సీఎం చంద్రబాబు దాదాపు పది జిల్లాలకు సంబంధించి డీసీసీబీ చైర్మన్ల జాబితాను ఖరారు చేసినట్లు విశ్వసనీయ సమాచారం. అయితే, ఈ పంపకంలో ఆయన అనుసరించిన శైలి, ప్రాధాన్యతలు ఇప్పుడు రాజకీయ వర్గాల్లో తీవ్ర చర్చకు దారితీశాయి. ఈ జాబితాలో సింహభాగం తెలుగుదేశం పార్టీకే దక్కింది. పది స్థానాలకు గాను, తొమ్మిది పదవులను టీడీపీ తమ ఖాతాలో వేసుకుంది.
కేవలం ఒకే ఒక్క చైర్మన్ పోస్టును కూటమిలో భాగస్వామి అయిన జనసేనకు కేటాయించారు. అత్యంత ఆశ్చర్యం కలిగించే, అత్యంత కీలకమైన అంశం ఏంటంటే... భారతీయ జనతా పార్టీకి మాత్రం ఈ డీసీసీబీ చైర్మన్ల కోటాలో ఒక్కటంటే ఒక్కటి కూడా దక్కలేదు.
టీడీపీకి దక్కిన తొమ్మిది స్థానాల్లో కొన్ని ముఖ్యమైన పేర్లు ఇవి: శ్రీకాకుళం జిల్లాకు శివ్వల సూర్యనారాయణ, విజయనగరానికి కిమిడి నాగార్జున్, గుంటూరుకు మాకినేని మల్లికార్జున్, కృష్ణాకు నెట్టం రఘురాం. వీరితో పాటు నెల్లూరు జిల్లా డీసీసీబీ పగ్గాలను ధనుంజయ రెడ్డికి అప్పగించగా, చిత్తూరు బాధ్యతలను అమాస రాజశేఖర్ రెడ్డికి అప్పగించారు. అనంతపురం జిల్లాకు కేశవ రెడ్డి, కర్నూలుకు డి విష్ణువర్ధన్ రెడ్డి, కడప జిల్లాకు బి సూర్యనారాయణ రెడ్డి డీసీసీబీ చైర్మన్లుగా ఎంపికైనట్లు సమాచారం.
ఇక, కూటమిలో మరో కీలక భాగస్వామి అయిన జనసేనకు విశాఖపట్నం జిల్లా డీసీసీబీ చైర్మన్ పదవి దక్కింది. కోనతాతారుకు ఈ అవకాశం కల్పించినట్లు తెలుస్తోంది.
మొత్తం పది డీసీసీబీ చైర్మన్ల పదవుల పంపకంలో బీజేపీకి పూర్తిగా మొండిచేయి చూపడం ఇప్పుడు రాజకీయ వర్గాల్లో తీవ్ర చర్చకు దారితీసింది. కూటమి ప్రభుత్వంలో భాగంగా ఉన్నప్పటికీ, బీజేపీకి డీసీసీబీ కోటాలో ఒక్క పోస్టు కూడా లభించకపోవడం విస్మయం కలిగిస్తోంది.
రానున్న రోజుల్లో ఇతర నామినేటెడ్ పోస్టుల పంపకంలో కూటమి భాగస్వామ్యుల మధ్య సర్దుబాటు ఎలా ఉంటుంది అన్నదానికి ఈ తొలి పంపకం ఒక సంకేతమా అనే ప్రశ్నలు వినిపిస్తున్నాయి. చంద్రబాబు తన పార్టీ శ్రేణులకు పెద్దపీట వేయడంలో భాగంగానే బీజేపీకి ఈ కోటాలో ప్రాధాన్యత ఇవ్వలేదా లేక ఇతర పదవుల్లో సర్దుబాటు ఉంటుందా అన్నది వేచి చూడాలి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి