ఇక మరోవైపు చంద్రబాబు మీద జరిగిన అరెస్టు, 75 ఏళ్ల వయసులో 53 రోజులు జైలులో ఉండటం ఆయనకు అద్భుతమైన సానుభూతిని తెచ్చిపెట్టింది. ఫలితంగా వైసీపీ 11 సీట్లకు పరిమితం కాగా, టీడీపీ కూటమి అధికారం సాధించింది. ఇక జగన్ హయాంలో అరెస్టయిన టీడీపీ నేతలు – అచ్చెన్నాయుడు, కొల్లు ర‌వింద్ర వంటి నేతలు – ప్రస్తుతం మంచి మెజారిటీలతో గెలిచి తిరిగిరాగలిగారు. ఇప్పుడు అదే ఫార్ములా వైసీపీ కూడా అనుసరిస్తుందనేది విశ్లేషకుల అంచనా. చంద్రబాబు అరెస్ట్ వ్యవహారానికి వచ్చిన సానుభూతిని జగన్ తనకూ వస్తుందని వైసీపీ వర్గాల్లో విశ్వాసం కనిపిస్తోంది. ఇటీవల చెవిరెడ్డి భాస్కర రెడ్డి, కాకాణి గోవర్ధన్ రెడ్డి, మిధున్ రెడ్డి అరెస్టులు ఇందుకు నిదర్శనంగా చెప్పుకోవచ్చు. ఇక తాను అరెస్టుకై సిద్ధంగా ఉన్నానని జగన్ స్వయంగా మీడియా ముందు చెప్పిన తీరు చూస్తే, ఇది ముందస్తు వ్యూహమని అనిపిస్తోంది.
ప్రత్యేకించి లిక్కర్ స్కామ్ కేసులో జగన్ అరెస్టైతే... అతికొద్ది అంటే రెండు నుంచి మూడు నెలల జైలుశిక్ష అనుకున్నా, అది రాజకీయంగా లాభంగా మారుతుందని వైసీపీ భావిస్తోంది. జైలు అనేది పాత రాజకీయాల్లో భయానకమైన పదంగా ఉన్నా, ఇప్పుడు రాజకీయ దిగ్గజాలన్నీ జైలు వెళ్లినవారే కాబట్టి, ప్రజల్లో కక్షపూరిత ధోరణిపై విరక్తి పెరిగిపోయింది. అవినీతి ఆరోపణలు ఉంటే ఎన్నికల్లో ఓడిపోతారు అనే నమ్మకం ఇక లేదు. జగన్ మీద 2014, 2019 ఎన్నికల్లోనూ లక్షల కోట్ల అవినీతి ఆరోపణలున్నా ఆయన గెలవగలిగిన దానికే నిదర్శనం. ఇపుడు అదే పంథాలో వైసీపీ నేతలు కూడా నడుస్తున్నారు. అరెస్టుల పట్ల భయాన్ని పక్కనపెట్టి, జైలు అనంతరం రాజకీయ సానుభూతిని సొంతం చేసుకునేందుకు సిద్ధంగా ఉన్నారు. "జైలు అనేది ఓ ట్రెండ్"గా మారిపోయిన ఈ రాజకీయ వాతావరణం... ఇకపై ఏపీలో కొత్త రాజకీయ తరహాను తీసుకురాబోతున్నట్లు కనిపిస్తోంది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి