ఫార్టీ ఇయర్స్ ఇండస్ట్రీ చంద్రబాబునాయుడుకు మంగళవారం తెల్లవారు జామునే కొత్తగా కలొచ్చిందట. అదేమిటయ్యా అంటే మరో ఏడాదిన్నరలో దేశమంతా జమిలి ఎన్నికలు వచ్చేయబోతున్నట్లు. ఇంతకు ముందేమో మరో రెండేళ్ళల్లో జమిలి ఎన్నికలు ఖాయమని నేతలతో ఒకేటే ఊదరగొట్టిన విషయం చాలా కాలంగా జరుగుతోంది. ఇదే జమిలి ఎన్నికలు మరో  ఆరుమాసాలు ముందుకు జరిగింది. అందుకనే రెండేళ్ళకు బదులు ఏడాదిన్నరలోనే జమిలి ఎన్నికలని మొదలుపెట్టేశారు. పైగా మొన్నటి ఎన్నికల్లో వైసీపీకి వచ్చిన ఓట్లశాతంలో 5 శాతం టీడీపీ లాగేసుకుంటే వైసీపీ ఇంటికెళిపోతుందని చాలా తేలిగ్గా చెప్పేశారు నేతలతో. అప్పటికి వైసీపీ ఓటు బ్యాంకును లాగేసుకోవటం అంటే తమ కుటుంబ ఆస్తులను, అప్పులు ప్రతిఏడాది మీడియా సమావేశంలో ప్రకటించినంత సులభం అన్నట్లుగా.

సరే చంద్రబాబు చెప్పినట్లుగానే ఏడాదిన్నరలోనే జమిలి ఎన్నికలు వస్తాయనే అనుకుందాం. వస్తే తెలుగుదేశంపార్టీ గెలిచేస్తుందని ఏమిటి గ్యారెంటి ? మొన్నటి ఎన్నికల్లోనే ఘోరంగా ఓడిపోయిన టీడీపీ 23 సీట్లకే పరిమితమైన విషయం అందరికీ తెలిసిందే. చంద్రబాబు నాయకత్వం మీద నమ్మకం లేక, టీడీపీకి భవిష్యత్తు లేదని అర్ధమైన తర్వాత చాలామంది నేతలు పార్టీకి రాజీనామా చేసేశారు. ఉన్న నేతల్లో కూడా చాలామంది పార్టీ కార్యక్రమాలకు దూరంగా ఉంటున్నారు. మాజీమంత్రులు, మాజీ ఎంఎల్ఏలు, మాజీ ఎంపిల్లో చాలామంది చంద్రబాబుతో ఫోన్లో మాట్లాడటానికి కూడా ఇష్టపడటం లేదని టాక్ నడుస్తోంది. అధికారంలో ఉన్నంతకాలం దూరంగా పెట్టిన నేతలను, సామాజికవర్గాలకు అర్జంటుగా పార్టీ కమిటీల్లో చోటు కల్పించారు. అధికారంలో ఉన్నపుడు దూరం పెట్టేసి ప్రతిపక్షంలోకి వచ్చిన తర్వాత చాకీరి చేయటానికేనా తమకు పదవులిచ్చిందని చాలామంది మండిపోతున్నారు. అందుకనే పదవులు వచ్చినా పెద్దగా యాక్టివ్ గా లేరు.