నిపుణుల విశ్లేషణల ప్రకారం, ఈ భయానికి మూలకారణం రష్యా అమ్ములపొదిలోని అత్యంత ప్రమాదకరమైన 'డెడ్ హ్యాండ్' (రష్యన్ భాషలో 'పెరిమీటర్') అనే ఆటోమేటెడ్ న్యూక్లియర్ కంట్రోల్ సిస్టమ్. ఇది ఒకరకంగా రష్యా మృత్యు శాసనం లాంటిది. ఒకవేళ ఊహకందని రీతిలో శత్రుదేశం ఏదైనా రష్యాపై అణుబాంబులతో విరుచుకుపడి, దేశాధినేతలు, సైన్యం సహా యావత్ ప్రజానీకం అసువులు బాసినా, రష్యా ప్రతీకారం తీర్చుకోకుండా ఉండదు. రష్యా పూర్తిగా ధ్వంసమైనా సరే, ఈ 'డెడ్ హ్యాండ్' వ్యవస్థ తన ప్రళయ రుద్రావతారం చూపిస్తుంది.
అసలీ డెడ్ హ్యాండ్ ఎలా పనిచేస్తుందంటే, రష్యా భూభాగంపై అణుదాడి జరిగి, విపరీతమైన రేడియోధార్మికత వ్యాపించి, కమ్యూనికేషన్ వ్యవస్థలు కుప్పకూలి, దేశ నాయకత్వం నుంచి ఎలాంటి ఆదేశాలు అందని అత్యంత దయనీయ పరిస్థితి తలెత్తితే, ఈ వ్యవస్థ మానవ ప్రమేయం లేకుండానే మేల్కొంటుంది. భూకంప తరంగాలు, కాంతి తీవ్రత, రేడియేషన్ స్థాయులు, వాతావరణ పీడనం వంటి అనేక అంశాలను నిరంతరం పర్యవేక్షించే సెన్సార్లు, దేశంలో జీవజాలం నశించినట్లు నిర్ధారించుకున్న తక్షణం, ఈ వ్యవస్థ ఆటోమేటిక్‌గా యాక్టివేట్ అవుతుంది.
అది స్వయంచాలకంగా ఒక కమాండ్ రాకెట్‌ను ప్రయోగిస్తుంది. ఆ రాకెట్ ఇచ్చే సంకేతాలతో రష్యాలోని రహస్య స్థావరాల్లో నిద్రాణస్థితిలో ఉన్న అణు క్షిపణులన్నీ ఒక్కసారిగా నిప్పులు చిమ్ముతూ శత్రు దేశాలవైపు దూసుకెళ్తాయి. ఈ అణు ప్రతీకార దాడికి తొలి లక్ష్యం అమెరికానే కావడం గమనార్హం. ఆ తర్వాత ఐరోపా దేశాలు, ఇతర శత్రు దేశాలు కూడా ఈ అణు విలయంలో బూడిదైపోతాయి. ప్రపంచ పటంలో ఆయా దేశాల ఉనికి కూడా గల్లంతయ్యేంతటి విధ్వంసం ఖాయమని నిపుణులు హెచ్చరిస్తున్నారు.
అందుకే, ఉక్రెయిన్‌కు ఎంత సాయం చేస్తున్నా, పశ్చిమ దేశాలు రష్యాతో నేరుగా తలపడటానికి వెనకడుగు వేస్తున్నాయి. రష్యా చేతిలో ఉన్న ఈ 'మృత్యు శాసనం' లాంటి వ్యవస్థ కారణంగానే, ఎంత రెచ్చగొట్టినా అమెరికా, నాటో కూటమి సంయమనం పాటిస్తున్నాయని అంతర్జాతీయ రక్షణ రంగ విశ్లేషకులు అభిప్రాయపడుతున్నారు. ఇది రష్యా అణుశక్తికి, ప్రతీకార చర్యల తీవ్రతకు, అంతిమంగా ప్రపంచ వినాశనానికి దారితీయగల ఓ భయానక వాస్తవం.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి