బాహుబలి వంటి భారీ హిట్ ఫ్రాంచైజీ తరువాత దర్శక ధీరుడు రాజమౌళి తెరకెక్కిస్తున్న చిత్రం ‘ఆర్ఆర్ఆర్’. జూనియర్ ఎన్టీఆర్, మెగాపవర్ స్టార్ రామ్ చరణ్ కలిసి నటిస్తున్న ఈ సినిమాపై దేశ వ్యాప్తంగా భారీ అంచనాలు ఉన్నాయి. ఈ సినిమా నుంచి ఎటువంటి అప్‌డేట్ వచ్చినా ఫ్యాన్స్ పండగ చేసుకుంటున్నారు. అయితే కరోనా కారణంగా ఈ చిత్రం షూటింగ్ వాయిదా పడింది. ఇటీవల షూటింగ్ ప్రారంభిస్తే.. మళ్లీ తాజాగా సినిమాలో ఓ హీరో రామ్ చరణ్ కు కరోనా సోకినట్లు తేలింది. దీంతో మరోసారి షూటింగ్ ఆలస్యం అయ్యింది.

ఇదిలా ఉండగా, సంక్రాంతి సందర్భంగా చాలా మంది స్టార్ హీరోలు తమ ఫ్యాన్స్ కు  సర్‌ప్రైజ్‌లు అందించారు. తమ కొత్త సినిమాలపై అప్‌డేట్‌లు ఇచ్చి వారిని సంతోష పెట్టారు. అయితే ఎన్నో ఆశలు పెట్టుకున్న `ఆర్ఆర్ఆర్` యూనిట్ మాత్రం కిమ్మనకుండా కూర్చుంది. వీరి నుంచి ఎలాంటి అప్‌డేట్ రాలేదు. దీంతో ఫ్యాన్స్ సోషల్ మీడియా ద్వారా తమ అసహనం వ్యక్తం చేస్తున్నారు. `ఆర్ఆర్ఆర్` యూనిట్‌పై సెటైర్లు వేస్తున్నారు.

ఈ క్రమంలోనే `ఆర్ఆర్ఆర్` యూనిట్‌పై ఓ అభిమాని వేసిన సెటైర్ మిగతా ఫ్యాన్స్‌నే కాదు.. `ఆర్ఆర్ఆర్` టీమ్‌ను కూడా మెప్పించింది. `రాజమౌళి కుటీరం` పేరుతో వేసిన ఈ కార్టూన్‌లో రామ్‌చరణ్, ఎన్టీఆర్ నిలబడి మాట్లాడుకుంటూ ఉన్నారు. వారికి కొంచెం ముందు ఇద్దరు మహిళలు ముగ్గులు వేసుకుంటూ ఉన్నారు. వారిలో ఓ మహిళ `అక్కా! సినిమా రిలీజ్ ఎప్పుడు` అని ప్రశ్నించగా.. `తప్పమ్మా! తెలియనివి అడగకూడదు’ అంటూ అక్క బదులిస్తుంది. ఈ సెటైర్‌పై `ఆర్ఆర్ఆర్` టీమ్ కూడా స్పందించింది. `సృజనాత్మకతతో కొట్టారు. చాలా నచ్చింది. హ్యాపీ సంక్రాంతి` అని రిప్లై ఇచ్చింది. అంతే కానీ సినిమాపై మాత్రం ఎటువంటి అప్ డేట్ ఇవ్వలేదని ఫ్యాన్స్ మరోసారి రెచ్చిపోతున్నారు. మళ్లీ ‘ఆర్ఆర్ఆర్’ పై ఏదో ఒక అప్ డేట్ వచ్చే వరకూ ఫ్యాన్స్ ఇలా అసహనం వ్యక్తం చేస్తూనే ఉంటారు మరి.