తమ దారులు వేరైనా గమ్యం ఒక్కటే అంటూ చిరంజీవి తన తమ్ముడు పవన్ కళ్యాణ్ గురించి అనేకసార్లు ప్రస్తావించిన విషయం తెలిసిందే. వచ్చేనెల ఆగష్టు 15ను టార్గెట్ చేస్తూ రాబోతున్న ‘భోళా శంకర్’ మూవీలో చిరంజీవి పవన్ కళ్యాణ్ ‘గబ్బర్ సింగ్’ ‘బంగారం’ ‘పంజా’ సినిమాలలోని పవన్ బాడీ ల్యాంగ్వేజ్ ని యధాతధంగా అనుసరిస్తున్నట్లు తెలుస్తోంది.
ఈవిషయాన్ని స్వయంగా చిరంజీవి కూడ ఒక మీడియా ఇంటర్వ్యూలో చెప్పడంతో ‘భోళా శంకర్’ మూవీకి అత్యంత భారీ ఓపెనింగ్స్ రావడానికి పవన్ అభిమానుల సహకారం కూడ లభిస్తుంది. వాస్తవానికి ఈమూవీ దర్శకుడు మెహర్ రమేష్ ఫ్లాప్ ల పర్వంలో ఉండటంతో కొందరికి ఈమూవీ పై కొన్ని సందేహాలు ఉన్నాయి. అయితే ఈమధ్య విడుదలైన మూవీ టీజర్ అదేవిధంగా ఈమూవీలోని పాటలు అంచనాలను తలక్రిందులు చేసేవిగా కనిపిస్తున్నాయి.
చిరంజీవి నటించిన కొన్ని సినిమాలలో పవన్ అక్కడక్కడా అతిధి పాత్రలలో కనిపించినప్పటికీ వారిద్దరు కలిసి నటించే మల్టీ స్టారర్ కోసం మెగా అభిమానులు ఎన్నో సంవత్సరాల నుండి ఎదురు చూస్తున్నారు కాని అలా జరగడంలేదు. దీనితో ఆ అసంతృప్తిని కొంతవరకు తగ్గించాలని చిరంజీవి తన మూవీలో పవన్ బాడీ ల్యాంగ్వేజ్ అనుసరిస్తున్నాడు అన్న మాటలు వినిపిస్తున్నాయి. ఈనెలలో పవన్ కళ్యాణ్ ‘బ్రో’ వచ్చేనెలలో చిరంజీవి ‘భోళా శంకర్’ విడుదల అవుతున్న పరిస్థితులలో ఈ రెండు సినిమాల హడావిడితో బాక్స్ ఆఫీసు హోరెత్తబోతోంది..
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి