తిరుపతిలోని రాయల చెరువు పూర్తిగా నీటితో నిండిపోయింది. చెరువు కట్ట తెగిపోతుందని ఇప్పటికే స్థానికులు భయాందోళన వ్యక్తం చేస్తున్నారు. అధికారులు కూడా ముందస్తు జాగ్రత్త చర్యలు చేపట్టారు. ఈ నేపథ్యంలో రాయల చెరువు ప్రాంతాన్ని సీపీఎం జాతీయ కార్యదర్శి డాక్టర్ కె.నారాయణ పరిశీలించారు. చిత్తూరు జిల్లాని రామచంద్రాపురం మండలం కుప్పంబాదురు నుంచి దాదాపు 4 కిలోమీటర్ల దూరం కాలినడకన పర్యటించారు. రాయల చెరువు పరిసరాలను పరిశీలించారు. ఈ సమయంలో బురద కారణంగా కాలు జారి కింద పడిపోయారు నారాయణ. ఈ ఘటనలో నారాయణ కాలు బెణికింది. ఇదే సమయంలో రాయల చెరువును పరిశీలించేందుకు రాష్ట్ర ఉప ముఖ్యమంత్రి నారాయణ స్వామి, మంత్రి మేకపాటి గౌతమ్ రెడ్డి, తిరుపతి ఎంపీ గురుమూర్తి, శ్రీకాళహస్తి ఎమ్మెల్యే బియ్యపు మధుసూదన్ రెడ్డి ఆ ప్రాంతానికి చేరుకున్నారు. నారాయణ కాలు బెణికిన విషయం తెలుసుకున్న ఎంపీ గురుమూర్తి... ఆయన కాలుకు కట్టుకట్టారు. ఫిజియో థెరపిస్ట్ కావడంతో... కాలుకి మర్ధనా చేశారు. ఆ తర్వాత తన కారులోనే నారాయణను తిరుపతిలోని ఆసుపత్రికి తరలించారు. తాను వృత్తి రీత్యా వైద్యుడినని... రాజకీయాలకు ఇది సమయం కాదన్నారు.
