ഇന്ത്യയും അമേരിക്കയും ഒരേ മൂല്യങ്ങൾ പങ്കിടുന്നു എന്ന് ബൈഡൻ, സ്വീകരണം 140 കോടി ഇന്ത്യക്കാർക്കുള്ള അംഗീകാരമെന്ന് മോദിയും! ബൈഡനുമായുള്ള കൂടിക്കാഴ്ചയ്ക്ക് മുന്നോടിയായി ഇരുനേതാക്കളും ജനങ്ങളെ അഭിസംബോധന ചെയ്തു. 21-ാം നൂറ്റാണ്ടിലെ ഏറ്റവും നിർണായകമായ ബന്ധങ്ങളിലൊന്നാണ് യുഎസും ഇന്ത്യയും തമ്മിലുള്ളതെന്ന് മോദിയെ സ്വാഗതം ചെയ്തുകൊണ്ട് ബൈഡൻ പറഞ്ഞു. ഇരുരാജ്യങ്ങളും തമ്മിലുള്ള ബന്ധം ലോക നന്മയ്ക്കാണെന്നും ഇന്ത്യയും അമേരിക്കയും പങ്കിടുന്നത് ഒരേ മൂല്യങ്ങളാണെന്നും അമേരിക്കൻ പ്രസിഡൻറ് പറഞ്ഞു. ഇന്ത്യൻ പ്രധാനമന്ത്രി നരേന്ദ്ര മോദിക്ക് വൈറ്റ് ഹൗസിൽ സ്വീകരണം നൽകി അമേരിക്കൻ പ്രസിഡൻറ് ജോ ബൈഡൻ. യുഎസ് വൈസ് പ്രസിഡൻറും ഇന്ത്യൻ വംശജയുമായ കമല ഹാരിസിൻറെ ജീവിതം അടക്കം പരാമർശിച്ചാണ് ജോ ബൈഡൻ സംസാരിച്ചത്. അമേരിക്കയുടെ വളർച്ചയ്ക്ക് പ്രവാസികളായ ഇന്ത്യാക്കാരുടെ പങ്ക് വളരെ വലുതാണ്.
ഇന്ത്യ - അമേരിക്ക ബന്ധത്തിൻറെ സാധ്യതകൾ വളരെ വലുതാണ്. രണ്ട് മഹത്തായ രാഷ്ട്രങ്ങൾ, രണ്ട് ഉറ്റസുഹൃത്തുക്കൾ, രണ്ട് ലോക ശക്തികൾ, അതാണ് അമേരിക്കയും ഇന്ത്യയുമെന്നും ബൈഡൻ പറഞ്ഞു.വൈറ്റ് ഹൗസിലേക്ക് വീണ്ടും എത്തിയ പ്രധാനമന്ത്രി മോദിക്ക് സ്വാഗതം. അമേരിക്കയിലേക്ക് മോദി നടത്തുന്ന ആദ്യ ഔദ്യോഗിക സന്ദർശനത്തിൽ ആതിഥ്യമരുളാൻ കഴിഞ്ഞത് തനിക്കാണെന്നതിൽ സന്തോഷമുണ്ടെന്നും ബൈഡൻ പറഞ്ഞു.ജോ ബൈഡനും താനും അൽപ്പസമയത്തിനുള്ളിൽ ഉഭയകക്ഷി ചർച്ചകൾ നടത്തുകയും പ്രാദേശിക, ആഗോള വിഷയങ്ങൾ ചർച്ച ചെയ്യുകയും ചെയ്യും. ഞങ്ങളുടെ ചർച്ചകൾ പോസറ്റീവായിരിക്കുമെന്ന് എനിക്ക് ഉറപ്പുണ്ടെന്നും നരേന്ദ്ര മോദി വൈറ്റ് ഹൗസിൽ സംസാരിക്കവെ പറഞ്ഞു.
അമേരിക്കയിൽ തനിക്ക് ലഭിച്ച വരവേൽപ്പ് 140 കോടി ഇന്ത്യക്കാർക്കുള്ള ആദരമാണെന്നും പ്രധാനമന്ത്രി നരേന്ദ്ര മോദി പ്രസംഗത്തിൽ പറഞ്ഞു.പ്രധാനമന്ത്രിയായതിന് ശേഷം ഞാൻ പലതവണ വൈറ്റ് ഹൗസ് സന്ദർശിച്ചിട്ടുണ്ട്. ഇത്രയും വലിയ രീതിയിൽ ഇന്ത്യൻ-അമേരിക്കൻ സമൂഹത്തിനായി വൈറ്റ് ഹൗസിന്റെ ഗേറ്റ് തുറക്കുന്നത് ഇതാദ്യമാണ്. അമേരിക്കയിലെ ആളുകൾ തങ്ങളുടെ കഠിനാധ്വാനത്തിലൂടെയും അർപ്പണബോധത്തിലൂടെയും യുഎസിൽ ഇന്ത്യയുടെ മഹത്വം ഉയർത്തുകയാണ്. ഞങ്ങളുടെ ബന്ധത്തിൻറെ യഥാർത്ഥ ശക്തി നിങ്ങളാണ്.
അവർക്ക് ഈ ബഹുമതി നൽകിയതിന് പ്രസിഡൻറ് ബൈഡനും ഡോ.ജിൽ ബൈഡനും ഞാൻ നന്ദി പറയുകയാണെന്നും മോദി പറഞ്ഞു.കൊവിഡിന് ശേഷമുള്ള ലോകക്രമത്തെ ശക്തിപ്പെടുത്തി മുന്നോട്ട് കൊണ്ടുപോകുന്നതിൽ ഇന്ത്യയും അമേരിക്കയും ഒന്നിച്ച് നിന്ന് പ്രവർത്തിക്കും. ലോക സമാധാനത്തിനും ലോകനന്മയ്ക്കും സ്ഥിരതയ്ക്കും പുരോഗതിക്കും ബന്ധം ശക്തിയേകുമെന്നും പ്രധാനമന്ത്രി പറഞ്ഞു.
Find out more:
click and follow Indiaherald WhatsApp channel