രശ്നത്തെ ഈ വാക്കുകളിൽ നിന്ന് വായിച്ചെടുക്കാം. സ്വതന്ത്രമായി പ്രവർത്തിക്കാൻ പോലും സാധിക്കാത്ത വിധത്തിൽ ത്രിപുരയുടെ രാഷ്ട്രീയഭൂമിക മാറിയിരിക്കുന്നു. ഈ അടിസ്ഥാന രാഷ്ട്രീയം കോൺഗ്രസ്സിന്റെ ദേശീയ നേതൃത്വം മനസ്സിലാകാതിരിക്കുന്നതിൽ സംസ്ഥാനത്തെ കോൺഗ്രസ് നേതൃത്വത്തിന് അതൃപ്തിയുണ്ട്. ജോഡോ യാത്ര നടത്തുകയും അതിന്റെ സ്പിരിറ്റുൾക്കൊള്ളാതെ രാഷ്ട്രീയതന്ത്രങ്ങൾ മെനയുകയും ചെയ്യുന്നതിൽ എന്താണ് കാര്യമെന്നാണ് ഇടത് സർക്കിളുകളിൽ നിന്നുള്ള വിമർശനം.
Find out more:
click and follow Indiaherald WhatsApp channel