ప్రతి మనిషి సక్సెస్ కోసం అహర్నిశలు శ్రమిస్తాడు. కానీ కొందరు ప్రతి పనికి కోపగించుకుంటూ ఉంటారు. పక్కవారిపై కేకలేస్తూ కోపతాపాలు ప్రదర్శిస్తూ ఉంటారు. ఇలా తరచూ కోపాన్ని ప్రదర్శించే వారిపై ఉన్నతాధికారులకు చెడు అభిప్రాయం కలిగే అవకాశాలు ఎక్కువగా ఉంటాయి. ఎవరైతే ఆవేశం, కోపం అణచుకుని పని చేస్తారో వారికి సక్సెస్ సులభంగా సొంతం కావడంతో పాటు సమాజంలో మంచి పేరు సొంతమవుతుంది.
కోపం, ఆవేశం లాంటి లక్షణాలతో ఎంత కష్టపడినా తగిన గుర్తింపు రాదు. చాలా మంది ఇంట్లోని సమస్యల వల్ల భావోద్వేగాలను ఆదుపు చేసుకోలేక పోతూ ఉంటారు. సమయం, సందర్భాన్ని బట్టి మనస్సులోకి వేరే ఆలోచనలు రానీయకుండా, ఎదుర్కొంటున్న సమస్యలను మనస్సులోకి తీసుకురాకుండా ప్రవర్తించాల్సి ఉంటుంది. చాలామంది ఆఫీస్ పనుల వల్ల కోపానికి గురవుతూ ఉంటారు. ఇతర ఉద్యోగుల్లో నచ్చని గుణాలు ఉంటే వీలైనంత వరకు వారికి దూరంగా ఉండాలి.
వ్యక్తుల కంటే పనికి ప్రాధాన్యత ఇస్తే మాత్రమే సక్సెస్ సులభంగా సొంతమవుతుంది. ఎదుటివారిలో నచ్చని గుణాల గురించి వారితో చర్చించి సమస్య పరిష్కారానికి కృషి చేస్తే సులభంగా ఆవేశాన్ని కంట్రోల్ చేసుకోవచ్చు. ఎవరైనా కోపం తెప్పిస్తే కొంత సమయం వారికి దూరంగా ఆహ్లాదంగా గడపాలి. జీవితంలో సాధించిన విజయాలను గుర్తు తెచ్చుకుంటే ఆవేశం అదుపులోకి వస్తుంది.
ఎవరిమీదైనా తప్పనిసరి పరిస్థితుల్లో కోపం ప్రదర్శించాల్సి వస్తే సాధ్యమైనంత తక్కువ మాటల్లో చెప్పడానికి ప్రయత్నించాలి. గట్టిగా అరిచి కోపాన్ని ప్రదర్శిస్తే ఇతరులకు మీపై ఉన్న గౌరవం తగ్గే అవకాశం ఉంది. ఎవరికి వారు కోపాన్ని ఎప్పటికప్పుడు అదుపు చేసుకుంటే జీవితంలో సులభంగా సక్సెస్ ను అందుకోవచ్చు. కోపం, ఆవేశం లాంటి లక్షణాల వల్ల నష్టం కలిగే అవకాశాలే ఎక్కువగా ఉంటాయి. ఈ లక్షణాలు కొన్ని సందర్భాల్లో ముఖ్యమైన వ్యక్తులను కూడా దూరం చేసే అవకాశం ఉంటుంది.
