మరోవైపు, టీడీపీ అధినేత చంద్రబాబు నాయుడు ఈ రెండు దశాబ్దాల కాలం పాటు ముఖ్యమంత్రిగా కొనసాగే అవకాశం లేదు. యువనేత లోకేష్ బాబు నాయకత్వానికి పట్టం కట్టే సమయం ఆసన్నమైతే, అప్పుడు కూడా పవన్ స్థానం డిప్యూటీ సీఎం గానే ఉంటుందా అనేది మరో కీలకమైన అంశం. ఒకవేళ లోకేష్ ఈ టర్మ్‌లోనే సీఎం అయినా, లేదా వచ్చే టర్మ్‌లో అయినా, జనసేనాని పాత్రలో మార్పు ఉండదా?
అంటే, రాబోయే రెండు దశాబ్దాల పాటు ముఖ్యమంత్రి పీఠం తెలుగుదేశానికే రిజర్వ్ అయిపోయి, జనసేన కేవలం ఉప ముఖ్యమంత్రి పదవితో పాటు, సీట్ల సంఖ్యను క్రమంగా పెంచుకుంటూ సంతృప్తి చెందాల్సిందేనా అనే చర్చ ఊపందుకుంది. ప్రస్తుతం 21 స్థానాలు గెలుచుకున్న జనసేన, భవిష్యత్తులో 40, 50 స్థానాలకు తన బలాన్ని పెంచుకున్నా, అధికార సమీకరణాల్లో పెద్దగా మార్పు ఉండదనేది ఓ అంతర్గత ఒప్పందమా అనే ఊహాగానాలు జోరందుకున్నాయి.
ఇక, జాతీయ రాజకీయాల్లో చక్రం తిప్పాలని ఉవ్విళ్లూరుతున్న భారతీయ జనతా పార్టీ వ్యూహాలు ఇక్కడ ఎలా ఉండబోతున్నాయో చూడాలి. దేశంలో ఏ రాష్ట్రంలోనైనా ప్రథమ లేదా ద్వితీయ స్థానంలో ఉండాలని తపించే కమలదళం, ఆంధ్రప్రదేశ్‌లో ప్రస్తుతం దక్కిన పరిమిత స్థానాలతోనే సర్దుకుపోతుందా. తమిళనాడులో ఏఐఏడీఎంకేతో దాదాపు 50:50 లేదా అంతకంటే ఎక్కువ సీట్ల కోసం బేరసారాలు ఆడుతున్న బీజేపీ, ఏపీలో మాత్రం పట్టుమని పది, పదిహేను స్థానాలతోనే ప్రయాణం సాగిస్తుందంటే నమ్మశక్యంగా లేదు. తెలంగాణలో పుంజుకుని, తమిళనాడులో పాగా వేయాలని ప్రణాళికలు రచిస్తున్న కమలనాథులు, ఏపీలో మాత్రం ఎందుకు ఇంత నిరాసక్తంగా ఉన్నారనేది అర్థంకాని విషయం.
ఈ సుదీర్ఘకాలిక ప్రణాళిక వెనుక కూటమి నేతల మధ్య పక్కా అవగాహన ఉందా, లేక కేవలం జగన్ పాలనపై ఉన్న వ్యతిరేకతతో ఎమోషనల్ గా చేసిన ప్రకటన మాత్రమేనా అనే దానిపై పూర్తి స్పష్టత రావాల్సి ఉంది. ఎందుకంటే, విధానపరమైన నిర్ణయాలు, రాష్ట్ర భవిష్యత్తును నిర్దేశించే కీలక అంశాలు ఇలా అస్పష్టంగా, గాలివాటుగా ఉండటం ఎంతమాత్రం శ్రేయస్కరం కాదు. ఈ పొత్తుల రాజకీయ చదరంగంలో తెరవెనుక మరెన్నో వ్యూహాలు, ప్రతివ్యూహాలు రూపుదిద్దుకుంటున్నాయనేది వాస్తవం.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి