ഹർത്താൽ നിരോധിച്ചിട്ടും നടത്തി; കർശന നടപടിയുമായി കോടതി! ഹർത്താൽ നേരത്തെ തന്നെ നിരോധിച്ചിട്ടുള്ളതാണ്. കോടതി ഉത്തരവ് ലംഘിച്ചവർക്കെതിരെ കർശന നടപടി വേണമെന്ന് ഹൈക്കോടതി നിർദേശിച്ചു. അക്രമം തടയാൻ സർക്കാർ എല്ലാ സംവിധാനങ്ങളും ഉപയോഗിക്കണമെന്ന് കോടതി നിർദേശിച്ചു. ഡിജിപി നേരിട്ട് ഹാജരാകണമെന്നും ഹൈക്കോടതി നിർദേശിച്ചു. ജസ്റ്റിസ് ജയശങ്കരൻ നമ്പ്യാരുടെ അധ്യക്ഷതയിലുള്ള ഡിവിഷൻ ബെഞ്ചിന്റേതാണ് നടപടി. പോപ്പുലർ ഫ്രണ്ട് നേതാക്കളെ എൻഐഎ റെയ്ഡിന് ശേഷം അറസ്റ്റ് ചെയ്തതിൽ പ്രതിഷേധിച്ച് വെള്ളിയാഴ്ച നടത്തുന്ന ഹർത്താൽ നിയമ വിരുദ്ധമെന്ന് ഹൈക്കോടതി. പലയിടത്തും സമരാനുകൂലികൾ നിരത്തിലിറങ്ങി വാഹനങ്ങൾ തടഞ്ഞു. കല്ലേറിൽ നിരവധിപ്പേർക്ക് പരിക്കേറ്റിട്ടുണ്ട്. അമ്പതോളം ബസുകളുടെ ചില്ല് തകർന്നു. കോഴിക്കോടും കണ്ണൂരും തിരുവനന്തപുരത്തും ഡ്രൈവർമാർക്ക് പരിക്കേറ്റു.
കണ്ണൂരിൽ പെട്രോൾ ബോംബ് എറിഞ്ഞു. മുഖം മൂടി ധരിച്ച് ബൈക്കിലെത്തുന്നവർ അക്രമങ്ങൾ അഴിച്ചുവിടുന്നുവെന്നാണ് റിപ്പോർട്ട്. പോപ്പുലർ ഫ്രണ്ട് ഓഫ് ഇന്ത്യ കേരളത്തിൽ ആഹ്വാനം ചെയ്ത ഹർത്താൽ ആരംഭിച്ചതുമൂലം പ്രവർത്തകർ അക്രമം അഴിച്ചുവിടുകയാണ്. ഒപ്പം മാധ്യമപ്രവർത്തകർക്കെതിരെയും പോലീസിനെതിരെയും ആക്രമണം നടന്നിട്ടുണ്ട്. കോട്ടയം ഈരാറ്റുപേട്ടയിൽ വാഹനങ്ങൾ തടഞ്ഞ് സംഘർഷാവസ്ഥ സൃഷ്ടിച്ച പോപ്പുലർ ഫ്രണ്ട് ഹർത്താൽ അനുകൂലികൾക്ക് നേരെ പോലീസ് ലാത്തിച്ചാർജ് നടത്തി. അഞ്ച് പിഎഫ് ഐ പ്രവർത്തകരെ പോലീസ് കസ്റ്റഡിയിലെടുത്തു. 100 ഓളം പേരെ കരുതൽ തടവിലാക്കി ഈരാറ്റുപേട്ട പാലാ പോലീസ് സ്റ്റേഷനുകളിലേക്ക് മാറ്റിയിട്ടുണ്ടെന്നാണ് റിപ്പോർട്ട്. കേരളത്തിൽ അങ്ങോളമിങ്ങോളും മുപ്പതിലധികം കെഎസ്ആർടിസി ബസുകൾക്കു നേരെ കല്ലേറുണ്ടായിട്ടുണ്ടെന്നാണ് പുറത്ത് വരുന്ന സൂചനകൾ. സർവീസ് ആരംഭിച്ച കെഎസ്ആർടിസി ബസുകൾ ഹർത്താൽ അനുകൂലികൾ തടഞ്ഞു.
കല്ലേറുണ്ടായതിനെ തുടർന്ന് കോഴിക്കോട് ഡിപ്പോയിൽ നിന്നുള്ള കെഎസ്ആർടിസി സർവീസുകൾ നിർത്തിവെച്ചു.കോഴിക്കോട് സിവിൽ സ്റ്റേഷനു സമീപം യാത്രക്കാരുമായി പോകുകയായിരുന്ന കെഎസ്ആർടിസി ബസിനു നേരെയുണ്ടായ കല്ലേറിൽ ചില്ലു തകർന്നു. കണ്ണിനു പരിക്കേറ്റ ഡ്രൈവറെ ബീച്ച് ആശുപത്രിയിൽ പ്രവേശിപ്പിച്ചു. രാവിലെ ഏഴേ കാലോടെയാണ് സംഭവം. കോഴിക്കോട്ട് ടൗണിലും കല്ലായിയിലും ചെറുവണ്ണൂരിലും മൂന്നു കെഎസ്ആർടിസി ബസുകൾക്ക് നേരെ കല്ലേറുണ്ടായി. കോഴിക്കോട്ട് കല്ലായിയിൽ ലോറിക്കു നേരെയാണ് കല്ലേറുണ്ടായത്. കൊയിലാണ്ടി ആനക്കുളത്ത് ലോറിക്ക് നേരെയും അക്രമം ഉണ്ടായിട്ടുണ്ട്. പുലർച്ചെ 3.50 നാണ് അക്രമം നടന്നത്. ലോറിയുടെ ഗ്ലാസ് തകർന്നു. താമരശേരിയിലും ലോറിക്ക് നേരെ കല്ലേറുണ്ടായി. കോഴിക്കോട് ഡിപ്പോയിൽ നിന്നുള്ള കെഎസ്ആർടിസി സർവീസുകൾ നിർത്തിവെച്ചു. വയനാട് പനമരം മുക്കത്ത് ഹർത്താൽ അനുകൂലികൾ ബസിനുനേരെ കല്ലെറിഞ്ഞു.
തിരുവനന്തപുരം കാട്ടാക്കടയിൽ ഹർത്താൽ അനുകൂലികൾ കെഎസ്ആർടിസി സ്റ്റാൻഡിനുള്ളിൽ ബസുകൾ തടഞ്ഞു. ഇവരുമായി പോലീസ് ചർച്ച നടത്തിക്കൊണ്ടിരിക്കുകയാണ്. ഗതാഗത തടസമില്ലാതെ ഹർത്താൽ നടത്തണമെന്നാണ് പോലീസ് സമരക്കാരോട് പറയുന്നത്. ക്യാമ്പ് പോലീസ് ഉൾപ്പെടെയുള്ള സംഘം ബസ് സ്റ്റാൻഡിലേക്ക് എത്തിയിട്ടുണ്ട്. അട്ടക്കുളങ്ങരയിൽ കെഎസ്ആർടിസി ബസിനുനേരെ കല്ലേറുണ്ടായി.എറണാകുളത്ത് മൂന്നിടത്ത് ബസുകൾക്ക് നേരെ കല്ലേറുണ്ടായി. ആലുവ ഗ്യാരേജ്, പകലോമറ്റം, പെരുമ്പാവൂർ മാറമ്പിള്ളി എന്നിവിടങ്ങളിലാണ് സംഭവം. ആലുവയിൽ നിന്നും പെരുമ്പാവൂരിലേക്ക് പോയ ബസിൻ്റെ മുൻഭാഗത്തെ ചില്ല് തകർന്നു. കൊല്ലം തട്ടാമലയിലും അയത്തിലും ബസിനുനേരെ അക്രമമുണ്ടായി. പന്തളത്ത് കെഎസ്ആർടിസി ബസിൻ്റെ ചില്ല് തകർത്തു. പന്തളം-പെരുമൺ സർവീസിന് നേരെയാണ് കല്ലേറുണ്ടായത്. സംഭവത്തിൽ ഡ്രൈവർ പി രാജേന്ദ്രൻ്റെ കണ്ണിന് പരുക്കേറ്റു. ആലപ്പുഴ വളഞ്ഞവഴിയിൽ വാഹനങ്ങൾക്ക് നേരെ കല്ലെറിഞ്ഞു.
Find out more:
click and follow Indiaherald WhatsApp channel