ఎంపీలాడ్స్ (MPLADS) నిధుల నుంచి తాము అభివృద్ధి కార్యక్రమాలకు భారీగా నిధులు వెచ్చిస్తున్నామని, కాబట్టి అభివృద్ధి పనుల విషయంలో తమకు సహకారం అందించాలని, తమదే పైచేయి ఉండాలని వారు పట్టుబడుతున్నారు. అసలు సమస్య ఎక్కడ? .. నిజానికి, ఒక ఎంపీ నియోజకవర్గం అనేది 7 నుంచి 8 ఎమ్మెల్యే నియోజకవర్గాలను కలుపుకొని ఉంటుంది. ఎంపీలకు ప్రత్యేకంగా ఒక నియోజకవర్గం ఉండదు. కాబట్టి, వారు ఎమ్మెల్యేలను కలుపుకొనిపోవడం సరైన విధానం. కానీ, ఎంపీలాడ్స్ నిధులు వెచ్చిస్తున్నామనే ధోరణితో.. తామే నాయకత్వం వహించాలనే ఆధిపత్య ధోరణి కొన్నాళ్లుగా దేశవ్యాప్తంగా కనిపిస్తున్న సమస్య. ఏపీలో మాత్రమే కాదు, గతంలో వైఎస్సార్ కాంగ్రెస్ పార్టీ (వైసీపీ) హయాంలోనూ బాపట్ల నియోజకవర్గంలో ఎంపీ-ఎమ్మెల్యేల మధ్య జరిగిన తీవ్ర వివాదానికి ఈ ఎంపీలాడ్స్ నిధులే ప్రధాన కారణమయ్యాయి.
ఫలితంగా, అది ఇద్దరి మధ్య 'ఇగో వార్'గా మారి, చివరికి పార్టీ నష్టపోయింది. ఇలాంటి పరిస్థితే ఇప్పుడు టీడీపీలోనూ పునరావృతమవుతోంది. కేవలం టీడీపీలోనే కాకుండా, కూటమిలో భాగస్వామి అయిన బీజేపీ ఎంపీల వ్యవహారాలు కూడా ఇలానే ఉన్నాయని వార్తలు వస్తున్నాయి. కాబట్టి, ఈ సమస్యకు పరిష్కారం ఆధిపత్య ధోరణిని నివారించడంలోనే ఉంది. సమస్యకు పరిష్కారం ఏమిటి? .. రాజకీయ నాయకుల మధ్య 'ఇగో'లను పక్కన పెట్టి, అందరినీ కలుపుకొనిపోయేలా పార్టీ అధిష్టానం చొరవ చూపాలి. ఎంపీ-ఎమ్మెల్యేల మధ్య సామరస్యాన్ని, సమన్వయాన్ని నెలకొల్పే బాధ్యత ఆయా పార్టీలదే. అధిష్టానం తరచుగా నేతలతో చర్చించి, వారి మధ్య నెలకొన్న వివాదాలను సామరస్య పూర్వకంగా పరిష్కరించాలి. ఆధిపత్య పోరును నివారించి, ఇగోలకు ఫుల్ స్టాప్ పెడితేనే పార్టీలకు, అభివృద్ధికి మేలు జరుగుతుందని రాజకీయ వర్గాలు సూచిస్తున్నాయి. లేదంటే, ఈ వివాదాలు ఇలా పెరుగుతూనే పోయి, పార్టీకి మరింత నష్టం కలిగించే అవకాశం ఉందని విశ్లేషకులు హెచ్చరిస్తున్నారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి