ജയിലറായി സൂപ്പർ സ്റ്റാർ രജനികാന്ത്! നെൽസണിന്റെ സംവിധാനത്തിൽ സൺ പിച്ചേഴ്‌സ് നിർമിച്ച രജനികാന്ത് നായകനായ ചിത്രം ജയിലർ ഒരു ക്ലീൻ എന്റർടൈനറാണ്. ബീസ്റ്റ് എന്ന വിജയ് ചിത്രത്തിൽ സംഭവിച്ച തിരിച്ചടി നെൽസൺ ജയിലറിൽ തീർത്തു. ഫാമിലിയെയും തീയേറ്ററുകളിലേക്കെത്തിക്കുന്ന തരത്തിൽ ഒരു മാസ്സ് എന്റർടൈനറാണ് ജയിലർ. ഒരു മുൻ ജയിലറുടെ കുടുംബത്തിൽ നടക്കുന്ന കഥ. ടൈഗർ മുത്തുവേൽ പാണ്ഡ്യന്റെ പ്രായത്തിനും പക്വതയ്ക്കുമനുസരിച്ചുള്ള പ്രകടനമാണ് രജനികാന്ത് ചിത്രത്തിൽ കാഴ്ച്ചവെക്കുന്നത്. ഈ കയ്യടക്കം ചിത്രത്തിന്റെ മേക്കിങ്ങിൽ നെൽസണും പിന്തുടരുന്നുണ്ട്. കുടുംബപശ്ചാത്തലത്തിൽ, തമാശയുടെ അകമ്പടിയോടെ ബ്ലഡി വയലൻസ് സീനുകൾ ക്രിയേറ്റ് ചെയ്തു മാസ്സ് കാണിക്കുക എന്ന ട്രീട്മെന്റാണ് സിനിമയിലുടനീളം. പതിവ് നന്മമര കാഴ്ചകളില്ലാത്ത പാസം, നേസം കഥകളുടെ അകമ്പടിയില്ലാതെ. കണ്ണീർ നായികയില്ലാത്ത, ഒരു രജിനിപ്പടം അതാണ് ജയിലർ. ആളും ആരവവുമില്ലാതെ തടവിലാക്കപ്പെട്ട തിയേറ്ററുകളെ ഉത്സവലഹരിയിലേക്ക് തുറന്നുവിടുകയാണ് ജയിലർ.
ഏറെ പുതുമയില്ലാത്ത കഥ തന്നെയാണ് ജയിലറിന്റേത്. പക്ഷെ ആഖ്യാന രീതിയിലെ വ്യത്യസ്തത മറ്റു സമീപകാല രജനി പാദങ്ങളിൽ നിന്നും ഇതിനെ കുറച്ച് വ്യത്യസ്തമാക്കുന്നു. ടൈഗർ മുത്തുവേൽ പാണ്ഡ്യന്റെ ജീവിതവും അതിലുടലെടുക്കുന്ന പ്രതിസന്ധിയുമാണ് കഥാപരിസരം. മറുവശത്ത് വർമ്മന്റെ ലോകവും സംഭവവികാസങ്ങളും. ഇവയുടെ ഇന്റർസെക്ഷനിൽ നിന്നാണ് ജയിലറിന്റെ തുടക്കം. തുടർന്ന് കോൺഫ്ലിക്റ്റുകളുടെയും, കിടമത്സരത്തിന്റെയും തുടർച്ചയിലൂടെ മുന്നേറി അവസാനിക്കുന്ന കഥാതന്തു. എന്നാൽ പരോക്ഷമായി പറഞ്ഞുപോകുന്ന മറ്റൊരു കഥ മൈൻസ്ട്രീമിലേക്കെത്തി രണ്ടാം പകുതിയിൽ റിവീൽ ആകുന്നു. കാമ്‌നയുടെയും, ബ്ലാസ്റ്റ് മോഹന്റെയും കഥ വേണ്ടിയിരുന്നില്ല എന്ന് പ്രേക്ഷകന് തോന്നിയേക്കാം. കഥാഖ്യാനത്തിൽ പതിവ് 'നെൽസൺ സ്ലിപ്' ഉണ്ടാകുമോയെന്നു പ്രേക്ഷകനെ ആശങ്കിപ്പിക്കുന്ന രണ്ടാം പകുതിയുടെ തുടക്കത്തിലേ കുറച്ച് മിനുട്ടുകൾ ചെറുതായൊന്നിഴയുമ്പോൾ പടം ഒന്ന് ഡൗൺ ആയി എന്ന് തോന്നുമ്പോൾ മാത്യൂസിന്റെ എൻട്രി ആണ്.
പിന്നീട് ക്ലൈമാക്സ് വരെ ഹരം പിടിപ്പിക്കുന്ന ആക്ഷൻ സീനുകളും. ഓരോരോ കഥാപാത്രങ്ങളുടെയും മാസ്സ് ഷോട്ടുകളുമായി സ്റ്റോറി ടെല്ലിങ് പ്രേക്ഷകരെ ഫുൾ ഓൺ ഫുൾ പവറിലെത്തിക്കും. അർജുന്റെ കഥാപാത്രത്തിലുള്ള വസന്ത് രവി ഒരു മിസ്കാസ്റ്റ് ആയി തോന്നി. അവിടെ കുറച്ചുകൂടി ശേഷിയുള്ള ഒരു നടനെ ഉപയോഗിക്കാമായിരുന്നു. നായകനോളം തന്നെ പ്രതിനായകനും വിട്ടുകൊടുക്കാതെ മത്സരിച്ചഭിനയിക്കുകയായിരുന്നു ജയിലറിൽ. വിനായകൻ വർമ്മനെ തകർത്താടി. ഒരുപക്ഷെ ഇനിയൊരു 'തമിഴ് കാലം' വിനായകനെ കാത്തിരിക്കുന്നുണ്ടാവാം. ഓരോ ഇമോഷനും അതിന്റെ പെർഫെക്ഷനിൽ നിർത്തിയ ക്രൂരതയുടെ പര്യായമായ നെഗറ്റീവ് റോൾ. പ്രതിനായകരുടെ കൂട്ടത്തിൽ ക്രൂരനായ നേതാവിന് പകരക്കാരനായി നായകനൊപ്പം നിലയുറപ്പിക്കുന്ന മാത്യൂസ്, ഏറിയാൽ പത്ത് മിനിറ്റ് മാത്രം വരുന്ന പെർഫോമൻസ് മോഹൻലാൽ അവതരിപ്പിച്ച ആ കഥാപാത്രം രണ്ടാം പകുതിയെയും കേരള തീയറ്ററുകളെയും ഇളക്കിമറിക്കും.
ജാക്കി ഷ്രോഫ്, ശിവ രാജ്‌കുമാർ എന്നിവരും. വർമ്മന്റെ സഹായിയായ കഥാപാത്രങ്ങളെ അവതരിപ്പിച്ചവരും തങ്ങളുടെ ഭാഗം ബാക്കിയാക്കി. യോഗി ബാബു കയ്യടക്കമു ജയിലർ രജനികാന്ത് പടമാണെങ്കിലും ഒപ്പമുള്ള മറ്റു ഇന്ഡസ്ട്രിയിലെ താരങ്ങൾക്കും വേണ്ടത്ര പരിഗണന നൽകുന്നുണ്ട്. ടൈഗർ മുത്തുവേൽ പാണ്ഡ്യൻ പതിവുപോലെ രജനികാന്ത് നിറഞ്ഞാടി. പ്രായത്തിന്റെ പക്വതയോടെയുള്ള അഭിനയം. അതിമാനുഷക കഥാപാത്രമല്ലാതെ വിശ്വസനീയമായ ഒരു ഫ്ലാഷ് ബൈക്കിന്റെ പിൻബലത്തിൽ ബിൽഡ് ചെയ്തിരിക്കുന്ന കഥാപാത്രം ക്രൂരതയുടെ ഛായയിൽ നിൽക്കുന്നതാണ്. രമ്യ കൃഷ്ണൻ അവതരിപ്പിച്ച വിജി എന്ന കഥാപാത്രം കുറച്ചുകൂടി പരിഗണനയും പവറും അർഹിക്കുന്നുണ്ട്. സിനിമയിൽ നിന്നും പ്രേക്ഷകനെ അടർന്നുപോകാതിരിക്കാൻ അനിരുദ്ധ് നൽകുന്ന ഡോസ് ആണ് ജയിലറിലെ ബിജിഎം. മാസ്സ് സീനുകളുടെ സ്കോർ, ഇന്റർവെൽ ബ്ലോക്കിന്റെ പഞ്ച് തുടങ്ങി അത് പലയിടത്തും പ്രകടമാണ്.
കാവാല, ജുജുബി പാട്ടുകൾ നേരത്തെ തന്നെ ഹിറ്റായിരുന്നു. അനിരുദ്ധ് വീണ്ടും വീണ്ടും തന്റെ കഴിവ് തെളിയിക്കുകയാണ്.സിനിമയിൽ രജനി എഫക്ടിനുവേണ്ടി ചിലയിടങ്ങളിൽ അനാവശ്യ ഷോട്ടുകൾ ഉപയോഗിച്ചത് പ്രേക്ഷകന് ആവർത്തന വിരസത നൽകിയേക്കും. അർജുന്റെ പ്രകടനവും മറ്റു പ്രകടനങ്ങളിൽ താഴ്ന്നുപോയതായി അനുഭവപ്പെടാൻ സാധ്യതയുണ്ട്. കഥ അനാവശ്യമായി വലിച്ചു നീട്ടാൻ കാമ്‌നയെയും, ബ്ലാസ്റ്റ് മോഹനെയും ഉപയോഗിച്ചപോലെയും അനുഭവപ്പെട്ടേക്കാം. മാത്യൂസിന് കുറച്ചുകൂടി സ്ക്രീൻ ടൈം നല്കാമെന്നുള്ള അഭിപ്രായവും പ്രേക്ഷകർക്ക് തോന്നിയേക്കാം. താരബാഹുല്യം സിനിമയുടെ വിപണി ലക്ഷ്യമാക്കിയാണെങ്കിലും പഞ്ചാബിൽ നിന്നുള്ള ഗുണ്ടയുൾപ്പടെ ചില കഥാപാത്രങ്ങളെ ഒഴിവാക്കാമായിരുന്നു.
Find out more:
click and follow Indiaherald WhatsApp channel