మెగాఫ్యామలీ మొత్తం సినిమా ఇండస్ట్రీకి డెడికేట్ అయ్యారని ఇండస్ట్రీ జనాలు చెప్తుంటారు. కొంతమంది నెటిజన్లు మెగాఫ్యామిలీ వారసత్వాన్ని పెంచి పోషిస్తుందని కామెంట్స్ చేస్తుంటారు. అయితే ఎవరు ఎన్ని విమర్శలు చేసినా చిరంజీవి ఫ్యామిలీ నుంచి హీరోలు వస్తూనే ఉన్నారు. చిరంజీవి వారసత్వంలో తమ్ముళ్లు, తమ్ముడి కొడుకులతో పాటు మేనల్లుళ్లు, అల్లుళ్లు కూడా హీరోలుగా వచ్చారు. చిరంజీవి ఫ్యామిలీ నుంచి చాలామంది హీరోలున్నారు. తమ్ముడు పవన్ నంబర్‌ గేమ్‌లో దూకుడు చూపిస్తోంటే, కొడుకు రామ్ చరణ్ పాన్ ఇండియన్ మార్కెట్‌ని ఫోకస్ చేశాడు. పెద్ద తమ్ముడు నాగబాబు కొడుకు వరుణ్‌ తేజ్ కూడా హీరోగా రాణిస్తున్నాడు. వీళ్లతో పాటు చిరంజీవి చిన్నల్లుడు కళ్యాణ్‌ దేవ్ కూడా సినిమాల్లోకి వచ్చాడు. పెళ్లికి ముందు కళ్యాణ్‌ దేవ్ సినిమాల్లో నటించలేదు. శ్రీజని పెళ్లి చేసుకున్నాక వెండితెరపైకి వచ్చాడు కళ్యాణ్‌ దేవ్.
చిరంజీవి మేనల్లుళ్లు సాయి ధరమ్‌ తేజ్, వైష్ణవ్ తేజ్ కూడా సినిమాల్లోకి వచ్చారు. సాయి తేజ్ 'పిల్లా నువ్వు లేని జీవితం' సినిమాతో హీరోగా ఎంట్రీ ఇచ్చాడు. చిరంజీవి లుక్స్‌తో ఉన్న తేజ్ పెర్ఫామెన్స్‌కి మెగాఫ్యాన్స్‌ త్వరగానే కనెక్ట్‌ అయ్యారు. చిరంజీవి మరో మేనల్లుడు, సాయి ధరమ్‌ తేజ్ తమ్ముడు వైష్ణవ్ తేజ్ కూడా పోయినేడాదే సినిమాల్లోకి వచ్చాడు. 'ఉప్పెన' సినిమాతో వైష్ణవ్ తేజ్ హీరోగా లాంచ్ అయ్యాడు. ఇక ఈ మూవీ సూపర్ హిట్ కావడంతో వైష్ణవ్‌కి ఫస్ట్‌ మూవీతోనే క్రేజీ ఇమేజ్ వచ్చింది. యూత్‌ఫుల్ ఎంటర్‌టైనర్స్‌తో హంగామా చేస్తున్నాడు.
