జీవితం అనేది కష్టసుఖాల సమూహం, సుఖదుఃఖాల సాగరం. ఇందులో ఏదీ శాశ్వతం కాదు, ఎవరూ పరిమితం కాదు. ప్రతి మనిషికి జీవితంలో ఎదగాలనే ఆశ ఉంటుంది. అందుకోసం ఎన్నో విషయాలను గెలవాల్సి ఉంటుంది. కానీ గెలుపొందడం అనేది అంత సులభము కాదు, అలాగని అసాధ్యం కాదు. కృషి, సమయస్ఫూర్తి, కాస్త ఓర్పు, పట్టుదల ఉంటే అనుకున్నది సాధించగలరు, గెలిచి చూపించగలరు. ప్రయత్నించిన వెంటనే, ప్రారంభించిన తొలి దశలోనే గెలుపు దక్కకపోవచ్చు, కొన్ని సార్లు ఓటమి పాలు కావచ్చు. అలాగని ధైర్యాన్ని కోల్పోకూడదు ఆత్మవిశ్వాసాన్ని విడిచిపెట్టకూడదు. విశ్వాసంతో ముందుకు సాగాలి.
ప్రతి ఓటమిని గుణపాఠంలా చేసుకొని ఓటమికి గల కారణాలు తెలుసుకొని వాటిని పునరావృతం కాకుండా జాగ్రత్తగా వ్యవహరించాలి. మళ్లీ తిరిగి అదే నమ్మకంతో ప్రయత్నించాలి. అప్పుడే గెలుపు పిలుపు వినిపిస్తుంది. మీరు అనుకున్న లక్ష్యం చేరుకోగలుగుతారు. ఇక్కడ గుర్తుంచుకోవాల్సిన ప్రధాన అంశాలు ఏమిటంటే. మూర్ఖంగా ఉండరాదు, తాను పట్టిన కుందేలుకు మూడే కాళ్లు అన్నట్టుగా వ్యవహరించ రాదు. మన సన్నిహితులకు చెప్పి తగిన సలహాలు సూచనలు తీసుకోవాలి. అభ్యసనం అనేది చాలా అవసరం. అలాగని ఈ ఒక్క విషయాన్ని మనసులో పెట్టుకొని జీవితంలో మిగిలిన పనులను, మన బంధాలు బాధ్యతలు గురించి మర్చిపోకూడదు, తక్కువ చేసి చూడకూడదు.
మీ లక్ష్యం తో పాటు మిగిలిన వాటిపై కూడా దృష్టి కేంద్రీకరించాలి వాటికి కూడా ప్రాధాన్యం ఇవ్వాలి. అన్నింటినీ బ్యాలెన్స్ చేసుకుంటూ ముందుకు సాగాలి. అప్పుడే జీవితం ఆనందమయం అవుతుంది. అందరి సహాయ సహకారాలు ప్రోత్సాహం మీ వెన్నంటే ఉండి గెలుపుకు మిమ్మల్ని మరింత దగ్గర చేస్తారు. మీకు గెలుపు దక్కలేదని దాని నుండి దూరంగా పారిపోకూడదు. అది మీకు సాధ్యమయ్యేవరకు పోరాడుతూనే ఉండాలి. గెలుపు కోసం మీరు పడే ప్రతి కష్టం శ్రమ, గెలుపు తరువాత గుర్తుకే రావు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి