దేశ రాజధాని ఢిల్లీ - ఎన్‌సిఆర్‌లోని వీధి కుక్కల భవితవ్యంపై సుప్రీంకోర్టు ఇటీవల ఇచ్చిన తీర్పు దేశవ్యాప్తంగా చర్చనీయాంశమైంది. తీర్పు ప్రకారం, ఎనిమిది వారాల్లో వీధి కుక్కలను పూర్తిగా తొలగించి, శాశ్వతంగా పౌండ్లలో ఉంచాలని ఆదేశించారు. ఈ నిర్ణయం వెంటనే రాజకీయ నాయకులు, సినీ ప్రముఖులు, జంతు సంరక్షణ కార్యకర్తల నుండి తీవ్రమైన వ్యతిరేకతకు గురైంది.మోనికా గాంధీ గట్టి హెచ్చరిక ..కేంద్ర మాజీ మంత్రి, జంతు హక్కుల పోరాట యోధురాలు మోనికా గాంధీ ఈ తీర్పును “ప్రాయోగికం కానిది, ఆర్థికంగా అసాధ్యం, పర్యావరణానికి ముప్పు”గా అభివర్ణించారు. ఢిల్లీలో మూడు లక్షలకు పైగా వీధి కుక్కలు ఉన్నాయని, వాటిని ఉంచడానికి కనీసం 3,000 పౌండ్లు నిర్మించాల్సి వస్తుందని, దానికి రూ.15,000 కోట్ల వ్యయం అవుతుందని ఆమె లెక్కలు చూపించారు. అంతేకాకుండా వీటికి వారానికి రూ.5 కోట్లు ఆహారం కోసం ఖర్చవుతుందని తెలిపారు. కుక్కలను తొలగిస్తే కోతుల దాడులు, ఎలుకల విపరీత పెరుగుదల వంటి పర్యావరణ సమస్యలు తప్పవని, 1880లలో పారిస్‌లో జరిగిన ఉదాహరణను గుర్తు చేశారు.


రాజకీయ & సినీ రంగం నుంచి విపరీత వ్యతిరేకత ..కాంగ్రెస్ నాయకులు రాహుల్ గాంధీ, ప్రియాంక గాంధీ వాద్రా ఈ తీర్పును మానవతా సూత్రాలకు విరుద్ధమని ఖండించారు. రాహుల్ గాంధీ, “వీధి కుక్కలు సమస్య కాదు, మన సమాజంలో దయకు అర్హులైన జీవులు” అని అన్నారు. ప్రియాంక గాంధీ ఈ ఆదేశాన్ని “అతి క్రూరమైనది”గా అభివర్ణించారు.సినీ తారలు కూడా ఈ నిర్ణయానికి వ్యతిరేకంగా గళం విప్పారు. జాన్ అబ్రహామ్, రవీనా టాండన్, జాన్వీ కపూర్, వరుణ్ ధావన్ వంటి వారు వీధి కుక్కలను సమాజంలో భాగమని, తరతరాలుగా మనుషుల పక్కనే జీవిస్తున్నాయని గుర్తుచేశారు. జాన్ అబ్రహామ్, పీపుల్ ఫర్ ద ఎథికల్ ట్రీట్‌మెంట్ ఆఫ్ అనిమల్స్ (PETA) ఇండియా గౌరవ డైరెక్టర్ హోదాలో సీజేఐకి లేఖ రాసి, ఈ తీర్పు ప్రాణుల జనన నియంత్రణ (ABC) నిబంధనలకు విరుద్ధమని స్పష్టం చేశారు.


సీజేఐ కీలక నిర్ణయం .. తీవ్ర విమర్శల మధ్య సీజేఐ బి.ఆర్. గవాయి ఈ కేసును పునఃసమీక్షించడానికి త్రిసభ్య విస్తృత బెంచ్‌ను ఏర్పాటు చేశారు. ఈ బెంచ్, జంతు సంక్షేమం, పౌరుల భద్రత, పర్యావరణ సమతుల్యత అన్నింటినీ పరిగణనలోకి తీసుకొని తుది తీర్పు ఇవ్వనుంది. ఢిల్లీ ప్రభుత్వం కూడా ఈ సమస్యను సమగ్రంగా పరిష్కరిస్తామని హామీ ఇచ్చింది. ఇప్పుడు దేశం మొత్తం చూపు సుప్రీంకోర్టు వైపే. ఈ తీర్పు మారితే వీధి కుక్కలకు న్యాయం జరుగుతుందా? లేక తీర్పు అలాగే ఉంటే ఢిల్లీలో కుక్కల దృశ్యం చరిత్రలో మిగిలిపోతుందా? అన్నది రాబోయే రోజుల్లో తేలనుంది.
మరిన్ని ఇంట్రెస్టింగ్ అప్ డేట్స్ కోసం wa క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి

మరింత సమాచారం తెలుసుకోండి:

Rahul Gandhi

Amruth kumar

14/08/2025 09:00 AM